Մոուրինյո. «Երբևէ կարող եմ պարտվել Վենգերին, բայց դրանից դրամա չեմ սարքի»
«Չելսիի» գլխավոր մարզիչ Ժոզե Մոուրինյոն «Արսենալի» հետ Սուպերգավաթի խաղից առաջ պատասխանել է լրագրողների հարցերին: Նա հաստատել է, որ «Արսենալի» հետ կիրակի կայանալիք խաղում թիմի ողջ կազմը կլինի իր տրամադրության տակ: Ավելի վաղ Մոուրինյոն կասկածի տակ էր դրել Գարի Կեյհիլի ու Դիեգո Կոստայի մասնակցությունը:
«Մենք գրեթե չենք տանջվում ժամային գոտիների փոփոխությունից: Ինքնաթիռով երկար ճանապարհ չենք անցել, և այդ առումով սա միջմրցաշրջանային հաջող նախապատրաստության փուլ էր: Չորեքշաբթի օրվանից Լոնդոնում ենք և ոչ մի խնդիր չունենք,- ասել է Ժոզեն:- Բարձրակարգ երեք հարձակվող ունենք: Եթե մեկը վնասվածք ունենա, երկուսը կմնան մեր տրամադրության տակ: Ոչ մի խնդիր կամ անհանգստություն չունենք: Այդ դիրքում շատ ուժեղ ենք, ես չեմ հուզվում»:
«Չելսիի» գլխավոր մարզիչը հաստատել է, որ ձախ պաշտպանի դիրքում կազմի համալրման անհրաժեշտություն է զգում:
«Մենք միայն մեկ նպատակ ունենք. փորձում ենք համալրել ձախ պաշտպանի դիրքը: Ես չեմ խոսում այլ թիմերի խաղացողների մասին, հատկապես այժմ, երբ մոտ է մրցաշրջանի մեկնարկը: Այն արդեն սկսվում է մեզ համար, իսկ հաջորդ շաբաթ բոլորը կմեկնարկեն»:
Ինչպես հայտնի է, Մոուրինյոն երբեք չի պարտվել Արսեն Վենգերին: Սակայն «Չելսիի» մարզիչն այդ մասին չի մտածում:
«Ես պարզապես ուզում եմ, որպեսզի իմ ակումբը լավ արդյունքների հասնի: Կարևոր չէ՝ դա «Արսենալն» է, թե ոչ, կարևոր չէ, թե ով է մարզիչը: Ուղղակի ուզում եմ, որպեսզի ակումբը լավ արդյունքներ ունենա, և դա միակ բանն է, որը նշանակություն ունի:
Ֆուտբոլում կարելի է հաղթել կամ պարտվել, ոչ-ոքի խաղալ, և միշտ ամեն ինչի պետք է պատրաստ լինել: «Արսենալի» դեմ տոնած հաղթանակները երբեք իրադարձություն չեմ դարձրել, երջանկության կամ հպարտության յուրահատուկ զգացում չեմ ապրել և պարտությունը նույնպես դրամա չեմ սարքի:
«Արսենալը» գերազանց կազմ ունի և մեր մրցակիցն է չեմպիոնական մրցարշավում: Այն բանից հետո, երբ երկու տարի առաջ վերադարձա Անգլիա, տեսա, որ դա լավ թիմ է և լավ ֆուտբոլիստներ ունի: Կարծում եմ՝ հիմա նույն վիճակն է»:
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
