15 սահմանամերձ համայնքների դպրոցներում դասագրքերի վարձերը զեղչվել են շուրջ 70 տոկոսով. Արմեն Աշոտյան
ՀՀ կառավարությունը քայլեր է ձեռնարկել սահմանամերձ համայնքների դպրոցական երեխաներին դասագրքերով ապահովելու համար: Այս մասին այսօր Ազգային ժողովում կառավարության հետ հարց ու պատասխանի ժամանակ հայտարարեց ՀՀ կրթության և գիտության նախարար Արմեն Աշոտյանը՝ պատասխանելով ԲՀԿ խմբակցության քարտուղար Վահե էնֆիաջյանի հարցին, որ Տավուշի մարզի Բերքաբեր համայնքի միջնակարգ դպրոցում, որտեղ 375 աշակերտ կա, դասագրքերի հետ կապված խնդիրներ կան:
«Գիտենք, որ դասագրքերը վաճառվում են, սակայն այդ համայնքում դժվար են վճարում, քանի որ սոցիալական վիճակը վատ է, գյուղատնտեսությունը ակտիվ չի զարգանում, քանի որ դաշտերն ու այգիները կրակահերթի տակ են, արդյոք հնարավոր չէ այդ գյուղում այդ հարցը կարգավորել»,- ասաց Վ.Էնֆիաջյանը:
Նախարարի խոսքերով՝ 15 սահմանամերձ համայնքների դպրոցներում դասագրքերի վարձերը զեղչվել են շուրջ 70 տոկոսով, այդ թվում՝ նաև Բերքաբերում: «Ցավոք, մենք չենք կարող բոլոր սահմանամերձ համայնքներում նման քաղաքականություն իրականացնել՝ ֆինանսական դժվարությունների պատճառով, սակայն կփորձենք հաշվարկների արդյունքում ինչ-որ լուծումներ գտնել»,- ընդգծեց Ա.Աշոտյանը:
Նա միաժամանակ նշեց, որ մեկ աշակերտի դասագրքերի համար տարեկան ծախսվում է մոտ 6000 դրամ:
Ա.Աշոտյան նաև հայտնեց, որ սահմանամերձ համայնքների դպրոցներում իրականացվում է աշակերտական և ուսուցչական նոր գույքով, ինչպես նաև համակարգիչներով հագեցնելու ծրագիր:
Նախարարն անդրադառնալով այլ ծրագրերին, նշեց, որ, մասնավորապես, այսօր արդեն սահմանամերձ համայնքների 176 ուսանող ստացել են առաջին կիսամյակի ուսման վարձերի փոխհատուցում: «ԿԳ նախարարությունը բոլոր պետական բուհերի ռեկտորներին հանձնարարել է, որպեսզի սահմանապահ համայնքների առաջին կուրսի ուսանողների համար ուսման վարձի 10 տոկոս զեղչ կիրառվի, իսկ բարձր կուրսերի լավ սովորող ուսանողների դեպքում՝ 20%: Մենք փորձում ենք հոգալ կրթական բոլոր կարիքները, որոնք գալիս են այդ համայնքներից»,- նշեց Ա.Աշոտյանը:
ԿԳ նախարարը նաև հավելեց, որ սահմանամերձ համայնքներում կառավարությունը նախատեսում է բացել նոր նախակրթարաններ՝ 5-6 տարեկան երեխաների համար: