Ձեր վստահելի աղբյուրը

«Այն, որ այս փոփոխություններով օրենքի նախագիծը ավելի շահեկան է, քան նախորդը, դա պարզ է, այն, որ Կառավարությունը ցանկություն ունի ինչ-որ տեղ պայքարելու ստվերի դեմ, դա էլ է զգացվում, բայց եթե ճիշտ ձևակերպենք` կառավարությունը մոտավորապես է ուզում պայքարել ստվերի դեմ»: Այս մասին այսօր ԱԺ արտահերթ նիտի ժամանակ ասաց «Ժառանգություն» խմբակցության ղեկավար Ռուբիկ Հակոբյանը` խոսելով «Շահութահարկի մասին» օրենքում փոփոխություններ կատարելու մասին օրենքի նախագծից:

Նշենք, որ այդ փոփոխություններով առաջարկվում է 50 մլրդ դրամ արտահանման դեպքում շահութահարկը նվազեցնել մինչև 2%:

Անդրադառնալով փաստաթղթի քաղաքական նշանակությանը, Ռ.Հակոբյանն ասաց, որ այս փաստաթուղթն ինչ-որ առումով լեգիտիմացնում է, որ ֆինանսատնտեսական գործառույթները մնան ստվերում:

«Ուրիշ այլ ձևակերպում չեմ կարող տալ: Եթե, ես հարմար եմ գտնում 5 տոկոս շրջանառության հարկ մուծել, որի դեպքում իմ շահույթը ավելի մեծ է, քան 1.5 տոկոսի դեպքում, բնականաբար, ես անպայման ստվերում եմ գործում»,- ասաց պատգամավորը:

Նրա խոսքերով` այստեղ հարց է առաջանում, թե այդ իրադրային լուծումները ինչ հետևանք են հետապնդում:

«Երբեմն ինձ թվում է, որ մենք ուզում ենք նոր հեծանիվ հայտնագործենք կամ քաղաքական-տնտեսագիտական թեորեմներին հակառակ մեկ ուրիշ թեորեմ ապացուցել: Այս դեպքում ստացվում է հետևյալը, որ հիմնական ստվերի դեմ չենք կարողանում կռվել կամ չենք ուզում կռվել, և ստվերի դեմ ուզում ենք պայքարել այն մարդկանց միջոցով, որոնք միշտ պարտվել կամ տուժել են մոնոպոլիաների կամ օլիգարխների ձեռքին»,- ասաց պատգամավորը:

Ռ.Հակոբյանը անդրադառնալով համաշխարհային փորձին, նշեց, որ եթե հեղափոխություն է լինում, կամ օրենքներ չեն փոխվում, ապա նախնական կապիտալը ձևավորվում է կիսաօրինական կամ կիսաքրեական ճանապարհով, և երբ պետությունը սկսում է օրենքի դաշտ ստեղծել, այդ դեպքում ստվերը վերանում է և լեգիտիմացվում է ամբողջ պրոցեսը, ինչի արդյունքում մարդիկ սկսում են նորմալ աշխատել:

«Օրինակ` ԱՄՆ-ը 50 տարիների ընթացքում կարողացավ ամբողջ տնտեսությունը լեգիտիմացնել, Եվրոպան դրան հասավ երեք տասնամյակի ընթացքումից, ԽՍՀՄ-ի փլուզումից հետո Մերձբալթյան երկրները մեկ տասնամյակի ընթացքում ամբողջությամբ ստվերից դուրս եկան: Հայաստանը իր հոգեկերտվածքով կարծես թե վաղուց պետք է դուրս եկած լիներ ստվերից, բայց այսօր` 25 տարի հետո, եկել ենք ու ուզում ենք լեգիտիմացնել, որ ստվերը շարունակի գործել` հաշվի ենք նստում ստվերի հետ, գլուխ ենք խոնարհում ստվերի առջև և ասում ենք, որպեսզի ստվերը շարունակվի` եկեք այս օրենքը ընդունենք»,- նշեց Ռ.Հակոբյանը:

Ըստ նրա` եթե այդ ձևով օրենքն ընդունվի, ապա երկու-երեք տարի հետո նոր նախագիծ է բերվելու ԱԺ:

Ռ.Հակոբյանը նշեց, որ այսօր ՀՀ տնտեսությունը կանգնել է մի սահմանագծի, որ այլևս պետությունը չի կարողանում շնչել, տնտեսությունը չի կարողանում զարգացում ապրել:

«Կարծում է, որ եթե քաղաքական ղեկավարությունը կանչի այն 10-15 անձանց, ովքեր տնօրինում են հանրապետության ամբողջ ֆինանսական շարժը և ասի, որ գնում ենք դեպի կործանում, և մինչև հիմա ինչ արել ենք, հիմա գիծ ենք քաշում և որևէ մեկը մեկ լումա թաքցնի պետությունից, ապա դրանց հերը պետք է անիծվի, դրանք պետք է սնանկացվեն: Սա ամենակարճ և ճիշտ ճանապարհն է: Պետք է ի վերջո այդ փուլը ավարտենք»,- ընդգծեց Ժառանգություն» խմբակցության ղեկավարը:

Մինչդեռ, ըստ նրա, միջին թվաբանական մտավոր կարողություն ունեցող մարդը հասկանում է, որ սկզբունքորեն չեն պայքարում այդ չարիքի դեմ: Նրա խոսքերով` պետությունը մերժում է նաև ընդդիմադիր դաշտի ներկայացուցիչների առաջարկները, դրա համար էլ միշտ դոփում է տեղում:

Ռ.Հակոբյանի խոսքերով` բոլոր ոլորտներում թերություն ունենք և ընդունում ենք օրենքներ, որոնց պատճառով ժողովրդին կրակն ենք գցում:

«Ճիշտ է նախորդի համեմատ այս նախագիծը լավն է, բայց ես դեմ եմ քվերակելու Ճիշտ է իր բովանդակությամբ շատ ավելի շահեկան է, բայց քանի որ իրադրային լուծում է տալիս, և որովհետև մեկ տարի հետո այս նույն ամբիոնից նույն բառերն եմ ասելու, դրա համար ես ինձ հարգելով դեմ եմ քվեարկելու»,- հայտարարեց Ռ.Հակոբյանը և հավելեց. «Ես այս մասին բարձրաձայնում եմ ոչ թե որպես պատգամավոր, այլ իբրև քաղաքացի: Ինչո՞ւ այս հարցը սկզբունքորեն չենք լուծում: Ցավոք, իշխանությունն ականաջալուր չի և չի ընդունում, որ  պետք է ստվերի դեմ պայքարել ամբողջությամբ, որ բիզնեսը պետք է տարանջատել  քաղաքականությունից: Հարգելի մեծամասնություն, ուշադրություն դարձրեք խոսքիս տրամաբանությանը, իմ հորդորին, և կամք ունեցեք գնալ այս ճանապարհով, որպեսզի համակարգային խորը ճգնաժամից կարողանանք դուրս գալ: Պետք է նախ պրոֆեսիոնալ դաշտում պետությունն առաջ տանել, այնուհետև մտածել մյուս հարցերի մասին»:

 Հիշեցնենք, որ «Շրջանառության հարկի մասին» օրինագծով առաջարկվում է ՓՄՁ համար շեմը 58,35 մլն դրամից բարձրացնել 113,4 մլն դրամ, փաստաթղթավորման դեպքում հարկել 1.5%-ով, իսկ ապրանքների այն հատվածը, որ ապահովված չի լինի փաստաթղթով՝ 5%-ով: