Վանի քաղաքապետ. Պատրաստակամ ենք խորացնելու Երևանի հետ կապը
Վանի համաքաղաքապետ Հաթիջե Չոբանը կարևորում է մարզական և մշակութային ոլորտում համագործակցությունն ու դրա ընդլայնումը: Այս մասին նա հայտարարել է Երևանի քաղաքապետ Տարոն Մարգարյանի և Համահայկական 6-րդ խաղերին մասնակցելու նպատակով պաշտոնական պատվիրակությունների կազմում Երևան ժամանած մի շարք քաղաքների քաղաքապետերի և քաղաքային իշխանությունների ներկայացուցիչների հետ հանդիպման ժամանակ:
«Ինչպես իմ, այնպես էլ այստեղ ներկա Դիարբեքիրի ու Բիթլիսի քաղաքապետերի անունից ուզում եմ վստահեցնել Ձեզ, պարոն քաղաքապետ, որ մենք պատրաստակամ ենք խորացնելու Երևանի հետ մեր քաղաքների ու բնակիչների կապը՝ այդպիսով նաև փաստելով, որ մեր ժողովուրդներն իրոք կարող են լինել լավ բարեկամներ: Մենք հստակ գիտակցում ենք, որ անցյալի որոշ դաժան իրադարձություններն իրենց հետքն են թողել: Բայցև պետք է ամրագրենք, որ դա տվյալ ժամանակի իշխանությունների հանցանք է եղել, այլ ոչ թե այսօրվա սերնդի, որն իրոք պատրաստ է հարևանների հետ անկեղծ ու անշահախնդիր բարեկամության»,-ասել է Վանի համաքաղաքապետը:
Քաղաքապետարանի հասարակայնության հետ կապերի վարչության փոխանցմամբ, Երևանի քաղաքապետը կարևորել է Համահայկական խաղերի անցկացումը և խաղերի մասնակից երկրների ու քաղաքների տարեցտարի ընդլայնվող աշխարհագրությունն ու պատվիրակությունների քանակը. «Այն, ըստ էության, մարզական մեծ տոն է, որը փոխադարձ կապերն ու գործակցությունը ընդլայնելու, աշխարհասփյուռ մեր հայրենակիցներին մեկտեղելու, միմյանց հետ կիսվելու, մեկս մյուսի հաջողություններով ուրախանալու հրաշալի առիթ է ընձեռում»:
Տ. Մարգարյանը հանդիպման բոլոր ներկաներին հրավիրել այս տարվա հոկտեմբերին կրկին այցելել Երևան՝ մասնակցելու «Էրեբունի-Երևան 2797» տոնակատարություններին:
Այնճարի քաղաքապետ Կարապետ Փամբուկիանն էլ նշել է, որ Այնճարը, որպես բացառապես մուսալեռցիների ժառանգներով բնակեցված քաղաք, առանձնակի հպարտությամբ է մասնակցում այս խաղերին. «Խորհրդանշական է, որ այս տարի խաղերը համընկան Ցեղասպանության 100-րդ տարելիցին: Այս տարի նաև Մուսա լեռան հերոսամարտի 100-ամյակն է, ու այդ առթիվ մենք հատուկ միջոցառումներ ենք նախատեսել անցկացնել»:
Համահայկական խաղերի վերաբերյալ այլ հրապարակումներ՝
Համահայկական խաղերի ողջ ընթացքում կհերթապահի շտապօգնության ծառայությունը
Համահայկական խաղեր. Լավագույն եռյակը կազմել են երևանցիները
Սերժ Սարգսյան. «Բոլորս կապված ենք մեկ ընդհանրությամբ` հայկական ինքնությամբ»
Մարզիկների անունից երդվեց Շողիկ Ավետիսյանը
Համահայկական 6-րդ խաղերի բացման արարողության մեկնարկը տրված է
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ