Ձեր վստահելի աղբյուրը

«Եթե Վազգեն Սարգսյանն այստեղ լիներ, իսկ նա հոգեպես մեզ հետ է, ինքն ուրախության պահեր կապրեր, կհպարտանար մեր Հայկական բանակի, Հայաստանի այսօրվա անկախության, որպես ինքնիշխան պետություն, զարգացման ընթացքի համար»,- «Եռաբլուր» զինվորական պանթեոն լրագրողների հետ զրույցում ասաց ՀՀ պաշտպանության նախարար Սեյրան Օհանյանը:

Հիշեցնենք, որ այսօր Վազգեն Սարգսյանի ծննդյան օրն է: Նրա մարտական ընկերներն այցելել էին «Եռաբլուր» զինվորական պանթեոն:

«Սպարապետի երազանքն է եղել ստեղծել, կատարելագործել, զարգացնել Հայկական բանակը, և այսօր Հայաստանի Զինված ուժերի ղեկավարությունը ողջ անձնակազմի հետ միասին ժողովրդի աջակցությամբ կատարելագործում է այս կառույցը: Ականատեսն եք, որ հայկական բանակը տեղում չի դոփում, մրցունակ է, անընդհատ կատարելագործվում է, զարգացնում է փոխգործունակ կարողությունները՝ մեր անվտանգության ապահովման համար ստեղծելով միջազգային երաշխիքներ: Ակնկասած, այդ ամենը անդրադառնում է բանակի մրցունակության վրա, որն արտահայտվում է մեր սահմանների պաշտպանությամբ: Գիտեք, դժվար ժամանակներում ենք ապրում, անհրաժետ է, որ բանակը կարողանա ապահովել մեր ժողովրդի խաղաղ արարումը, թեկուզ մեր ծառայակից ընկերների կյանքի գնով, հերոսություններով, քաջագործություններով, բայց մենք համեմատական, հարաբերական հրադադարի պայմանները պաշտպանում ենք, ժողովուրդը կարողանում է խաղաղ արարել»,-նշեց նախարարը:

Ս. Օհանյանի խոսքով, եթե այսօր Վազգեն Սարգսյանը ողջ լիներ, իր ուրույն տեղը կունենար պետական կառավարման համակարգում:

Իսկ արդյո՞ք սպարապետ Վազգեն Սարգսյանի երազած Հայաստանում ենք ապրում հարցին ի պատասխան պաշտպանության նախարարն ասաց. «Այսօր ապրում ենք այն Հայաստանում, որն անկախ է, ազատ է, ժողովուրդը կարողանում է ազատ արարել, զարգանում է: Չկա համակարգ, որը թերություններ չունենա: Թերությունների հետ մեկտեղ՝ հետպատերազմյան տարիները ցույց են տվել, որ մեր ամբողջ պատմության ընթացքում ի վեջո կարողացել ենք ստեղծել պետական համակարգ իր կառավարման բոլոր ճյուղերով, ամենակարևորը՝ ստեղծել անվտանգային համակագ, որն ապահովում է Հայաստանի անվտանգությունը և ժողովրդի խաղաղ արարումը»: