Ձեր վստահելի աղբյուրը

Հուլիսի 8-12-ը Երևանում տեղի կունենա «Ցեղասպանագետների միջազգային ընկերակցության» 12-րդ համաժողովը` «20-րդ դարի ցեղասպանությունների համեմատական վերլուծություն» խորագրի ներքո: Համաժողովին մասնակցելու է 130 մասնագետ շուրջ 30 երկրից: Մասնակից երկրների աշխարհագրությունը շատ մեծ է՝ Ավստալիայից մինչև Բրազիլիա: Լրագրողների հետ հանդիպման ժամանակ ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը:

Նա հայտնեց, որ համաժողովին Հայոց ցեղասպանությանը վերաբերող զեկույցները շատ են լինելու. «Նախկինում համաժողովների ժամանակ լինում էին 4-5 զեկույց, այս տարի շուրջ քսանի է հասնում այդ թիվը»:

Թանգարան-ինստիտուտի տնօրենը կարևորեց Երևանում անցկացվելիք գիտաժողովը մի քանի առումով՝ շարունակվում են Հայոց ցեղասպանության 100-րդ տարելիցին նվիրված միջոցառումները, ցեղասպանագիտության ուսումնասիրության ոլորտում նման ծավալի գիտաժողով երբևէ Հայաստանում չի եղել:

Ասուլիսին ներկա գիտաժողովի կազմկոմիտեի նախագահ Դոննա-Լի Ֆրիզի խոսքով, գիտաժողովը ցեղասպանության մասին հանրային իրազեկվածության բարձրացման ամենաարդյունավետ միջոցն է. «Սա, թերևս ամենալավ ձևն է, որով մարդիկ կճանաչեն և կխոսեն ցեղասպանության մասին: Վերջին տարիներին մենք ունեցել ենք Հայոց ցեղասպանության մասին բազմաթիվ աշխատություններ և այս համաժողովը կարող է նոր սկզբնակետ դառնալ հանրային իրազեկման համար»:

Գիտաժողովը նվիրվում է Հայոց ցեղասպանության 100-րդ, ինչպես նաև Երկրորդ համաշխարհային պատերազմի և Հոլոքոստի 70-րդ տարելիցներին:

1997 թ. Ցեղասպանագետների միջազգային ընկերակցությունը ճանաչել է Հայոց ցեղասպանությունը, իսկ 2010 թ. ստացել ՀՀ նախագահի` Հայոց ցեղասպանության ճանաչման գործում նշանակալի ավանդի համար շնորհվող մրցանակ:

«Ցեղասպանագետների միջազգային ընկերակցությունը» (International Association of Genocide Scholars) ցեղասպանությունները և մարդկության դեմ կատարված հանցագործություններն ուսումնասիրող գիտնականների առաջատար և խոշորագույն միավորումն է: Այն ստեղծվել է 1994 թ. հայտնի ցեղասպանագետներ Իսրայել Չառնիի (Israel Charny), Հելեն Ֆայնի (Helen Fein), Ռոբերտ Մելսոնի (Robert Melson) և Ռոջեր Սմիթի (Roger Smith) կողմից և այսօր միավորում է ավելի քան 500 գիտնականի աշխարհի տարբեր երկրներից: Ընկերակցության նպատակն է հետազոտել և ուսուցանել աշխարհում տեղի ունեցած ցեղասպանությունների պատճառները` կանխարգելելու համար ցեղասպանությունների կրկնումն ապագայում: Հայոց ցեղասպանությունը մշտապես գտնվում է Ցեղասպանագետների միջազգային ընկերակցության անդամների ուսումնասիրության կենտրոնում: