Ձեր վստահելի աղբյուրը

«Լեռնային Ղարաբաղում Հանրային ռադիոյի հեռարձակման հետ կապված մենք ունենք պետական մտածողության առումով բավականին լուրջ բացթողում»,-լրագրողների հետ հանդիպման ժամանակ այսօր ասաց Հայաստանի Հանրային ռադիոյի գործադիր տնօրեն Արմեն Ամիրյանը՝ նշելով, որ ԼՂՀ տարածքում հեռարձակվում է Հանրային ռադիոն, նույն հաճախականության վրա օրական 8 ժամ` տեղական հանրային ռադիոընկերության միջոցով:

«Վերջերս ԼՂՀ նախագահ Բակո Սահակյանի մոտ տեղի ունեցած խորհրդակցության ժամանակ փորձեցինք ինչ-որ լուծման գալ, որպեսզի կարողանանք երկու տարբեր հաճախականությունների զատել՝ Արցախի Հանրային ռադիոն դարձնել 24 ժամ, միևնույն ժամանակ 24 ժամ հեռարձակվի նաև Հանրային ռադիոն»,-հայտնեց Արմեն Ամիրյանը:

Նա ընդգծեց, բազմիցս հարց է բարձրացրել ԼՂՀ FM տարածքն ամբողջությամբ երևանյան ռադիոներով կամ որևէ այլ ազդանշանով զբաղեցնելու մասին, որպեսզի հարևան երկրի ազդանշանները լսելի չլինեն Արցախի տարածքում:

«Տևական շարունակելու եմ այս խնդրով զբաղվել, որևէ ադրբեջանական ռադիոկայան չպետք է լսվի ԼՂՀ տարածքում: Ժամանակի ընթացքում նույն խնդիրը սկսում ենք ունենալ Հայաստանի տարածքում: Երբ շրջում ենք սահմանամերձ շրջաններով՝ տեսնում ենք, որ թուրքական, ադրբեջանական, իրանական ռադիոկայաններն անարգել հասնում են մեր տարածք»,-նշեց բանախոսը:

Նա նկատեց՝ պատճառն այն է, որ հարևան երկրները չեն պահպանում միջազգային կոնվենցիաները և հեռարձակման հզորությունները շատ ավելի բարձր են դնում, քան սահմանված է. «Նույն ճանապարհով մենք պետք է շարժվենք, եթե դիմացինն անօրեն է, մենք էլ պետք է հզորությունները շատացնենք: Մենք իրավասություն ունենք այս հարցը բարձրացնելու, բայց խնդրով պետք է զբաղվեն պատկան մարմինները»:

Լրագրողի դիտարկմանը՝ թե այդ դեպքում ինչու՞ է հանրային ռադիոն հեռարձակվում ադրբեջաներեն և թուրքերեն, Ա. Ամիրյանը պատասխանեց, որ բնական գործընթաց է, երբ հեռարձակում կա հարևան, այդ թվում հակամարտության մեջ գտնվող երկրի լեզվով. «Դա չի նշանակում, որ դու, որպես պետություն պետք է անարգել թողնես նրանց հեռարձակումները հնչեն քո տարածքում: Իսկ հարևան երկրների լեզուներով հեռարձակումը լուծում է պատգամներ փոխանցելու խնդիրը»:

Անդրադառնալով Հանրային ռադիոյում սերնդափոխությանը՝ Հանրային ռադիոյի գործադիր տնօրենը պատմեց, որ այն ինքնաբերաբար է տեղի ունենում. «Չենք հրաժարվում մեր ավագ սերնդից, փորձում ենք նրանց գիտելիքները, կյանքի փորձը սովորեցնել երիտասարդ սերնդին»:

Վերջում Ա. Ամիրյանն ավելացրեց, որ Հանրային ռադիոն մայիսի 7-ը կնշի իր ավանդական դարձած հանդիպումներով և համերգով:

Նախորդող հրապարակում՝
Հանրային ռադիոն և մշակութային օջախ է, և դասական լրատվամիջոց. Արմեն Ամիրյան