Ձեր վստահելի աղբյուրը

ԵԽԽՎ լիագումար նիստը համընկավ ապրիլի 24-ից առաջ Հայաստանում անցկացվող գլոբալ ֆորումին, այդ իսկ պատճառով ԵԽԽՎ նախագահը չկարողացավ մասնակցել ֆորումին: Այս մասին այսօր լրագրողների հետ հանդիպման ժամանակ ասաց ՀՀ Ազգային ժողովի փոխնախագահ, ԵԽԽՎ-ում ՀՀ ԱԺ պատվիրակության ղեկավար Հերմինե Նաղդալյանը:

Անդրադառնալով ԵԽԽՎ-ում Հայաստանի պատվիրակության գործունեությանը՝ ԱԺ փոխխոսնակը կարևորեց ԵԽԽՎ-ում Հայոց ցեղասպանությունը դատապարտող հայտարարության տեքստի ընդունումը:

«Եվրախորհրդի խորհրդարանական վեհաժողովի կողմից Հայոց ցեղասպանության 100-րդ տարելիցի կապակցությամբ ընդունած հայտարարությունն աննախադեպ է, քանի որ այդ հայտարարությանը միացել են ոչ միայն ԵԽ անդամ այն երկրները, որոնց օրակարգում ցեղասպանությունների ժխտողականության դեմ պայքարը միշտ առաջնահերթությունների շարքում է եղել, այլ այն երկրները, որոնք երբեք ակտիվ չեն եղել ժխտողականության դեմ պայքարում»,- ասաց Հ.Նաղդալյանը:

ԱԺ փոխխոսնակը նշեց, որ հայտարարության տակ ստորագրել է ԵԽ անդամ 40 երկրի 170 պատվիրակ: Սա, ըստ նրա, խոսում է այն մասին, որ ԵԽ անդամ 40 երկրների արտաքին քաղաքական օրակարգում ցեղասպանությունների ժխտողական քաղաքականության դեմ պայքարը առաջնահերթություն է դարձել:

Հ.Նաղդալյանը հայտնեց նաև, որ հայտարարության նախապատրաստման գործում ակտիվ մասնակցություն են ունեցել տարբեր երկրների պատվիրակությունների ներկայացուցիչներ: Նա նաև անդրադարձավ Հայաստանի պատվիրակությանը՝  նշելով, որ ԵԽԽՎ պատվիրակության անդամների մեծ մասն ընդդիմադիր գործիչներ են, բայց դա չխանգարեց մի գաղափարի շուրջ համախմբվելու համար:

«Այս գործում ահռելի աշխատանք են կատարել Արփինե Հովհաննիսյանը, Մհեր Շահգելդյանը, Արմեն Ռուստամյանը, Նաիրա Կարապետյանը, Նաիրա Զոհրաբյանը և մյուս մեր պատվիրակները, ովքեր ջանք չեն խնայել հայտարարության տեքստը մնացած պատվիրակների համար ընկալելի դարձնելու համար: Մեր պատվիրակության անդամները եղել են միասնական և մեծ դեր են կատարել աշխատանքների կազմակերպման համար: Լևոն Զուրաբյանն իր ելույթի ժամանակ առաջարկեց ոտքի կանգնել և հարգել Հայոց ցեղասպանության զոհերի հիշատակը, բոլորն ընդունեցին հայ պատգամավորի առաջարկը, բացի մի քանի թուրք պատվիրակներից»,- նշեց նա` հավելելով, որ թուրքական պատվիրակությունից միայն մեկն է ոտքի կանգնել, սակայն հետագայում հայ պատգամավորները տեղեկացել են, որ թուրքական պատվիրակության ներսում ճնշումներ են եղել նրա նկատմամբ:

Նշենք, որ ապրիլի 23-ին Եվրոպայի խորհրդի խորհրդարանական վեհաժողովում ընդունվել է «Հայոց ցեղասպանության 100-ամյա տարելիցի հիշատակման» հայտարարությունը, որը հեղինակել է ԵԽԽՎ-ում Ֆրանսիայի պատգամավոր, ԵԽԽՎ փոխնախագահ Ռենե Ռուքեն։

Նախորդող հրապարակում՝
ԵԽԽՎ-ում ընդունվեց Հայոց ցեղասպանության դատապարտման հայտարարությունը (լրացված)