«Կառավարությունը պետք է մնա չեզոք». Վարչապետը՝ Թևան Պողոսյանի նախագծի մասին
ՀՀ կառավարությունը խորհրդարանին է վերապահում կառավարության հետ հարցուպատասխանի նիստի սկզբում առաջինը բանավոր, այնուհետև գրավոր հարցերը հնչեցնելու որոշումը:
Նշենք, որ «Ժառանագություն» խմբակցության պատգամավոր Թևան Պողոսյանն օրենսդրական նախաձեռնության կարգով ՀՀ կառավարությանն էր ներկայացրել «Ազգային ժողովի կանոնակարգ» ՀՀ օրենքում փոփոխություններ կատարելու մասին» ՀՀ օրենքի նախագիծը, որով առաջարկվում է հնարավորություն տալ պատգամավորներին ԱԺ-կառավարություն հարցուպատասխանի նիստի սկզբում առաջինը հնչեցնել բանավոր հարցերը, այնուհետև գրավորները՝ դա պատճառաբանելով այն հանգամանքով, որ երբեմն գրավոր հարցերի առատության պատճառով պատգամավորները զրկվում են բանավոր հարցերով հանդես գալու հնարավորությունից:
ՀՀ արդարադատության նախարարությունը բացասական եզրակացություն էր տվել նախագծին՝ նշելով, որ ՀՀ օրենսդրական աշխատանքի պրակտիկան վկայում է՝ կառավարությանն առնչվող հարցերի քննարկման ժամանակ նախապես գրավոր ձևակերպված և ուղղված հարցերի առաջնահերթությունը բանավոր հնչեցվող հարցերի նկատմամբ բխում է պառլամենտական ժողովրդավարության և նպատակահարմարության սկզբունքներից:
Գործադիրի այսօրվա նիստում վարչապետ Հովիկ Աբրահամյանն առարկեց ՀՀ արդարադատության նախարար Հովհաննես Մանուկյանին և նշեց, որ պետք չէ նախագծին բացասական եզրակացություն տալ: Ըստ վարչապետի՝ դա խորհրդարանի խնդիրն է և վերջինս պետք է որոշի հարցը:
«Նաև որոշ պատգամավորներ մեզ անհիմն մեղադրում են, թե խուսափում ենք բանավոր հարցերից, իսկ գրավոր հարցերի պատասխանը կազմակերպված է: Բայց դրանց պատասխանելը կանոնակարգ օրենքի պահանջ է և մենք էլ պարտավոր ենք պատասխանել: Թող իրենց գրավոր հարցը չհնչեցնեն, մենք էլ չպատասխանենք: Երկրորդ, իմ կարծիքով մենք իզուր ենք բացասական կարծիք տալիս, թող խորհրդարանը որոշի, քանի որ իր լիազորությունն է: Կգտնեն նպատակահարմար, որ սկզբից մենք բանավոր հարցերին պատասխանենք, կպատասխանենք դրանց, կգտնեն հակառակը՝ այդպես էլ կվարվենք: Դա իրենց ներքին խնդիրն է»,- ասաց վարչապետը:
Հովիկ Աբրահամյանը նկատեց, որ բացասական եզրակացություն տալով նշանակում է, որ կառավարությունն ինչ որ մտահոգություն ունի բանավոր հարցերին պատասխանելու հետ կապված:
«Ոչ, մենք պետք է պատրաստ լինենք և դա նաև հարթակ է, հնարավորություն, որպեսզի կառավարության անդամն իր դիրքորոշումը ներկայացնի և խորհրդարանին: Ես առաջարկում եմ, որ կառավարությունը մնա չեզոք, իրենք ինչպես կորոշեն՝ մեզ համար ընդունելի կլինի»,- ասաց վարչապետը:
Նշենք, որ նախագծով նախատեսվում է նաև հստակեցնել բանավոր հարցերով կառավարությանը դիմելու կարգը: Մասնավորապես՝ առաջարկվում է նիստը սկսելուց մեկ ժամվա ընթացքում հնչեցվեն ընդդիմադիր խմբակցությունների պատգամավորների 2-ական հարցեր, այնուհետև՝ 2-ական հարցերով հանդես գան ոչ ընդդիմադիր և անկախ պատգամավորները, որից հետո բանավոր հարցեր տրվեն հերթագրված մյուս պատգամավորների կողմից:
Նախորդող հրապարակում՝
Կառավարությունում մտադիր են մերժել Թևան Պողոսյանին
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում