«Հայաստանում քրեակատարողական հիմնարկների մասին ԵԽ զեկույցն արձանագրում է, որ վիճակը չի փոխվել»
Հունվարին Եվրոպայի խորհրդի խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեն զեկույց էր հրապարակել Հայաստանում քրեակատարողական հիմնարկների մասին: Այն կազմվել է կոմիտեի պատվիրակությունների 2013-14 թթ. այցելությունների հիման:
ՔԿՀ-ներում հասարակական վերահսկողություն իրականացնող հասարակական դիտորդական խմբի նախագահ Ռուբեն Սարգսյանն ասաց, որ զեկույցում անդրադարձ կա քրեակատարողական հիմնարկներում բուժսպասարկման և գերբնակեցման մասով առկա խնդիրներին: Նա նշեց, որ իրենց դիտարկումների համաձայն, հիմնական խնդիրներից է նաև վաղաժամկետ պայմանական ազատման ինսիտուտը, այսինքն՝ անկախ հանձնաժողովի գործունեության անարդյունավետությունը:
Հայաստանի Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն էլ ասաց, որ զեկույցում անդրադարձ կա այնպիսի խնդիրների, որոնք նաև նախորդ զեկույցներում են եղել:
«Այսինքն կոմիտեն արձանագրում է, որ վիճակը չի փոխվում»,- ընդգծեց նա:
Ա. Սաքունցի խոսքով, քրեակատարողական հիմնարկներում առաջնային խնդիրը ոչ թե պայմանական վաղաժամկետ ազատելու ինստիտուտի անարդյունավետությունն է, այլ անպաշտպանվածությունը. «Դրա համար կալանավորները դիմում են պայմանական վաղաժամկետ հանձնաժողովին, որպեսզի դուրս գան: Բավական լուրջ խնդիր է կոռուպցիոն ռիսկերը»:
Ըստ նրա, պատկան մարմինների կողմից քայլեր արվում են խնդիրների լուծման համար, բայց միաժամանակ կան համակարգային լուրջ խնդիրներ, որոնց լուծման համար անհրաժաշտ է կամք:
«Սոցիալական արդարություն» ՀԿ նախագահ Արշակ Գասպարյանն ասաց, որ քրեակատարողական հիմնարկներում զբաղվածության խնդիր կա. «Զբաղվածությունն ամենամեծ խնդիրն է: Գոնե ցմահ ազատազրկվածների համար պետք է ապահովել զբաղվածությունը, զարգացնել դատապարտյալների հետ տարվող վերականգնողական աշխատանքները»:
ՀՀ արդարադատության նախարարության քրեակատարողական վարչության կազմ-վերլուծական, իրավական և միջազգային հարաբերությունների բաժնի պետ, արդարադատության փոխգնդապետ Միքայել Զախարյանն ասաց, որ զեկույցում ուղղվածությունն ավելի շատ դրական է, ողջունում են կատարված փոփոխությունները, ձեռնարկված միջոցառումները, արդեն շրջանառության մեջ դրված օրենսդրական փոփոխությունը:
«Կան մեկ-երկու մտահոգություներ` կապված հիմնականում երկու դատապարտյալի հետ, որոնք գտնվում են Երևան-Կենտրոն քրեակատարողական հիմնարկում:
«Մտահոգությունը վերաբերում էր այդ երկու դատապարտյալին՝ արտաքին աշխարհի հետ կապի բացակայությանը: Այժմ արդեն նրանք երկուսով զբոսանքների են դուրս գալիս: Նախկինում իրենք չէին ցանկանում դուրս գալ»,- ասաց Միքայել Զախարյանը:
Նրա խոսքով, զեկույցը ողջունում է քրեակատարողական վարչության պետի ցուցումը, որ ոչ բոլոր դատապարտյալները խցերից դուրս տեղաշարժվելու ժամանակ կրեն ձեռնաշղթա կամ ոտնաշղթա: Մ. Զախարյանը նաև ասաց, որ կոմիտեն ողջունել է օրենսդրական նախաձեռնությամբ կատարվելիք այն փոփոխությունը, որ ցմահ ազատազրկվածները չառանձնացվեն մյուս դատապարտյալներից: Այսօրվա օրենքով, ըստ նրա, պահանջվում է, որ ցմահ ազատազրկվածներն առանձին պահվեն:
«Մենք էլ ենք գտնում, որ ճիշտ մոտեցում չէ»,- ասաց նա: