Պուտին. «ԱՄՆ-ն ՖԻՖԱ-ի հետ նույն մեթոդներն է կիրառում, ինչ Ասանժի և Սնոուդենի հետ»
ՌԴ նախագահ Վլադիմիր Պուտինի խոսքերով՝ բացառված չէ, որ ՖԻՖԱ-ի հետ կապված իրավիճակում ամերիկացիներն օգտագործում են նույն մեթոդները, ինչ «WikiLeaks»-ի հիմնադիր Ջուլիան Ասանժի և ամերիկյան հատուկ ծառայությունների նախկին աշխատակից Էդվարդ Սնոուդենի հետ՝ իրենց շահադիտական նպատակներին հասնելու համար:
«Ցավոք, ամերիկացի մեր գործընկերները նման մեթոդներ են օգտագործում իրենց շահադիտական նպատակներին հասնելու համար և դա անօրինական են անում, հետապնդում մարդկանց: Ես չեմ բացառում, որ ՖԻՖԱ-ի նկատմամբ նույն դեպքն է, հանգեցնում է հենց այդ մտքին»,- ասել է Պուտինը՝ պատասխանելով ՖԻՖԱ-ի շուրջ ստեղծված իրավիճակի վերաբերյալ լրագրողների հարցերին: Այս մասին հայտնում է «Ռիա Նովոստին»:
ՌԴ նախագահը տարօրինակ է անվանել ՖԻՖԱ-ի պաշտոնյաների ձերբակալությունները՝ կատարված ամերիկյան կողմի հարցմամբ՝ նկատելով, որ դա սեփական լիազորություններն այլ երկրների վրա տարածելու ակնհայտ փորձ է: Այս մասին հաղորդում է «Ինտերֆաքսը»:
«Ինչ վերաբերում է կատարված ձերբակալություններին, ապա դա նվազագույնը շատ տարօրինակ է դիտվում, քանզի ձերբակալությունները կատարվել են ամերիկյան կողմի հարցմամբ՝ կոռուպցիայի մեջ մեղադրանքով: Ո՞ւմ: Միջազգային պաշտոնյաների»,- ասել է Վլադիմիր Պուտինը և ավելացրել. «Կարելի է ենթադրել, որ նրանցից ինչ-որ մեկն ինչ-որ բան է խախտել, ես չգիտեմ, բայց հաստատ ԱՄՆ-ն դրա հետ ոչ մի կապ չունի»:
«Նրանք՝ այդ պաշտոնյաները, ԱՄՆ-ի քաղաքացիներ չեն: Եվ եթե ինչ-որ իրադարձություն է եղել, ապա չի կատարվել Միացյալ Նահանգների տարածքում, և ԱՄՆ-ն դրա հետ ոչ մի կապ չունի»,- ասել է Ռուսաստանի նախագահը:
Վլադիմիր Պուտինը հայտարարել է նաև, որ Ռուսաստանում գիտեն ՖԻՖԱ-ի նախագահի ընտրություններից առաջ գործող նախագահ Յոզեֆ Բլատտերի վրա գործադրվող ճնշման մասին:
«Իմ կարծիքով՝ ուրբաթ օրը պետք է կայանան ՖԻՖԱ-ի նախագահի ընտրությունները, և պարոն Բլատտերը հաղթելու բոլոր հնարավորություններն ունի: Եվ մենք գիտենք այն ճնշման մասին, որը գործադրվում է նրա վրա՝ աշխարհի 2018 թ. առաջնությունը Ռուսաստանում անցկացնելն արգելելու համար»,- ասել է Պուտինը:
Նա նկատել է, որ Ռուսաստանում գիտեն Բլատտերի դիրքորոշման մասին, որն «ընդհանուր ոչինչ չունի ՖԻՖԱ-ի ու Ռուսաստանի ինչ-որ յուրահատուկ հարաբերությունների հետ»:
«Դա ընդհանուր սկզբունքային դիրքորոշում է: Սպորտն ու քաղաքականությունը պետք է առանձին լինեն: Եվ ավելին՝ նա կարծում է, որ սպորտը պետք է դրական ազդեցություն ունենա քաղաքականության վրա և ծառայի որպես երկխոսության հարթակ՝ հաշտեցման, ինչ-որ նոր որոշումների փնտրտուքի համար: Ես կարծում եմ, որ դա բացարձակ ճիշտ դիրքորոշում է»,- ասել է Պուտինը:
Ավելի վաղ, ինչպես արդեն տեղեկացրել ենք, Եվրոպական ֆուտբոլային ասոցիացիաների միությունը (ՈՒԵՖԱ) պահանջել է հետաձգել ՖԻՖԱ-ի նախագահի ընտրությունները՝ կապված կազմակերպության նախկին ներկայացուցիչների մասնակցությամբ բռնկված սկանդալի հետ: Չորեքշաբթի հայտնի է դարձել, որ ՖԻՖԱ-ի մի շարք բարձրաստիճան պաշտոնյաներ Ցյուրիխում ձերբակալվել են կոռուպցիայի մեղադրանքով: ԱՄՆ-ի գլխավոր դատախազը հայտարարել է ՖԻՖԱ-ում խոշորածավալ կոռուպցիայի մասին վերջին երկու տասնամյակի ընթացքում՝ աշխարհի առաջնությունների հայտերի, մարքետինգային ու հեռարձակման գործարքների շուրջ: Նաև մեքենայությունների, թալանի և փողերի լվացման մեղադրանքներ են հնչում:
Պաշտոնյաները հավաքվել էին Ցյուրիխի հյուրանոցում՝ կազմակերպության նախագահի հերթական ընտրությունների սպասումով, որոնք կանցկացվեն մայիսի 29-ին: ՖԻՖԱ-ի նախագահի պաշտոնին հավակնում են կազմակերպության այժմյան ղեկավար Յոզեֆ Բլատտերը, ով առաջադրվում է 5-րդ անգամ, ինչպես նաև Հորդանանի արքայազն Ալի բին Ալ-Հուսեյնը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին