Ձեր վստահելի աղբյուրը

«Միլանի» փոխնախագահ Ադրիանո Գալլիանին, ում 71-ամյակը լրացել է երեկ, պատմել է տրանսֆերային շուկայում ակումբի աշխատանքի, թիմի մարտավարության, Սիլվիո և Բարբարա Բեռլուսկոնիների հետ փոխհարաբերությունների մասին…

«Արդյոք Իբրահիմովիչը կտեղափոխվի՞ «Միլան»: ՊՍԺ-ի հետ նրա պայմանագիրն ուժի մեջ է մինչև 2016 թ. հունիսի 30-ը: Ավելին չեմ կարող ասել:

Ռոմանյոլիի համար մենք առաջարկեցինք 25 մլն եվրո: Եվ եթե նա չտեղափոխվի, կմնանք մեր ֆուտբոլիստներով:

Ինչ վերաբերվում է Ջեքսոն Մարտինեսին, շատ քիչ էր մնում, որ պայմանագիր ստորագրեինք նրա հետ, սակայն Ջեքսոնն ընտրեց «Ատլետիկոն»: Բայց մենք ուրախ ենք, քանզի վերջնարդյունքում հաջողվեց ձեռք բերել այնպիսի գերազանց հարձակվողի, ինչպիսին Կառլոս Բակկան է:

Ունայ Էմերին գերազանց մարզիչ է, և մենք 2014 թ. ամռանը շատ էինք հետաքրքրված նրան հրավիրելու հարցում:

Պաոլո Մալդինիի հետ որևէ տարաձայնություն չունենք: Ես նրան պաշտոն եմ առաջարկել երիտասարդական հատվածում: Եվ այդ աշխատանքում ազատ որոշումներ կայացնելու հնարավորություն ուներ, բայց Պաոլոն հրաժարվեց:

Խոսակցություններն այն մասին, որ ես շռայլ փոխհատուցում կստանամ «Միլանից» հեռանալու դեպքում որևէ հիմք չունեն: Ես «Միլանի» աշխատակիցը չեմ, այլ նրա ղեկավարը:

Ղեկավար պաշտոնի համատեղման որոշումը կայացրել է Սիլվիո Բեռլուսկոնին: Ես ու Բարբարա Բեռլուսկոնին ընդունել ենք այն և այժմ կատարում ենք մեր աշխատանքը: Սկզբում ինձ համար դժվար էր ընդունել դա, սակայն հիմա իմ ու Բարբարայի փոխհարաբերություններում ամեն ինչ ներդաշնակ է:

4-3-1-2 սխեմայով խաղալու որոշումը կայացվել է Սինիշա Միխայլովիչի ու Սիլվիո Բեռլուսկոնիի ընթրիքի ժամանակ, անցած ամիս: Որոշեցինք խաղալ երկու հարձակվողով, իսկ Մենեզին կօգտագործենք նրանց հետևում՝ որպես հարձակողական ոճի կիսապաշտպան: Բակկան ու Լուիս Ադրիանոն միասին կխաղան հարձակման գծում:

Մենք նաև ուզում էինք Էլ-Շաարավիին օգտագործել կիսապաշտպանությունում: Նա համաձայնվեց խաղալ կիսապաշտպանության ձախ թևում, սակայն հետո առաջարկ ստացվեց «Մոնակոյից» և որոշեց հեռանալ»: