Ձեր վստահելի աղբյուրը

Ազգային ժողովի ԲՀԿ խմբակցության պատգամավոր Միքայել Մելքումյանն այսօր խորհրդարանում ՀՀ աշխատանքի և սոցիալական հարցերի նախարար Արտեմ Ասատրյանից հետաքրքրվեց, վերջերս բավականին հնչեղություն ստացած արտագնա աշխատողների հետ կապված օրենքից:

«Եթե արտագնա աշխատողը հաշվառվում է, բայց միաժամանակ նպաստառու ընտանիք է, այդ ընտանիքը զրկվո՞ւմ է նպաստից, թե՞ նպաստը պահպանվում է»,- հարցրեց Մ.Մելքումյանը:

Նախարարը նշեց, որ ընտանիքների անապահովության միավորը հաշվարկվում է տարբեր կոմպոնենտներից ելնելով, այդ թվում՝ եկամուտ կա, թե ոչ:

«Եկամուտը մենք պարզում ենք հարկային մարմնի կողմից տեղեկատվական համակարգի միջոցով, այսինքն, եթե ոչ ֆորմալ եկամուտ կա, որը չի երևում որևէ կերպ, որ անձը զբաղված է, բացի այն, որ սոցիալական աշխատողը կարող է որևէ կերպ բացահայտել, ապա այդ եկամուտը չի երևում և ազդեցություն չի ունենա, իսկ եթե ֆորմալ եկամուտ է և տեղեկատվական համակարգում գրանցված է, դա բնականաբար ազդեցություն կթողնի»,- նշեց Ա.Ասատրյանը:

Նրա խոսքերով՝ եթե տվյալ ընտանիքը եկամուտ ունի, պարզ է, որ գումարը պետք է տրվի ավելի անապահով ընտանիքներին:

«Հարցեր կան, որոնք պետք է ճշգրտվեն, որպեսզի հստակեցվի տվյալ ընտանիքների յարգավիճակը»,- նշեց նա:

Մ.Մելքումյանն ասաց, որ սա իսկապես խնդիր է:

«Մարդը գնում է աշխատելու, մինչև այդ օրենքի ընդունումը գնում աշխատում է, բայց հաշվառված չէ, ռեզիդենտ չէ, ոչ մի տեղ չի երևում ՀՀ-ի հարկային համակարգում, հիմա գրանցվում է, այդ կազմակերպությունը շինարարական հաշվետվություն է տալու, և տեսնելու են, որ մեր հայրենակիցը եկամուտ է ստանում, եկամտահարկը գնալու է բյուջե, ու տեսնելու են՝ նպաստ ստանալու է, թե ոչ, լուրջ խնդիր է՝ մարդիկ ստանալու են, թե ոչ: Մարդիկ պետք է իմանան»,- նշեց ԲՀԿ-ական պատգամավորը: