Չի կարող շարունակվել, որ հասարակության մեջ կաստաներ ձևավորվեն` բանակում ծառայողների ու չծառայողների համար. Է.Մարուքյան
Ազգային ժողովում «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքի նախագծի քննարկման ժամանակ ԱԺ պատգամավոր Էդմոն Մարուքյանը ներկայացրեց Պաշտպանության, ներքին գործերի, Ազգային անվտանգության մշտական հանձնաժողովի եզրակացությունը:
Էդմոն Մարուքյանը նշեց, որ 10 տարի է օրենքի ժամկետը երկարաձգում են, բայց հետախուզվողների թիվն այդպես էլ չի նվազում:
Ուստի, ըստ նրա, հանձնաժողովում բուռն քննարկում է եղել՝ երկարաձգե՞լ ժամկետը, թե՞ խնդրին հիմնավոր լուծում տալ:
«Տարեկան 800 մարդ այս օրենքից օգտվել է, իսկ ՊՆ-ի հատուկ հաշվին վճարվել է մոտ 800 մլն դրամ: Մյուս մոտեցումն այն է, որ մենք ինչ-որ բան փոխենք օրենքում: Օրինակ, սահմանված գումարը նվազեցնենք, որ ավելի շատ մարդիկ գան կամ ժամկետ սահմանենք, որ այսինչ ժամկետը ովքեր եկան և վճարեցին գումարը, կարող են Հայաստանում կարգավորել իրենց խնդիրները: Այսինքն՝ ոչ թե 800 մարդ հետ կգա 10 հազար հետախուզվողներից, այլ ավելի շատ մարդ»,- նշեց Մարուքյանը:
Պատգամավորն ասաց, որ կարծիք կար՝ գումարը ավելացնեն, որ ինչ-որ կերպ պատժեն զինվորական ծառայությունից խուսափածներին:
«Քննարկումների արդյունքում հանձնաժողովը որոշում է կայացրել այս պահին նախագծին տալ դրական եզրակացություն, բայց ձևավորել աշխատանքային խումբ և քննարկել բազմաթիվ առաջարկները, որպեսզի հետագայում այս խնդրին համակարգային լուծում տանք»,- ասաց Է.Մարուքյանը:
ԲՀԿ պատգամավոր Միքայել Մելքումյանն առաջարկեց, որ գումարը բարձրացվի, որպեսզի խիստ պատժվեն և այնպես չլինի, թե բանակից խուսափել են, հետո էլ մի փոքր գումար տան ու հանգիստ մնան: Էդմոն Մարուքյանն էլ նկատեց, որ բազմաթիվ մարդիկ իրենց կամքով չեն խուսափել ծառայությունից:
«Մարդ կա 15-16 տարեկանում ծնողների հետ գնացել է այլ երկիր, բայց քանի որ նա արդեն կցագրված է եղել, ապա 18 տարեկանը լրանալուց հետո նրա գործերը մեխանիկորեն զինվորական կոմիսարիատից ուղարկվել է դատախազություն, ինչի արդյունքում ընկել է քրեական հետախուզման տակ»,- նշեց Մարուքյանը:
ԲՀԿ խմբակցության քարտուղարի Նաիրա Զոհրաբյանն էլ ասաց, որ չեն կարող դեմ լինել օրենքի նախագծին, սակայն առաջարկեց լուրջ քննարկումներ կազմակերպվել այս խնդրի վերաբերյալ:
«Միգուցե արժե բարձրացնե՞լ շեմը, քանի որ հանդիպել եմ դեպքերի, երբ երիտասարդները բանակից խուսափելու համար անգամ իրենց երիկամների մեջ այնպիսի հակաթույներ են ներարկում, որպեսզի կարողանան բժշկական կոմիսիաներով ճանաչվել ոչ ենթակա: Նաև բոլորս գիտենք, որ բոլոր բարձրաստիճան պաշտոնյաների երեխաները բանակում «ջերմոցային պայմաններում» են ծառայում, եթե, իհարկե, ծառայում են: Ուստի, ես առաջարկում եմ այս խնդրին իրապես անդրադառնալ, քանի որ սա լուրջ սոցիալական դժգոհության պատճառներից մեկն է»,- նշեց նա:
Էդմոն Մարուքյանն էլ նկատեց, թե հենց այդ նկատառումով էլ ձևավորվել է աշխատանքային խումբ: Նրա խոսքերով՝ ոչ թե պետք է ուսումնասիրեն, թե 8 տարի առաջ ով ոնց է ծառայել, այլ տեսնել, թե հենց հիմա ով ոնց է խուսափում ծառայությունից:
«Չեմ ցանկանում թվարկել այն հիվանդանոցների անունները, որտեղ ես գիտեմ, թե հիմիկվանից 7-8 տարեկան երեխաների համար ինչպիսի դոսյեներ, հիվանդության չեղած պատմություններ են նախապատրաստում ՝ բանակից ազատելու ամբողջական փաթեթն ունենալու համար, քանի որ հույս չունեն, որ իրենց հայրն այդ ընթացքում կդառնա բարձրաստիճան պաշտոնյա կամ կունենան այդքան գումար՝ վճարելու ևբանակից ազատելու համար»,- ընդգծեց Նաիրա Զոհրաբյանը:
Է.Մարուքյանն էլ նշեց, որ վերջին շրջանում սահմանում տասնյակ զինվորներ են զոհվել թշնամու գնդակից և սոցցանցերում քննարկվում է՝ այդ զոհվածներից ոչ մեկը գոնե միջին սոցիալական պայմաններում չի ապրում, բոլորը ծայրահեղ աղքատ ընտանիքների երեխաներ են. « Չեմ հասկանում, այն ասացվածքը իրականությո՞ւն է դարձել, թե հայրենիքն աղքատինն է միայն պատերազմի ժամանակ: Սա անընդունելի է և չի կարող շարունակվել, որ հասարակության մեջ շերտեր կամ կաստաներ ձևավորվեն, բանակում ծառայողների ու չծառայողների համար»:
ԱԺ փոխխոսնակ Էդուարդ Շարմազանովը միջամտեց՝ ասելով, որ պետք չի ամեն ինչ այդքան սև գույներով ներկայացնել. «Այո, կան պրոբլեմներ, որոնք բոլորիս մտահոգում է, բայց չպետք է ամեն ինչ սև գույներով ներկայացնել»:
ԱԺ առողջապահության հանձնաժողովի նախագահ, ՀՀԿ-ական Արա Բաբլոյանն էլ պահանջեց Նաիրա Զոհրաբյանից հանձնաժողովին ներկայացնել այդ հաստատությունները: «Մենք ունենք հստակ կառուցված մեխանիզմներ և ծանոթ եմ պաշտպանության նախարարի մոտեցումներին, որ եթե երեխան հիվանդ է, անիմաստ է մարդու իրավունքը խախտել՝ տանել բանակ և բանակը ծանրաբեռնել հիվանդ երեխայի զորակոչով: Բայց գիտենք, որ որևիցե շինծու թղթով չենք կարող երեխային ազատել բանակից: Եթե կան այդպիսի դեպքեր, ներկայացրեք, օգնենք մեր քաղաքացիներին, բժշկական կենտրոններին ու նախարարությանը՝ ճիշտ ուղղությամբ գնալ»,- ասաց Ա.Բաբլոյանը:
Լրահոս
Տեսանյութեր
Փաշինյանի կնոջը «Նիկոլ ցեղասպան» վանկարկումով դիմավորեցին Ծիծեռնակաբերդի հուշահամալիրում