«Ի դեմս շախմատի, կունենանք արտահանվող արդյունք». Ա. Աշոտյան
Խ. Աբովյանի անվան հայկական պետական մանկավարժական համալսարանում տեղի է ունեցել շախմատի կրթական հետազոտությունների կենտրոնի պաշտոնական բացումը: Միջոցառմանը մասնակցել են ՀՀ ԿԳ նախարար Արմեն Աշոտյանը, ՀՀ շախմատի ակադեմիայի նախագահ Սմբատ Լպուտյանը, ԱԺ պատգամավորներ, կրթության և գիտության ոլորտի ներկայացուցիչներ:
ՀՀ կրթության և գիտության նախարար Արմեն Աշոտյանը, ողջունելով կենտրոնի բացումը, նշել է, որ նախարարությունը լիարժեք և շարունակական աջակցություն կցուցաբերի կենտրոնին: Այս մասին հայտնում է edu.am-ը:
«2009 թվականից առ այսօր Սմբատ Լպուտյանի հետ լծվել ենք «Շախմատը դպրոցում» ծրագրի իրականացմանը: Այս նախաձեռնությունը ՀՀ կրթական համակարգի լավագույն պատմություններից մեկն է: Գուցե վաղ է խոսել ծրագրի արդյունքի մասին, սակայն վստահեցնում եմ, որ կրթական նման լայնամասշտաբ նախաձեռնությունը պատիվ կբերի ցանկացած երկրի: Մենք տարիներ շարունակ ներմուծել ենք կրթական առաջատար տեխնոլոգիաներ: Ներկայումս հնարավորություն ունենք, ի դեմս շախմատի, ունենալ արտահանվող արդյունք: Վստահեցնում եմ ձեզ, որ տասնյակ երկրների նախարարներ մեծ հետաքրքրություն են դրսևորում «Շախմատը դպրոցում» ծրագրի հանդեպ»,- նշել է Ա. Աշոտյանը` տեղեկացնելով, որ մարտին Ս. Լպուտյանի հետ կներկայացնի ծրագրի արդյունքները ԱՄԷ-ում կայանալիք համաշխարհային կրթական համաժողովում:
«Կենտրոնի բացումը լավագույն պատասխանն է երբեմն հնչող քննադատություններին: Իհարկե, այս ամենում կա հանրային կարծիքի ձևավորման լավագույն փորձ, երբ աշխարհի առաջատար ԶԼՄ-ները լուսաբանում են վերոնշյալ ծրագիրը, որը մեր երկրի մասին դրական հիշատակումների անսպառ աղբյուր է»,-ընդգծել է նախարարը` հույս հայտնելով, որ կենտրոնի բացմամբ ավելի խորքային վերլուծության կենթարկվի ծրագիրը և հետագա քաղաքականության շտկման հիմք կդառնա:
ՀՊՄՀ-ի ռեկտոր Ռուբեն Միրզախանյանն իր ողջույնի խոսքում նշել է, որ ավելի վաղ բուհում կայացած «Շախմատը կրթական համակարգում» համաժողովը երևույթ էր մեր երկրի գիտական կյանքում, քանի որ համաժողովին մասնակցել է 31 երկրի ներկայացուցիչ, հնչել են բազմաթիվ արժեքավոր գիտական զեկույցներ: "Համաժողովում հանդես է եկել նաև գիտնականների մի խումբ, որը ձևավորվել էր բուհի երիտասարդ դասախոսներից` հոգեբան, սոցիոլոգ և այլն: Խումբը կատարել էր հետազոտական աշխատանք, որը մեծ ռեզոնանս է ունեցել, այդ թվում` արևմտյան մամուլում: Այդ է պատճառը, որ մենք չէինք կարող հրաժարվել այս նախաձեռնությունից: Եվ ահա այսօր շախմատի ակադեմիայի և ՀՀ ԿԳՆ գիտության պետական կոմիտեի աջակցությամբ բացվում է շախմատի կրթական հետազոտությունների կենտրոնը, որը համալրված է 11 աշխատակցով: Պատահական չէ, որ մեր այս նորամուծությունը հետաքրքրել է արևմտյան մի շարք առաջատար բուհերի»,-նշել է ռեկտորը:
ՀՀ շախմատի ակադեմիայի նախագահ Սմբատ Լպուտյանը, անդրադառնալով նախաձեռնությանը, նշել է. «Մենք պետք է այս ծառը ջրենք, հոգատար սիրով մեծացնենք, որպեսզի այն տա համեղ և օգտակար պտուղներ ոչ միայն մեր երկրի, այլև ողջ աշխարհի համար»:
Միջոցառման ընթացքում կենտրոնի տնօրեն Վահան Սարգսյանը ներկայացրել է կենտրոնի գործունեությունը, մարտահրավերներն ու նպատակները` ընդգծելով, որ կենտրոնի նպատակն է նպաստել հանրակրթական դպրոցում շախմատի ուսուցման որակի շարունակական բարելավմանը և իրականացնել այդ գործընթացի մշտադիտարկում: