Ձեր վստահելի աղբյուրը

«Հայաստանում և պետական, և մասնավոր հատվածում աշխատողների աշխատանքային իրավունքները որևէ ձևով պաշտպանված չեն, նրանք ամեն րոպե դողում են, որ կարող են կորցնել աշխատանքը»: «Մեդիա կենտրոնում» Արժանապատիվ աշխատանքի միջազգային օրվան նվիրված «Աշխատանքային իրավունքի խախտման դեպքերը և գործող օրենսդրությունը» թեմայով քննարկմանն ասաց Հայաստանի Հելսինկյան կոմիտեի նախագահ Ավետիք Իշխանյանը:

Նա նշեց, որ իրենց հետազոտությունների համաձայն, ՀՀ-ում առանց պայմանագրերի են աշխատում հիմնականում տաքսի ծառայություններում, փաբերում, ռեստորաններում:

«Եթե պայմանագիր չկա, նշանակում է անօրինական աշխատանք է օրական աշխատավարձով: Շատ դեպքերում պայմանագրերը ձևական բնույթ են կրում»,- ասաց նա:

Քննարկմանը ներկա Հայաստանի արհմիությունների կոնֆեդերացիայի իրավաբանական բաժնի պետ Միքայել Փիլիպոսյանը ողջունեց Աշխատանքային օրենսգրքում վերջին կատարված փոփոխությունները՝ նշելով, որ այն հնարավորություն կտա այդ դաշտում առկա մի շարք խնդիրներ լուծել:

Նա ասաց, որ իրենց հիմնականում դիմում են աշխատանքի ընդունման, ազատման պայմանագրերի հետ կապված խնդիրներով:

«Մենք միջնորդություններ ենք ներկայացնում տվյալ գործատուներին՝ նշելով, որ օրենքի տվյալ դրույթը խախտված է, պետք է շտկել: Շատ դեպքերում գործատուն շտկում է՝ հասկանալով, որ հակառակ դեպքում կդիմենք դատարան»,- ասաց Մ. Փիլիպոսյանը:

Նա նշեց, որ այս տարվա հունվարին շահել են մեկ դատական գործ, ինչի արդյունքում տվյալ աշխատողը վերականգնվել է իր աշխատատեղում և ստացել հարկադիր պարապուրդի գումարը:

Հայաստանի գործատուների հանրապետական միության փոխնախագահ, սոցիալական գործընկերության հարցերով փորձագետ Շուշանիկ Բարսեղյանն իր խոսքում նշեց, որ Հայաստանը դեռևս հեռու է յուրաքանչյուրին արժանապատիվ աշխատանքով ապահովելուց:

ՀՀ առողջապահության նախարարի խորհրդական Վարազդատ Դանիելյանն ասաց, որ Հայաստանն ընտրել է մի ճանապարհ, որտեղ կարող է վերահսկողություն լինել միայն աշխատանքի անվտանգ և առողջ պայմանների հարցում, մնացած աշխատանքային հարաբերությունները դիտարկվում են որպես աշխատանքային պայմանագրի հիման վրա ծագած հարաբերություններ: Ըստ մոտեցման և հայեցակարգի, խնդիրը կարող է լուծվել միայն դատական կարգով:

Վ. Դանիելյանն ասաց, որ սահմանադրական փոփոխությունների նախագծում շատ կարևոր դրույթ կա, որով առաջին անգամ Սահմանադրության մեջ հստակորեն սահմանված է քաղաքացիների վարչական կարգով իրավունքի պաշտպանության ինստիտուտը. «Այսինքն՝ ոչ միայն դատական կարգով, այլ սահմանադրությամբ երաշխավորվում է քաղաքացիների իրավունքների պաշտպանությունը վարչական կարգով: Իսկ շատ կարևոր իրավունքներից մեկը աշխատանքային իրավունքն է»:

Նրա խոսքով, սահմանադրական այդ նորմի կիրառումն ապահովելու համար պետք է ընդունվեն օրենքներ:

ՀՀ աշխատանքի և սոցիալական հարցերի նախարարության աշխատանքի և զբաղվածության վարչության աշխատանքի բաժնի պետ Ժոռա Սարգսյանն ասաց, որ իրենց հիմնականում դիմում են հետևյալ բողոքներով՝ գործատուների կողմից վնասների հատուցան գումարը չի վճարվում, աշխատանքից ազատվելու դեպքում աշխատանքային գրքույկը չի վերադարձվում, վերջնահաշվարկի, ամենամյա արձակուրդի հետ կապված խնդիրներ, առանց օրինական հիմքերի աշխատանքային պայմանագրի լուծում: Նա նշեց, որ խնդիրները բավականին շատ են, ապա տեղեկացրեց, որ հոկտեմբերի 22-ից ուժի մեջ է մտնում Աշխատանքային օրենսգրքի լրացումների մասին օրենքը:

«Սա ևս մեկ քայլ առաջ է աշխատողի, գործատուների համար իրավունքների, պարտականությունների սահմանման, պաշտպանման տեսանկյունից»,- ասաց Ժ. Սարգսյանը: