Ձեր վստահելի աղբյուրը

Ութ տարուց ավելի է, Տերյան 23-25, Լալայանց 37 հասցեներում գտնվող շենքերը ճանաչվել են հանրային բացառիկ գերակա շահ, սակայն դեռևս նախագիծ էլ չկա, թե ինչ է այդտեղ կառուցվելու: Լրագրողների հետ հանդիպման ժամանակ ասաց բնակիչ, «Մեր քաղաքը» նախաձեռնության անդամ Վարդան Գերավետյանը:

«Ես դիմել էի քաղաքապետարան հարցումով, թե արդյո՞ք կա հաստատված նախագիծ տվյալ հատվածի համար: Ինձ պատասխանել են, որ դեռևս հաստատված նախագիծ չկա»,- ասաց նա՝ հավելելով, որ ութ տարի է դեռևս չեն պարզել, թե ինչ են կառուցելու, բայց բացառիկ գերակա շահ է ճանաչվել, ինչն «աբսուրդ է, խուլիգանություն է»:

Տերյան 23-25, Լալայանց 37 հասցեներում գտնվող շենքերը, կառավարության որոշմամբ, պետք է քանդվեն: Վ. Գերավետյանի խոսքով, կառուցապատողն է «Լոկալ Դիվելոփըրզ» ընկերությանը, որի հիմնադիր Սամվել Մայրապետյանն է:

«Մենք ինքնապաշտպանվելու ենք, չենք գնալու զիջումների»,- ասաց նա՝ հավելելով, որ Ս. Մայրապետյանի կողմից կատարվող գործողություններն անընդունելի ենք:

Ըստ նրա, իրենց առաջարկում են 1 քմ. համար 800 դոլարով վաճառել բնակարանները կամ էլ նոր բնակարան ստանալ՝ նորակառույցում:

«Նման ցածր գին սահմանելով՝ մտածում են, որ չենք կարող այդ գումարով նոր տուն գնել կենտրոնում, պետք է գնանք արվարձաններում ապրելու կամ էլ համաձայնվենք իրենց առաջարկած շենքում բնակարան վերցնել»,- նշեց նա՝ հավելելով, որ իրենց կառուցած շենքում առաջարկվող բնակարաններն համարժեք չեն այն բնակարաններին, որոնցում իրենք այժմ բնակվում են:

Օրինակ, Վ. Գերավետյանը նշեց, որ առաջարկվող շենքում առաստաղի բարձրությունն 2,27 մետր է (առանց հատակի, առաստաղի հարդարման), իսկ իրենց բնակարաններում՝ 3,30 մետր է. «Անհամարժեք կոմպենսացիա է»:

Նա նաև հայտնեց, որ «Լոկալ Դիվելոփըրզ» ընկերությանը դիմել է դատարան, որ բնակիչները պայմանագիր չեն ուզում կնքել իրենց հետ:

Բնակիչ, մանկավարժ Ֆլորա Ուդումյանն ասաց, որ իրենք այժմ ԴԱՀԿ-ից նամակներ են ստանում, որ պետք է սեփականությունն օտարեն հօգուտ այդ ընկերության:

«Մեզ գալիս են նամակներ հարկադիր մարմնից, որ մեր սեփականությունը` մեր բնակարանը, օտարեն հօգուտ նրա: Այդ գերակա շահ ասվածը չարիք է մեզ համար: Փոխհատուցումը ծիծաղելի է, վիրավորական է նույնիսկ: Քո երկրում քո բնակարանը ձեռքիցդ խլում են»,- ասաց նա:

Բնակիչ, գեղանկարիչ Վարդան Գաբրիելյանն էլ նշեց, որ շենքերում բնակվող մոտ 30 ընտանիք համաձայնվել է առաջարկվող փոխհատուցմանը, իսկ 22 բնակիչ շարունակում է պայքարել:

«Ես ցանկանում են, որ երկկողմանի բանակցություններ սկսվեն: Կարող են առանց մեր շենքերը քանդելու իրենց նախագիծն իրականացնեն: Դա հնարավոր է: Եթե իրենք չեն կարող, մենք կարող ենք գտնել ճարտարապետ, ով կգծի իրենց ցանկացած նախագիծն առանց մեր շենքերը քանդելու»,- նման առաջարկություն արեց գեղանկարիչը:

Միաժամանակ նա հայտնեց, որ իրենք ուզում են նամակով դիմել ԱԺ խմբակցություններին՝ զգուշացնելով, որ ամբողջ քաղաքը վտանգված է. «Կենտրոնում գտնվող 2000-2500 շենք գտնվում են շահեկան դիրքում, մի քանի տարի անց հնարավոր է դրանք էլ ճանաչեն հանրային գերակա շահ ու որոշեն քանդել: Թող բնակիչները տեղյակ լինեն»:

«Պետական կարիքների զոհեր» ՀԿ-ի ղեկավար Սեդրակ Բաղդասարյանն էլ ասաց, որ այսօր Երևանում 450 քաղաքացի հայտնվել է խայտառակ վիճակում, որովհետև ՀՀ օրենքները գրվում են, և դրանք խախտում են ոչ թե հասարակ քաղաքացիները, այլ հենց պետությունը: Նա ընդգծեց, որ պետությունը հետամուտ չի լինում պաշտպանելու քաղաքացիների իրավունքները:

«Բացառիկ գերակա շահ, պետական կարիք, հիմնավորում չի տրվում, անհասկանալի է, թե ինչ բացառիկ շահ է, պետական կարիք է: Երևի ավելի լավ կլիներ գրվեր Ռոբերտ Քոչարյանի կամ մեկ այլ պաշտոնյայի համար պետք է քաղաքացու սեփականությունը վերցվի: Այդ ժամանակ հասկանալի կլիներ»,- ասաց նա:

Ս. Բաղասարյանի խոսքով, 2007 թվականին ընդունվեց բացառիկ գերակա հանրային շահի մասին օրենքը: Ըստ օրենքի, տարածքը կարող է հանրային գերակա շահ համարվել 7 տարի ժամկետով:

«2007 թվականից այս շենքերը ճանաչվել են հանրային գերակա շահ: Առ այսօր չի իրացվել: Մայրապետյանն ութ տարվա մեջ իր պարտավորությունները չի կատարել: Բայց արդեն երեք անգամ է կառավարությունը նրան շնորհում է այդ տարածքը ձեռք բերելու իրավունք»,- ասաց Ս. Բաղդասարյանը:

Նա նաև հայտնեց, որ բացի այդ հատվածից, ևս երկու տարածքում նա պետք է կառուցապատում իրականացներ, սակայն ոչինչ չի կատարել:

Նախորդող հրապարակումներ՝
Կարող են Երևանում ցանկացած հին շենք ճանաչել գերակա շահ ու որոշել քանդել. նկարիչ
Գերակա հանրային շահի մութ ամպերը` դարձյալ Տերյան 23, 25 շենքերի գլխին. Հերթական օտարումն է սպառնում