«Հատուկ հրաման եմ արձակելու՝ բոլոր ներկա վետերանները մինչև հաղթանակի 75-ամյակը ողջ-առողջ լինեն ու ոչ մեկի գլխից մազ չպակասի»
«Դուք՝ ձեր միլիոնավոր ծառայակից ընկերների հետ, ռազմի դաշտում ապացուցեցիք ձեր խիզախությունն ու հայրենասիրությունը: Դուք ոչ միայն 70 տարի առաջ ձեռքբերած հաղթանակով խաղաղություն պարգևեցիք հետագա սերունդներին, այլև Հայրենիքի նկատմամբ ունեցած պարտքի զգացմամբ ու ռազմական գործի Ձեր փորձով օրինակ դարձաք մեր ժողովրդի հաջորդ սերունդների համար, ովքեր արդեն անկախության շրջանում կռեցին մեկ այլ հաղթանակ՝ մայիսի 9-ը՝ Հաղթանակի օրը դարձնելով հայ ժողովրդի գոյամարտի սխրանք-խորհրդանիշ»: Այս մասին նշել է ՀՀ աշխատանքի և սոցիալական հարցերի նախարար Արտեմ Ասատրյանը՝ Հայրենական Մեծ պատերազմում հաղթանակի 70-ամյակի կապակցությամբ ՀՀ վետերանների միավորում այցի ժամանակ:
Աշխատանքի և սոցիալական հարցերի նախարարության հասարակայնության հետ կապերի բաժնից հայտնում են, որ վետերանները ջերմ զրույցի ընթացքում նախարարի հետ կիսվել են իրենց սոցիալական խնդիրներով, մտահոգող հարցերով, երախտիքի խոսքեր հայտնել նախարարին՝ նկատելով, որ Արտեմ Ասատրյանն երկրորդ նախարարն է, ով երբևէ այցելել է վետերանների միավորում և հետևողական է եղել իրենց խնդիրներին:
Իր հերթին նախարարն երախտագիտություն է հայտնել ջերմ խոսքերի համար և վստահեցրել, որ նրանց սոցիալական խնդիրները գտնվում են ՀՀ կառավարության մշտական ուշադրության ներքո:
«Մայիսի 1-ից արդեն մեր վետերանները կրկնակի չափով կստանան պատվովճարներ: Բացի այդ, ինչպես յուրաքանչյուր տարի, այս տարի ևս շուրջ 50 վետերանի տրվել է առողջարանային ուղեգիր: Ունենք նաև խնամքի և սպասարկման սոցիալական ծառայություններ, առողջապահության ոլորտում են ծրագրեր իրականացվում, որոնք լինելու են շարունակական»,- տեղեկացրել է նախարարը:
«Հատուկ հրաման եմ արձակելու, որ բոլոր ներկա վետերանները մինչև հաղթանակի 75-ամյակը ողջ-առողջ լինեն ու ոչ մեկի գլխից մազ չպակասի»,- վերջում կատակել է միավորման նախագահ Սիմոն Եսայանը:
Վետերանների հետ հանդիպումը զարդարել էր նաև 70-ամյակին նվիրված խորհրդանշական տոնական տորթը, որը նախարարը պատիվ է ունեցել կիսելու 93-ամյա Ռոզալիա Լալայանի հետ:
Հանդիպման ավարտին նախարար Արտեմ Ասատրյանը վետերանների միավորմանը նվիրել է շախմատի և նարդու զարդանախշ խաղատախտակ, ինչի առիթով վետերանները նախարարին հրավիրել են նարդու մենամարտի: Արտեմ Ասատրյանը մրցել է 92-ամյա տիկին Անիկի հետ:
Հաղթանակի օրվան նվիրված շրջայցի հաջորդ կանգառը Նորքի տուն-ինտերնատն էր, որտեղ հավաքվել էին նախարարության ենթակայության տակ գտնվող տուն-ինտերնատներում բնակվող վետերանները:
Նախարարը ջերմ շնորհավորեց ներկաներին՝ մաղթելով նրանց քաջառողջություն և խաղաղություն:
Տուն-ինտերնատի վետերաններին նվերներով շնորհավորելու էին եկել նաև «Հայաստանի էլեկտրական ցանցեր» ՓԲԸ-ի ներկայացուցիչները, Նորք-Մարաշ վարչական շրջանի ղեկավար Վարազդատ Մկրտչյանը և ներկայացուցիչներ՝ քաղաքապետարանից:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում