Ձեր վստահելի աղբյուրը

2015-ի երկրորդ եռամսյակում Հայաստան է ժամանել ավելի քան 256 հազար զբոսաշրջիկ, ինչը 2014-ի նույն ժամանակաշրջանի համեմատ 1,8%-ով ավելի է: Այս մասին այսօր լրագրողների հետ հանդիպման ժամանակ ասաց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը՝ հավելելով, որ դեռևս 2015թ-ի երրորդ եռամսյակի վիճակագրական տվյալները հայտնի չեն:

Նրա խոսքերով՝ 2014թ-ին Հայաստան է ժամանել 1 մլն 203 հազար զբոսաշրջիկ, ինչը 2013թ-ի համեմատ 11.3%-ով ավելի է:
Մ.Ապրեսյանը հույս հայտնեց, որ 2015թ-ի երրորդ եռամսյակում, ինչպես նաև տարեկան ցուցանիշը ավելի գոհացուցիչ կլինի, քանի որ, ըստ նրա, անզեն աչքով անգամ երևում է զբոսաշրջային աշխուժությունը։

Նա նշեց, որ հիմնականում Հայաստան են ժամանում ՌԴ-ից, Վրաստանից, ԵՄ երկրներից, Իրանից, ԱՄՆ-ից, Հայաստանի նկատմամբ սկսել են հետաքրքրություն ցուցաբերել Կորեայից, Թայլանդից, Ինդոնեզիայից, Մալազիայից, Չինաստանից, Ճապոնիայից, ինչպես նաև Լատինական Ամերիկայից։

Զբոսաշրջության պետը նշեց, որ վերջին տարիներին մեր երկրում անցկացվող փառատոնները ևս նպաստում են Հայաստանի, հայկական արտադրանքի զբոսաշրջային արդյունքի բարձրացմանը, այսինքն՝ զարգանում է փառատոնային զբոսաշրջությունը:

Ըստ նրա` փորձը ցույց է տալիս, որ հատուկ այդ փառատոններին մասնակցելու համար զբոսաշրջիկներ են գալիս Հայաստան: «Կան մի քանի փառատոններ, որոնք գնալով ավելի մեծ տարածում են գտնում թե՛ Հայաստանում, թե՛ Հայաստանից դուրս։ Վերջերս Արենիում կազմակերպված գինու փառատոնին մասնակցում էին բազմաթիվ զբոսաշրջիկներ տարբեր երկրներից: Ուրախալի է, որ այն նպատակը, որ դրված էր ի սկզբանե՝ փառատոնները դարձնել ամենամյա, ներքին ու միջազգային շուկայում ճանաչելի, ապա այս փառատոններից շատերն արդեն մեծ հավակնություն ունեն և հնարավորություն են ստանում հայտնի դառնալ փառատոնների միջազգային շուկայում»,- ասաց Մ.Ապրեսյանը:

Նա նաև հայտնեց, որ զբոսաշրջային ընկերություններն արդեն հատուկ փաթեթներ են վաճառում իրենց զբոսաշրջիկներին, որոնք ներառում են մասնակցությունը փառատոններին: Մասնավորապես, այդ փաթեթներում ընդգրկում են արդեն ավանդական դարձած Արենիում անցկացնող գինու փառատոնը, Ախթալայում կազմակերպվող խորովածի, ինչպես նաև տոլմայի փառատոնները:

«Սա նպաստում է նաև երկրի իմիջի բարձրացմանը, հնարավորություն է նոր ապրանքով երկիրը միջազգային շուկայում ներկայացնելու»,- ընդգծեց նա: