Յոզեֆ Բլատտեր. «ՖԻՖԱ-ն արմատական վերակառուցման կարիք ունի»
ՖԻՖԱ-ի նախագահ Յոզեֆ Բլատտերը հայտարարել է զբաղեցրած պաշտոնից հեռանալու մասին կազմակերպությունում բռնկված կոռուպցիոն սկանդալի պատճառով: Այդ հայտարարությունը Բլատտերը կատարել է հատուկ հրավիրած մամուլի ասուլիսում: Ուշագրավ է, որ ԶԼՄ-ների ներկայացուցիչների հետ հանդիպումը կայացել է ՖԻՖԱ-ի նախագահի պաշտոնում Բլատտերի վերընտրվելուց մի քանի օր անց:
Բլատտերը կոչ է անում 2015 թ. դեկտեմբեր-2016 թ. մարտ ժամանակահատվածում հրավիրել նոր արտահերթ համաժողով` նոր նախագահին ընտրելու համար: Մինչ այդ նա կկատարի ՖԻՖԱ-ի նախագահի պարտականությունները:
Ստորև ներկայացնում ենք Յոզեֆ Բլատտերի խոսքն ամբողջությամբ:
- Ես շատ երկար եմ մտածել իմ նախագահության մասին: Այն 40 տարվա մասին, որի ընթացքում կյանքս անխափան կապված է եղել ՖԻՖԱ-ի և մեծագույն մարզաձևի հետ, ինչպիսին ֆուտբոլն է:
Ես ավելի թանկ եմ գնահատում ՖԻՖԱ-ն, քան որևէ մեկ ուրիշը, և ուզում եմ անել այն, ինչն ամենալավը կլինի ՖԻՖԱ-ի ու ֆուտբոլի համար: Ես զգում էի ընտրություններին մասնակցելու անհրաժեշտությունը, քանզի դա լավագույն որոշումն էի համարում մեր կազմակերպության համար: Ընտրություններն անցան, բայց ՖԻՖԱ-ի խնդիրները մնում են: ՖԻՖԱ-ն արմատական վերակառուցման կարիք ունի:
Չնայած ես ստացել եմ ՖԻՖԱ-ի անդամների մանդատը, չեմ զգում, որ այն ինձ տրված է ողջ ֆուտբոլային աշխարհի` երկրպագուների, ֆուտբոլիստների, ակումբների, մարդկանց կողմից, ովքեր ապրում, շնչում են ֆուտբոլով և սիրում են այն այնպես, ինչպես մենք բոլորս` ՖԻՖԱ-ում:
Ուստի ես որոշել եմ դադարեցնել իմ լիազորություններն արտահերթ համաժողովում: Կշարունակեմ կատարել ՖԻՖԱ-ի նախագահի պարտականությունները մինչև նոր ընտրությունները:
ՖԻՖԱ-ի պլանային հաջորդ համաժողովը կկայանա 2016 թ. մայիսի 12-ին, Մեխիկոյում: Բայց դա սոսկ ավելորդ ձգձգում է, ուստի ես գործադիր կոմիտեին կոչ եմ անում կազմակերպել արտահերթ համաժողով` հնարավորինս շուտ իմ հաջորդին ընտրելու համար: Դա հարկ է անել ՖԻՖԱ-ի կանոնադրության համաձայն: Մենք պետք է բավարար ժամանակ ապահովենք թեկնածուների համար` իրենց ծրագրերը ներկայացնելու և քարոզարշավ իրականացնելու համար:
Քանզի ես թեկնածու չեմ լինի և այժմ ազատ եմ սահմանափակումներից, որը պարտադրում է ընտրություններին մասնակցությունը, կարող եմ կենտրոնանալ հեռահար խնդիրների ու արմատական բարեփոխումների վրա, որոնք մեր կողմից մշակվել են նախորդ տարիների ընթացքում: Երկար տարիներ ջանասիրաբար աշխատել ենք, որպեսզի կյանքի կոչենք վարչական բարեփոխումները, սակայն ինձ համար ակնհայտ է, որ առկա գործընթացը բավարար չափով հաջող չէ:
Գործադիր կոմիտեն բաղկացած է կոնֆեդերացիաների ներկայացուցիչներից, որոնց վրա մենք վերահսկողություն չունենք, բայց որոնց գործունեության արդյունքում ՖԻՖԱ-ն պատասխանատվություն է կրում: Մենք պետք է փոխենք խորը արմատավորված համակարգը: Գործադիր կոմիտեի թվակազմը պետք է կրճատվի, իսկ նրա անդամներին պետք է ընտրի ՖԻՖԱ-ի համաժողովը:
ՖԻՖԱ-ի գործադիր կոմիտեի անդամները պետք է հաստատվեն ֆեդերացիաների, այլ ոչ թե կոնֆեդերացիաների կողմից: Մենք պետք է սեղմ ժամկետներ հաստատենք ոչ միայն նախագահի, այլև գործադիր կոմիտեի բոլոր անդամների ընտրությունների համար:
Ես անցյալում պայքարել եմ այս փոփոխությունների համար և, ինչպես բոլորին հայտնի է, իմ ջանքերն արգելափակված էին: Սակայն այս անգամ ես հաջողության կհասնեմ:
Ես չեմ կարող դա միայնակ անել: Դոմենիկո Սկալային խնդրել եմ իր վրա վերցնել վերահսկողությունը` այդ գործընթացն իրականացնելու և անհրաժեշտ բոլոր քայլերը կատարելու համար: Պարոն Սկալան կլինի ՖԻՖԱ-ի անկախ աուդիտորական ընկերության նախագահը և միաժամանակ կղեկավարի ընտրական կոմիտեն: Նա կկորդինացնի իմ հաջորդի ընտրությունները: Մեծ վստահություն ու հեղինակություն ունի ինչպես ՖԻՖԱ-ի ներսում, այնպես էլ նրա սահմաններից դուրս, ունի գիտելիքներ և փորձ, որոնք անհրաժեշտ են` ծրագրված բարեփոխումներն իրականացնելու համար:
ՖԻՖԱ-ի ու նրա հետաքրքրությունների համար, որոնք շատ թանկ եմ գնահատում, հոգածությունը հանգեցրեց այս որոշմանը: Ուզում եմ շնորհակալություն հայտնել նրանց, ովքեր միշտ աջակցել են ինձ ու շատ բան արել խաղի համար, որոնք մենք բոլորս շատ ենք սիրում:
Ամենից շատ ինձ անհանգստացնում է մի բան. երբ այս ամենը ավարտվի, ֆուտբոլը պետք է հաղթի:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ