Հայաստանի հունահռոմեական ոճի ըմբշամարտի հավաքականը պատրաստվում է փետրվարի 13-14-ը Երևանի Կարեն Դեմիրճյանի անվան մարզահամերգային համալիրում կայանալիք աշխարհի գավաթի խաղարկությանը: Այսօր «Անի» հյուրանոցում զանգվածային լրատվամիջոցների ներկայացուցիչների հետ հանդիպեցին ըմբշամարտի ֆեդերացիայի գլխավոր քարտուղար Բազմասեր Առաքելյանը և հավաքականի գլխավոր մարզիչ, օլիմպիական չեմպիոն Լևոն Ջուլֆալակյանը` ներկայացնելու, թե ինչպես է մեր ընտրանին նախապատրաստվում այդ կարևորագույն մրցաշարին և ինչ կազմով է հանդես գալու:
Լևոն Ջուլֆալակյանը նախ հայտարարեց, որ Հայաստանը, որպես կազմակերպիչ երկիր, իրավունք ունի յուրաքանչյուր քաշային կարգում երկու մարզիկ ներկայացնել: Նա շեշտեց, որ ինչպես հիմնական, այնպես էլ երկրորդ թիմերը լավ մարզավիճակում են, իսկ ըմբիշները մարտականորեն են տրամադրված և ամեն ինչ կանեն` հաղթանակի հասնելու համար:
«Մնում է, որ աշխարհի գավաթի խաղարկության օրերին մարզիկները լավ տրամադրության մեջ լինեն, երկրպագուներն էլ ակտիվորեն աջակցեն նրանց, որպեսզի կարողանան գորգի վրա դրսևորել իրենց հնարավորությունների առավելագույնը: Կախված վիճակահանության արդյունքներից` կորոշենք, թե այս կամ այն թիմի հետ մրցակցությունում որ մարզիկներն են գորգ դուրս գալու»,- ընդգծեց մարզիչը:
Ստորև ներկայացնում ենք Հայաստանի հավաքականի հիմնական և երկրորդ կազմերը:

Հիմնական կազմ

55 կգ քաշային կարգ- Ռոման Ամոյան
60 կգ- Վահան Ջուհարյան
66 կգ-Արման Ադիկյան
74 կգ- Արսեն Ջուլֆալակյան
84 կգ- Դենիս Ֆորով
96 կգ- Արման Գեղամյան
120 կգ- Յուրի Պատրիկեև

Երկրորդ կազմ

55 կգ- Հարություն Հովհաննիսյան
60 կգ- Արտակ Հարությունյան
66 կգ- Հովհաննես Վարդերեսյան
74 կգ- Վարշամ Բորանյան
84 կգ- Տիգրան Սահակյան
96 կգ- Սարգիս Տոնոյան
120 կգ- Վաչագան Եղիազարյան