Ձեր վստահելի աղբյուրը

ՏԿԱԻ նախարարն ամփոփել է  իր երկօրյա այցը Սյունիքի մարզ՝ մասնակցելով մարզխորհրդի նիստին:

Մարզպետը ներկայացրել է մարզում իրականացված գյուղատնտեսական, առողջապահական, արդյունաբերական, սոցիալ-տնտեսական, մշակութային ոլորտների աշխատանքները: Նշելով, որ թվարկված ոլորտներում մարզում զգալի առաջընթաց է նկատվում՝ Ս. Խաչատրյանն ավելացրել է, որ գրեթե բոլոր համայնքներում նույն հիմնախնդիրներն են՝ ոռոգման և խմելու ջրի խնդիրը, ճանապարհների բարեկարգման հարցը և աշխատատեղերի ստեղծման խնդիրը: Այս մասին տեղեկանում ենք ՏԿԱԻՆ լրատվական ծառայությունից:

Մարզպետը խնդրել է առանձնահատուկ ուշադրություն դարձնել մարզի կրթական համակարգին, մասնավորապես՝ դպրոցների վերանորոգման խնդրին: Մարզպետը նկատել է, որ թե´ մարզային, թե´ հանրապետական օլիմպիադաներում բարձր ցուցանիշներ են ապահովում մարզի այն աշակերտները, ովքեր սովորում են բարեկարգված դպրոցներում:

Ս. Խաչատրյանը նշել է, որ մարզում գործում են նորագույն տեխնիկայով զինված բժշկական կենտրոններ: Շուտով շահագործման կհանձնվի Մեղրիի բժշկական կենտրոնը: Մարզի առողջապահական համակարգում հիմնական խնդիրը Սիսիանի բժշկական կենտրոնի բարեկարգումն է: Ս. Խաչատրյանի խոսքերով՝ մի շարք համայնքներում նախատեսվում է պահածոների գործարաններ ստեղծել, ինչը զգալիորեն կթոթափի գործազրկության խնդիրը:

Ամփոփելով Սյունիքի շուրջ 10 համայնքներ կատարած իր այցերն ու բնակիչների հետ ունեցած զրույցները՝ ՏԿԱԻ նախարար Արմեն Երիցյանը համայնքապետերի աշխատանքն ընդհանուր առմամբ դրական է գնահատել և նշել, որ իր աշխատելաոճին համաձայն՝ դեռ շատ կայցելի Սյունիքի մարզ և կլինի բոլոր համայնքներում:

«Անելիքներ դեռ շատ կան: Համայնքների խոշորացման ծրագիրը շատ կարևոր է հատկապես Սյունիքի մարզի համար, քանի որ այստեղ համայնքների քանակը և բնակչության քանակը համաչափ բաշխված չէ: Համայնքների խոշորացման ծրագիրը չի ենթադրում, որ այդ բնակավայրերում կվերանան մանկապարտեզները, դպրոցները և այլ ենթակառուցվածքներ, հակառակը՝ մի համայնքի բնակիչները կկարողանան օգտվել մեկ այլ համայնքում առկա ենթակառուցվածքից: Օրինակ՝ մի գյուղի բնակիչները կարող են օգտվել համայնքի մյուս գյուղերում գործող երաժշտական դպրոցից կամ սպորտային կենտրոնից: Համայնքերի միջև կապը կապահովվի միջհամայնքային տրանսպորտի միջոցով»,-նշել է Ա. Երիցյանը:

Ներկայացնելով համայնքների խոշորացման պիլոտային ծրագիրը, որը կգործարկվի նաև Սյունիքում՝ նախարար Երիցյանը շեշտել է, որ հաջողություն չունենալու դեպքում ծրագիրը չի մեկնարկի: Պատասխանելով համայնքապետերի հարցերին՝ նախարարը ևս մեկ անգամ շեշտեց, որ տեղեկանքների և այլ փաստաթղթերի ստացման համար գյուղացին ստիպված չի լինելու երկար ճանապարհ կտրել:

«Համայնքների խոշորացման ծրագրի իրականացման գործընթացում հենվում ենք միջազգային փորձի վրա: Այսօր մենք ունենք 866 գյուղական համայնք, որոնցում արված ներդրումները բավարար արդյունքներ չեն տալիս: Խոշորացման ծրագիրը թույլ կտա ոչ միայն առավել արդյունավետ օգտագործել համայնքներում արված ներդրումները, այլև՝ առավել արդյունավետ վերահսկել դրանք: Համայնքապետերի հետ իմ զրույցների արդյունքում կարող եմ ասել, որ նրանցից շատերը ոչ միայն կողմ են խոշորացման ծրագրին, այլև նշում են, որ նման ծրագրի կարիքը վաղուց էր զգացվում»,-ասել է Ա. Երիցյանը:

Անդրադառնալով մայիսի 17-ին կայանալիք համայնքների խոշորացման ծրագրի վերաբերյալ տեղական հանրաքվեին՝ նախարար Երիցյանը նշել է, որ համաձայն ՀՀ սահմանադրության՝ համայնքների խոշորացման ծրագիրը կարող էր իրականացվել առանց հանրաքվեի, սակայն հանրաքվեի անցկացումը ՀՀ նախագահի հատուկ հանձնարարականն էր, որպեսզի մարդիկ հնարավորություն ունենան ինքնուրույն որոշել, ուզում են տվյալ ծրագրի իրականացումը, թե՝ ոչ:

Ամփոփելով մարզխորհրդի նիստը՝ նախարար Երիցյանը համայնքապետերին հանձնարարեց բարձրաձայնած խնդիրների լուծման վերաբերյալ նախնական ծրագիր ներկայացնել, որը կծառայի որպես յուրօրինակ ուղեցույց առկա հարցերի լուծման գործընթացում:

«Վստահ եմ, որ համատեղ աշխատանքով մեծ արդյունքների կհասնենք»,-եզրափակել է Ա. Երիցյանը:

Նախարար Երիցյանն այցելել է նաև ՀՀ Ազգային արխիվի Սյունիքի մասնաճյուղը, ծանոթացել աշխատանքային գործընթացին: Մասնաճյուղի տնօրեն Արշալույս Փափազյանը նախարարին ներկայացրել է առկա խնդիրները:

Նախորդող հրապարակումներ՝
«Սյունիքի ՃԿԿ-ն 70%-ով պետք է բաղկացած լինի բարձրագույն կրթություն ունեցող կանանցից»
Ա. Երիցյան. Գյուղացին ստիպված չի լինի անհրաժեշտ փաստաթղթի համար երկար ճանապարհ կտրել