Մեդալների հավաքածուն ամբողջական դարձնելու համար պակասում է օլիմպիական ոսկին
«Զվարթնոց» օդանավակայանն այսօր ավելի քան մարդաշատ էր: Հայ մարզասերներն անհամբեր ու մեծ ոգևորությամբ սպասում էին Ուզբեկստանի մայրաքաղաք Տաշքենդից հայրենիք վերադարձող հայ ըմբիշներին: Թեև մեր ազատ ոճայիններն աշխարհի առաջնությունում անմասն էին մնացել խաղարկվող մեդալներից, 13 տարվա ընդմիջումից հետո հունահռոմեական ոճի ըմբշամարտի Հայաստանի հավաքականը հայրենիք էր բերում երկու ոսկե մեդալ: Պատվո հարթակի առաջին աստիճանին էին կանգնել 75 կգ քաշային Արսեն Ջուլֆալակյանն ու 98 կգ քաշային Արթուր Ալեքսանյանը:
Երբ ասպարեզում երևացին օրվա հերոսները, ոգևորությունը բազմապատկվեց: Արդեն ավանդական դարձած զուռնա-դհոլով, երգով ու պարով չեմպիոններին դիմավորելուց հետո հավաքված ժողովուրդը ձեռքերի վրա բարձրացրեց ոսկե մեդալակիրներին, որին էլ հետևեց դափնեպսակների հանձնման արարողությունը:
Առաջին անգամ չեմպիոն հռչակված Արսեն Ջուլֆալակյանն այս առաջնությունում առաջնորդվում էր հետևյալ սկզբունքով` հաղթել բոլոր մրցակիցներին:
«Առաջնությունից առաջ ընկերս խորհուրդ տվեց վայելել ըմբշամարտը, ոչ թե պարզապես գոտեմարտել: Նա ասաց, որ պետք է անեմ այն, ինչը կարողանում եմ հասարակ մարզման ժամանակ, և արդյունքը բոլորովին այլ կլինի: Այդպես էլ արեցի: Ուրախությունս մեծ է, և զգացողություններս բառերով նկարագրելն ուղղակի անհնար է: Ամեն դեպքում նման պահերին հիշում ես անցած ճանապարհդ, որը լի էր դժվարություններով, լավ և վատ պահերով: Ուրախ եմ, որ վերջապես հաղթեցի: Հիմա ինձ պակասում է միայն մեկ մեդալ` օլիմպիական ոսկին»,- ասաց Արսեն Ջուլֆալակյանը:
Տաշքենդում առաջին անգամ աշխարհի չեմպիոն դառնալու բերկրանքը վայելեց նաև 98 կիլոգրամ քաշային Արթուր Ալեքսանյանը` եզրափակչում որևէ շանս չթողնելով գերմանացի Օլիվեր Հասլերին: Ընդամենը 55 վայրկյան տևած գոտեմարտում Ալեքսանյանը հաղթեց 8:0 հաշվով:
«Վերջապես երազանքս իրականություն դաձավ: Երկար էի սպասել այս հաջողությանը: Ուրախ եմ, շատ ուրախ: Սա միայն իմ հաղթանակը չէ, այլև ողջ հայ ժողովրդի, որի աջակցությունն զգում էի անգամ մեծ հեռավորության վրա: Հաջորդ տարի կմասնակցենք աշխարհի ու Եվրոպայի հերթական առաջնություններին, սակայն հիմնական շեշտը կդնենք 2016 թ. Ռիո Դե Ժանեյրոյում կայանալիք օլիմպիական խաղերի վրա»- նշեց Արթուր Ալեքսանյանը:
1987 թ. աշխարհի չեմպիոն Լևոն Ջուլֆալակյանը, ով այժմ գլխավորում է Հայաստանի հունահռոմեական ոճի ըմբշամարտի հավաքականը, գոհ է արդյունքներից:
«Եզրափակիչ գոտեմարտերում պատասխանատվությունը մեծ է, և այստեղ շատ կարևոր դեր է խաղում հոգեբանությունը: Ուրախ եմ, որ տղաները վերջապես կարողացան հաղթահարել այն և առաջին անգամ դառնալ ոսկե մեդալակիր: Հուսով եմ, որ այս հաջողությունը շարունակական կլինի»- ասաց Լևոն Ջուլֆալակյանը:
Մնում է հավատալ, որ 2016 թ. Ռիո Դե Ժանեյրոյում կայանալիք օլիմպիական խաղերում կկարողանանք մեդալների հավաքածուն ամբողջական դարձնել: Հուսանք, որ նման ըմբիշներով համալրված Հայաստանի հավաքականը մեր երկրի մարզական պատիվը բարձր կպահի նաև Ռիոյում:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ