«Չեմ ասում՝ ատրճանակ վերցնեն ու կրակեն». Բնապահպան
Հայաստանում պաշտոնապես գրանցված է 351 թռչնատեսակ, որից 26 տեսակն ընդգրկված է սպառնալիքի տակ գտնվող թռչունների միջազգային Կարմիր գրքում: Լրագրողների հետ հանդիպման ժամանակ ասաց «Թռչնասերների կենտրոն» ՀԿ-ի նախագահ, Էկոլոգիական հասարակական դաշինքի համակարգող Սիլվա Ադամյանը:
Ըստ նրա, Հայաստանում որոշ թռչնատեսակներ պաշտպանության կարիք ունեն, քանի որ վտանգված են տարբեր պատճառներով, այդ թվում նաև մարդկային գործոնի ազդեցություն, բնադրային տարածքների պահպանում, չկանոնակարգված որս, որսացանցեր:
Ս. Ադամյանն ասաց, որ վտանգված են նաև ջրաճահճային թռչուններ, որոնք հիմնականում տարածված են Արմաշի լճերի տարածքում: Նա նշեց, որ այդ տարածքին պետք է հատուկ կարգավիճակ շնորհվի:
«Այդ լճերի տերերն արդեն չեն կարողանում պահել այդ լճերը ջրի նվազման պատճառով, իրենք էլ են փաստում, որ իրենց տարածքներում քչացել են թռչունները»,- նշեց բնապահպանը:
Ս. Ադամյանի խոսքով, իրենք իրականացնում են մի ծրագիր, որի նպատակն է օգնել արագիլներին. «Արագիլները բույն են դնում հիմնականում էլեկտրալարերին շատ մոտ: Նախորդ տարի երեք բուն էր վառվել՝ ձագուկներով: Արմաշ գյուղում մենք տեղադրել ենք արհեստական բներ՝ երկաթը կլոր կարկաս, որի մեջ արդեն արագիլն իր բույնը կդնի»:
Ս. Ադամյանը նաև նշեց, որ Երևանում ծառերի էտը վնասում է թռչուններին. «Իհարկե, սա մեծ խնդիր է, թռչունները չեն կարողնում բնադրվել, նաև այլանդակում են քաղաքը, որը նկատում են բոլորը, նաև զբոսաշրջիկները: Պատրաստվում եմ նամակ գրել Երևանի քաղաքապետարան: Սա բիզնեսի հետ եմ կապում, երևի այդ ճյուղերը ինչ-որ մեկին անհրաժեշտ են»:
Նա նաև նշեց, որ Երևանում հիմնականում կարելի է հանդիպել ագռավ ու կաչաղակ, քանի որ աղբահանությունը, կանաչապատումը սխալ է արվում:
«Կանաչապատում ասելով հասկանում են միայն ծաղիկներ, մինչդեռ թռչունների համար անհրաժեշտ են ծառեր, թփուտներ, որպեսզի բնադրվեն: Քաղաքը պետք է ազատվի կաչաղակներից, ագռավներից: Չեմ ասում՝ ատրճանակ վերցնեն ու կրակեն: Քաղաքին անհրաժեշտ են միջատակեր թռչուններ, որպեսզի մեր շրջապատից վերացնեն վնասակար միջատներին»:
Ապրիլի 1-ը վայրի թռչունների համաշխարհային օրն է:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ