Ձեր վստահելի աղբյուրը

«Газета.Ru»-ն ներկայացրել է հուլիսին լույս տեսած 5 կարևոր գրքերի ցանկը:

Դրանք են.

1.Ալեքսեյ Ցվետկով. «Маркс, Маркс левой!»
Գրքի հեղինակը մասնակցել է «Фалансер» գրական հանդեսի ստեղծման աշխատանքներին, եղել է «Лимонка»-ի պատասխանատու քարտուղարը և կազմել է ձախ ռադիկալիզմի ու ժամանակակից անարխիզմի անտալոգիան: 2014թ-ին Ցվետկովը արժանացել է Անդրեյ Բելովի գրական մրցանակին և «НОС» մրցանակին «Король утопленников» ժողովածուի համար: «Маркс, Маркс левой!» գիրքը սկսվում է խորհրդային փիլիսոփաներ Իլյենկովի և Բոգդանովի, ահաբեկիչ Նաչաևի մասին փոքրիկ էսսեներվ, Լենինի մասին մի քանի գրառումներով, ապա հաջորդում են հրապարակախոսական և ինքնակենսագրական հոդվածներ, ակնարկներ, որոնք բացահայտում են «Большой город» քաղաքական հանդեսի, «Голодные игры» ֆիլմի և ժամանակակից պոեզիայի քաղաքական ենթատեքստերը:

2. Թոմ Ուիլկինսոն. «Մարդիկ և աղյուսներ. 10 ճարտարապետական կառույցներ, որոնք փոխել են աշխարհը».
Գրքի հեղինակը կարծում է, որ ճարտարապետությունը արվեստի ամենաանհրաժեշտ ճյուղն է: Գրքում ընդգրկված 10 էսսեներում նա փորձել է ներկայացնել, թե ինչպես է ճարտարապետությունը փոխել մարդկային գիտակցությունը և հակառակը: Հնադարյան Բաբելոնյան ճարտարապետությունից Ուիլկինսոնը թռիչք է կատարում դեպի վերածննդի դարաշրջան, 1930-ականների Լոնդոնից` դեպի ժամանակից Ռիո դե Ժանեյրո:

3. Մանու Ջոզեֆ. «Լուրջ տղամարդիկ»
Լրագրող Մանու Ջոզեֆի վեպը հիմնված է երևույթների կոնտրաստավորման վրա: Աղքատ արվարձաններին հակազդում են գիտահետազոտական ինստիտուտի ընդարձակ միջանցքները, գիտնականներին, ովքեր օդապարիկի միջոցով փորձում են այլմոլորակայիններ որսալ, հակադրվում է ժողովրդի ծոցից ելած խաբեբան: Ժոզեֆը պատկերել է մի աշխարհ, որը նախատեսված է միայն հատուկ ընտրյալների, հանճարների համար, մնացած բոլորի համար սցիալական վերելակը չի գործում:

4.Ռոբերտ Ռիմինի. «ԱՄՆ-ի հակիրճ պատմությունը»
Ռիմնին իր գիրքը գրել է 2008թ-ի նախագահական ընտրությւոնների ժամանակ, երբ Բարաք Օբաման եկավ իշխանության: Հենց այս իրադարձությունից է սկսվում նրա պատմությունը, ոչ թե «Նոր աշխարհի» բնակեցման գործընթացից: Հեղինակը գրքում ներկայացրել է ԱՄՆ-ի զարգացման փուլերը, ցույց է տվել հանրապետությունից դեմոկրատիայի անցման գործընթացը և իր պատմությունը հասցրել է մինչև 2008թ-ը` ցույց տալով ամերիկացու կերպարի ձևավորման ընթացքը մի հասարակությունում, որտեղ փողը դարձել է սոցիալական հիմնական շարժիչ ուժը:

5.Ուոլտեր Այզեկսոն. «Իննովատորները»
Լրագրող Ուոլտեր Այզեկսոնը, ով Սթիվ Ջոբսի, Հենրի Քիսինջերի և Ալբերտ Էյնշտեյնի կենսագրականների հեղինակն է, հարցադրում է կատարում, թե արդյոք ճիշտ է միանշանակ կերպով գերագնահատել գյուտարարի անձը, եթե հայտնագործությունը թիմային աշխատանքի արգասիք է: Հրաժարվելով կուռքեր ստեղծելուց` Այզեկսոնը փորձել է ցույց տալ, որ համակարգիչներն ու ինտերնետը չեն հնարել միայնակ հանճարները: Նա ուշադրություն է հրավիրում պետության կողմից ապահովվող սոցիոմշակութային նյուանսների և հաքերների, գյուտարարների ու ձեռներեցների համատեղ աշխատանքի վրա: