Գիտության և արվեստի ներկայացուցիչներն արժանացան ՀՀ նախագահի 2014 թ. մրցանակներին
Այսօր ՀՀ նախագահի նստավայրում տեղի ունեցած մրցանակաբաշխության ժամանակ մրցանակներ շնորհվեց տարբեր ոլորտներում՝ գիտությունից մինչև մշակույթ, ներդրում ունեցած անձանց:
Նշենք, որ նախագահ Սերժ Սարգսյանը մրցանակներ հանձնեց նաև Հայոց Ցեղասպանությունը վերապրած 23 կանանց և այն մարդկանց ովքեր անձնվիրաբար մարդասիրական օգնություն են տրամադրել հայերին:
Մրցանակները և դրամական պարգևը մրցանակակիրներին հանձնեցին նախագահ Սերժ Սարգսյանը և «Ռոբերտ Պողոսյան և որդիներ» հիմնադրամի ներկայացուցիչ, սփյուռքահայ բարերար Ռոբերտ Պողոսյանը:
Տեխնիկական գիտությունների և ինֆորմացիան տեխնոլոգիաների բնագավառում «Նոր սերնդի օպտիկական տարրի հիման վրա ստեղծված սպեկտրաբևեռաչափ աշխատանքի» համար մրցանակի արժանացան Հակոբ Մարգարյանը, Նունե Հակոբյանը, Դավիթ Հովհաննիսյանը, Տիգրան Սարգսյանն ու Վալերի Աբրահամյանը:
Արվեստի բնագավառում այս տարի մրցանակ շնորհվեց «Անդին. Հայոց ճանապարհորդության տարեգրություն» ֆիլմին ու Տիգրան Չուխաջյանի «Կարինե» օպերետը: Ֆիլմի համար մրցանակի արժանացան Ռուբեն Գասպարյանը, ով իր խոսքում նշեց, որ չորս տարի առաջ են սկսել այս ֆիլմի վրա աշխատանքը, նպատակ ունենալով ցույց տալ հարուստ հայկական պատմությունը ոչ միայն Հայաստանի ներսում, այլև դրա սահմաններից դուրս. «Անհավատալի է, որ մենք կարողացանք ստեղծել այս աշխատանքն ու հասնել սրան»:
«Կարինե» օպերետի մրցանակ շնորհվեց Երվանդ Ղազանչյանին, Լալա Պուլուզյանին, Ավետիք Խալաթյանին, Արսեն Գևորգյանին և Վահագն Մարգարյանին:
Երվանդ Ղազանչյանն իր շնորհակալան խոսքում ասաց. «Դժվարանում եմ գնահատել այս մրցանակը: Սա թատրոնի մրցանակն է և սա է որոշելու, որ վաղն ավելի հետաքրքրական լինենք»:
Ղազանչյանը նաև շնորհակալություն հայտնեց երկրի ղեկավարին՝թատրոնի դահլիճի նորոգման համար տրամադրած աջակցության համար:
Բժշկագիտության բնագավառում մրցանակի են արժանացան երկու աշխատանքային խմբեր:
Հովհաննես Սարկավագյանը, Տիգրան Խաչատրյանն և Արմեն Խանոյանը արժանացան «Շնչափողի սպիական նեղացման վերականգնողական և վերակառուցողական վիրաբուժական բուժման ներդրումը Հայաստանում» աշխատանքի համար մրցանակի:
«Հայաստանի քրոնիկ երիկամային անբավարարությամբ տառապող հիվանդների ֆիզիկական և սոցիալական ռեբիլիտացիայի երկարատև ուղին. Հայկական առաջին տրանսպլանտ խաղերը» աշխատանքի համար մրցանակ շնորհվեց Արա Բաբլոյանին, Աշոտ Սարգսյանին, Սահակ Առաքելյանին, Խաչատուր Քյուրքչյանին և Հելեն Նազարյանին:
«Սա մեր քսան տարվա աշխատանքի արդյունք է, որը փրկում է մարդու կյանքն ու վերադաձնում կյանքի որակը»,-իր շնորհակալական խոսքում նշեց Արա Բաբլոյանը:
Ֆիզիկայի բնագավառում մրցանակի արժանացան Խաչատուր Ներկարարայանն ու Արսեն Բաբաջանյանը «Մակերևութային պլազմոն պոլարիտոնների գրգռման և տարածման առանձնահատկությունները նանոկառուցվածքներում» գիտական հոդվածաշարքի համար:
Գրականության բնագավառում Զավեն Բոյաջյանն արժանացավ մրցանակի՝ Ումբերտո Էկոյի «Վարդի անունը» վեպը իտալերենից հայերեն թարգմանելու համար ունեցած մեծ վաստակի համար:
Այս տարի մրցանակներ չտրվեց բնական և հումանիտար գիտությունների զարգացման ոլորտում:
Երկրի ղեկավարը շնորհեց նաև ՀՀ Նախագահի 2014թ. երիտասարդական մրցանակներ:
Արվեստի բնագավառում մրցական տրվեց Մանվել Ղալաջյանին՝ «Երևանի գեղարվեստի պետական ակադեմիայի առօրյան» օֆորտների շարքի համար, Արևիկ Արոյանին՝ «Գևորգյան ճեմարանի սաները» կտավի համար և Արեն Մալաքյանին՝ «Աղջիկը լուսնի վրա» վավերագրական ֆիլմի համար:
Դասական երաժշտության բնագավառում «Երգեցողության» անվանակարգում Մարիամ Մկրտչյանն ու Անդրանիկ Մալխասյանը նախագահի մրցանակի արժանացան բարձր կատարողական արվեստի համար:
Դասական երաժշտության բնագավառում «Գործիքային կատարում» անվանակարգում Սերգեյ Աբրահամյանը (կլառնետ), Շողեր Հովհաննիսյանն (դաշնամուր) ու Արտավազդ Համբարյանը (դաշնամուր) մրցանակի արժանացան լավագույն կատարման համար:
Գրականության բնագավառում այս տարի մրցանակակիր չի եղել:
Նախորդող հրապարակումներ՝
ՀՀ նախագահի մրցանակ շնորհվեց Ցեղասպանությունը վերապրած և ՀՀ-ում բնակվող 23 կանանց
Սա է հայ ժողովրդի պատասխանը մեզ ոչնչացնել ու վերացնել ծրագրողներին. ՀՀ Նախագահ
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին