Թե ինչպես ռուս բռնցքամարտիկը հիվանդանոց ուղարկեց իր ֆրանսիացի մրցակցին
Սերգեյ Կովալևը պաշտպանել է պրոֆեսիոնալ բռնցքամարտի կիսածանր քաշային կարգում WBO-ի, WBA-ի և IBF-ի վարկածներով աշխարհի չեմպիոնի կոչումը ֆրանսիացի Նաջիբ Մոհամմեդիի հետ մենամարտում՝ երրորդ ռաունդում նոկաուտի ենթարկելով մրցակցին: Մարտից հետո ֆրանսիացին հոսպիտալացվել է: Այս մասին հայտնում է lenta.ru-ն:
Իսմայիլ Սիլլահ, Սեդրիկ Ագնյու, Բլեյք Կապարելլո, Բեռնարդ Հոպկինս և Ժան Պասկալ: Տարբեր ժամանակներում այս տղաները փորձել են վիճարկել Սերգեյ Կովալևի՝ աշխարհի չեմպիոն, կիսածանր քաշային կարգում լավագույնը անվանվելու իրավունքը: Եվ նրանցից ոչ ոք չի կարողացել կանգնեցնել Քանդարարին՝ Կոպեյսկից: Դա չկարողացավ անել նույնիսկ լեգենդար ամերիկացի Բի-Հոպը, չնայած դիմացավ մինչև 12-ռաունդանոց մենամարտի վերջը: Եվ նա նշված բռնցքամարտիկների թվում միակն էր, որ դիմացավ: Կովալևի մյուս մրցակիցները կոչման համար պայքարում ժամկետից շուտ են դարձել նրա հարվածների ջախջախիչ ուժի զոհերը:
Բռնցքամարտի համաշխարհային կազմակերպությունը «Sports Illustrated», «USA Today» և «The Ring» ամսագրերի հետ միասին Կովալևին ճանաչել է աշխարհի 2014 թ. լավագույն բռնցքամարտիկ. տարվա ընթացքում ռուս մարզիկին հաջողվել է չեմպիոնական կոչումներ նվաճել կիսածանր քաշային կարգի 4 պատվավոր վարկածներից 3-ում: WBC-ի վարկածով լավագույն «կիսածանրքաշայինի» կոչումը մինչև հիմա պատկանում է կանադացի Ադոնիս Սթիվենսոնին: Նա վերջին խոչընդոտն է Կովալևի ճանապարհին՝ աշխարհի բացարձակ չեմպիոնի անմահ փառքին ու մեծությանը տիրանալու համար: Պրոֆեսիոնալ բռնցքամարտի պատմության մեջ ռուսաստանցի միայն մեկ բռնցքամարտիկ է նվաճել այդ բարձունքը: Դա Կոնստանտին Ցզյուն է:
Սթիվենսոնի հետ մարտի կազմակերպումը սոսկ ժամանակի հարց է: Երազանքն իրականություն դարձնելու համար Սերգեյը պատրաստ է սպասել, մինչև հաիթյան ծագմամբ կանադացին քաջություն ձեռք բերի՝ զբաղեցնելու ռինգի հակադիր անկյունը: Բայց նա չէր կարող բաց թողնել կոչման պաշտպանության մենամարտը: Միջազգային բռնցքամարտի ֆեդերացիան ռուս բռնցքամարտիկին պարտավորեցրել էր մենամարտել պարտադիր հավակնորդի՝ ֆրանսիացի Նաջիբ Մոհամմեդիի հետ:
Կովալևի մրցակիցը մենամարտին մոտեցավ «WBA Continental»-ի կոչմամբ՝ իր ակտիվում ունենալով անընդմեջ 13 հաղթանակ: Սակայն Մոհամմեդիի զոհերից և ոչ մեկը չէր ներկայացնում WBO-ի, WBA-ի, WBC-ի և IBF-ի լավագույն տասնյակը: Հաշվի առնելով Կովալևի վարպետությունը՝ հիմք կար ենթադրելու, որ ֆրանսիացին դժվար թե դիմանա մինչև մենամարտի ավարտը: Պարտադիր հավակնորդի դեմ ռինգ դուրս գալու ձևական անհրաժեշտությունը Կովալևի համար վերածվեց ստուգողական մարտի, որն անցկացվեց Լաս Վեգասի «Mandalay Bay» լեգենդար արենայում, բռնցքամարտի հազարավոր սիրահարների աչքերի առջև:
Կովալևն արդարացրեց ինչպես իր ֆանատների, այնպես էլ չեզոք երկրպագուների սպասելիքները: Առաջին իսկ վայրկյաններից ակնհայտ էր ռուս մարզիկի գերազանցությունն արագության, հզորության ու հարվածների ճշգրտության մեջ: Նա մեթոդաբար «ուղղում էր» Մոհամմեդիի դեմքի տեսքը ձախ «ջեբով»՝ դրանք զուգակցելով աջից կորպուսին ու գլխին հզոր հարվածներով: Ֆրանսիացու՝ Կովալևին կողքից անակնկալի բերելու բոլոր փորձերը մնացին առանց ուշադրության, քանի որ ռուս բռնցքամարտիկը գործում էր իր համար հարմար տարածության վրա: Միակ դրվագը, որը Մոհամմեդին կարող էր գրանցել իր ակտիվում, արձանագրվեց երկրորդ ռաունդում, երբ Կովալևը, շրջվելով մրցակցի հարվածներից, նահանջեց և ընկավ ռինգում: Մնացած դեպքերում մարտն ընթացավ ռուսական սցենարով: Ֆրանսիացին մեկը մյուսի հետևից «կուլ էր տալիս» չեմպիոնի հարվածները, իսկ Կովալևի կատարմամբ հերթական կոմբինացիայից հետո հայտնվեց հորիզոնական դիրքում:
Չնայած այն բանին, որ հավակնորդը «9» հաշվի ժամանակ կարողացավ բարձրանալ, այդպես էլ ուշքի չեկավ: Մոհամմեդին փորձում էր կառչել Կովալևից, սակայն նույնիսկ թեթև հրումից երերում էր: Մրցավարը, սակայն, չշտապեց երկրորդ ռաունդում նոկաուտ գրանցել: Երրորդ ռաունդի երրորդ րոպեին Կովալևը մրցավարին խուսանավելու հնարավորություն չտվեց և մարտն ավարտեց դասական «երկյակով»:
Մարտից հետո Մոհամմեդիին տեղափոխեցին հիվանդանոց: Ֆրանսիացին տեսողության հետ կապված խնդիրներ ունի:
«Ես չեմ կարողանում բացել աչքս: Նոկդաունից հետո պատրաստ էի շարունակել մարտը: Սկսեցի «որսալ» նրան, հարվածներս հասնում էին նպատակակետին: Կովալևը փորձառու մարտիկ է, շատ ժամանակ է պետք՝ նրան հարմարվելու համար: Ցավոք, նրա մեծ մատն աչքս մտավ»,- ասել է Մոհամմեդին:
Սերգեյ Կովալևը մարզումային տեմպով 28-րդ հաղթանակը տոնեց պրոֆեսիոնալ ռինգում և պաշտպանեց կիսածանր քաշային կարգում WBO-ի, WBA-ի և IBF-ի վարկածներով աշխարհի չեմպիոնի կոչումները: Այս հաղթանակը նրան ևս մեկ քայլով մոտեցրեց բաղձալի նպատակին՝ բացարձակ չեմպիոնի կոչմանը: Անկասկած, Կովալևը մինչև վերջ կփորձի վազել ցանկալի գոտու՝ WBC-ի վարկածով աշխարհի չեմպիոնի կոչման հետևից և Ադոնիս Սթիվենսոնի հետ մենամարտելու հնարավորություն կփնտրի: Բայց եթե նույնիսկ կանադացին շարունակի տարբեր պատճառներ օգտագործել՝ խուսափելու համար Կովալևի հետ անխուսափելի թվացող հանդիպումից, վերջինս երկար չի նստի իր տեղում:
Մոհամմեդիի հետ մարտից հետո Սերգեյը հայտարարել է ցանկացած մրցակցի հետ հանդիպելու պատրաստակամության մասին՝ նշելով Ժան Պասկալի հետ ռևանշի պոտենցիալ կազմակերպման, ինչպես նաև գերմիջինքաշային կարգում Անդրե Ուորդի հետ հանդիպման հնարովորության մասին: Բացառված չէ, որ այդ մարտերից մեկը կայանա 2015 թ. նոյեմբերին, Մոսկվայում: