Ձեր վստահելի աղբյուրը

Գարշահոտություն տարածած «Առողջ սունկ» ընկերության Բյուրեղավանի մասնաճյուղի գործունեությունը դադարեցնելու վերաբերյալ որոշում է կայացվել:

Բնապահապանության նախարարության պաշտոնական էջից Panorama.am-ը տեղեկացավ`  ութօրյա ստուգումների արդյունքում պարզվել է, որ ընկերության ամիակի միանգամյա արտանետումների չափաքանակները գերազանցում են թույլատրելի նորմերը, ինչը «Մթնոլորտային օդի պահպանության մասին» ՀՀ օրենքի 15-րդ հոդվածի պահանջների խախտում է: Ընկերության տնօրենը ենթարկվել է վարչական տուգանքի:

Նախարարությունից մանրմասնում են, որ «Առողջ սունկ» ՍՊԸ–ում ծրագրային ստուգում իրականացվել է 2014թ. հուլիսի 21 –ից օգոստոսի 8-ն ընկած ժամանակահատվածում` ՀՀ բնապահպանության նախարար Արամայիս Գրիգորյանի կողմից տրված թիվ 000101 հանձնարարագրի հիման վրա: Ստուգման արդյունքում ՍՊԸ տնօրեն Ս. Դավթյանը ենթարկվել է վարչական տուգանքի /խախտվել էին «Մթնոլորտային օդի պահպանության մասին» ՀՀ օրենքի 15-րդ հոդվածի և «Ջրային օրենսգրքի» 21-րդ հոդվածի պահանջները: Տրվել էր նաև հանձնարարական` կոմպոստի արտադրությունից առաջացող գարշահոտությունը վերացնելու նպատակով կատարել անհրաժեշտ աշխատանքներ` համաձայն ընկերության տնօրենի կողմից կազմված միջոցառումների ծրագիր- ժամանակացույցի /2 ամիս ժամկետով/: Ստուգման արդյունքում նաև հանձնարարական էր տրվել գարշահոտությունը վերացնելու նպատակով մշտապես հսկողություն սահմանել մաքրող սարքավորումների /ֆիլտրերի/ անխափան աշխատանքների իրականացման նկատմամբ:

2-րդ ստուգումն իրականացվել է ՀՀ բնապահպանության նախարարի թիվ 000173 հանձնարարագրի հիման վրա 2014թ. հոկտեմբերի 21-ից նոյեմբերի 7-ը` նախորդ ստուգման արդյունքում տրված հանձնարարականի պահանջների կատարման ընթացքը ստուգելու նպատակով: Պարզվել է, որ ընկերությունը կատարել էր նշված աշխատանքները և հարակից տարածքի բնակիչների մեկնաբանմամբ` գարշահոտությունը գրեթե վերացել էր, ինչը նաև հաստատվել է բնակիչների ստորագրությամբ:

3-րդ ստուգումը «Առողջ սունկ» ՍՊԸ-ում իրականացվել է Բյուրեղավան համայնքի ղեկավարի 22.07.2015թ. գրավոր տեղեկատվությամբ պահանջվող հարցերի պարզաբանման նպատակով` ՀՀ բնապահպանության նախարարի կողմից նույն օրը տրված` թիվ 000128 հանձնարարագրի հիման վրա: Ստուգումը տևել է հուլիսի 22 – հուլիսի 30-ը: Լաբորատոր չափագրումների արդյունքում պարզվել է, որ ամիակի միանգամյա արտանետումների չափաքանակները գերազանցում են ՍԹԱ թույլտվությամբ տրված նորմերը, ինչը «Մթնոլորտային օդի պահպանության մասին» ՀՀ օրենքի 15-րդ հոդվածի պահանջների խախտում է: Ընկերության տնօրեն Ս. Դավթյանը ենթարկվել է վարչական տուգանքի: Խախտվել են նաև «Լիցենզավորման մասին» ՀՀ օրենքի պահանջները /նշված գործունեությունը ենթակա է լիցենզավորման/: ՀՀ Բնապահպանության նախարարության Բնապահպանական պետական տեսչության պետի կողմից 30.07.2015թ. որոշում է ընդունվել «Առողջ սունկ» ՍՊԸ Բյուրեղավանի մասնաճյուղի գործունեությունը դադարեցնելու վերաբերյալ: