Սարգիս Հովսեփյան. «Թիմերի խաղամակարդակների տարբերությունը շատ մեծ էր»
Ֆրանսիա-Հայաստան հանդիպման ավարտից հետո «Ալյանս Ռիվյերա» մարզադաշտի մամուլի ասուլիսների սրահում Հայաստանի ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանը, ինչպես տեղեկացնում է ՀՖՖ պաշտոնական կայքը, հանդիպել է ԶԼՄ-ների ներկայացուցիչների հետ:
- Պարոն Հովսեփյան, մեկնարկային կազմի ընտրությունից և խաղի ընթացքից պարզ դարձավ, որ փորձարկումներ էիք անում այս խաղում: Ի՞նչ էիք ցանկանում տեսնել և ի՞նչ տեսաք:
- Այսպիսի հավաքականի դեմ խաղում փորձում էինք եզրերին արագություն հաղորդել, հակագրոհել: Մասամբ ստացվեց, պահեր կային, բայց վարպետությունը չհերիքեց: Իմ կարծիքով՝ ինչ-որ չափով առաջին խաղակեսը ստացվեց, ինչ որ ուզում էի տեսնել, տեսա: Իհարկե, ամբողջովին չստացվեց, որովհետև այդպիսի ուժեղ հավաքականի հետ խաղում կային թերություններ: Եվ դա միայն մեր տղաների մեղքը չէր, այլ Ֆրանսիայի հավաքականի ֆուտբոլիստների որակը չափազանց բարձր էր, և մեր տղաներն ուղղակի չէին հասցնում նրանց հետևից: Դա բնական է, որովհետև Ֆրանսիայի հավաքականի ֆուտբոլիստները սովոր են բարձր մակարդակի հանդիպումներին, իսկ մենք ունենք ֆուտբոլիստներ, ովքեր առաջին անգամ են մասնակցում նման հանդիպումների, իրենց համար մի փոքր անսովոր է այսպիսի բարձր որակը և արագությունները: Այս խաղում դաշտ դուրս եկան երիտասարդ ֆուտբոլիստներ, որոնց փորձարկում ենք ապագայի համար:
Պարտության պատճառն ակնհայտ է: Թիմերի խաղամակարդակների տարբերությունը շատ մեծ էր, ես շնորհավորում եմ Ֆրանսիայի հավաքականին և ցանկանում հաջողություն Եվրոպայի առաջնության եզրափակիչ մրցաշարում:
- Մեր մի քանի առաջատարներ պահեստայինների նստարանին էին, մյուսները փոխարինվեցին հանդիպման ընթացքում: Դա պայմանավորված էր Ալբանիայի հավաքականի հետ առաջիկա խաղո՞վ: Մովսիսյանն ու Արզումանյանը պատրաստ կլինե՞ն այդ խաղին:
- Մենք ունենք ֆուտբոլիստներ՝ Մովսիսյանը, Արզումանյանը, ովքեր բաց թողեցին այս հանդիպումը: Հարոյանը վատառողջ է և ներկա չէր մարզադաշտում: Եթե Յուրան և Ռոբերտն այսօր խաղային, ապա Ալբանիայի ընտրանու հետ հանդիպմանը չէին կարող մասնակցել: Դրա համար որոշեցինք նրանց հանգիստ տալ, որպեսզի պատրաստվեն կիրակնօրյա հանդիպմանը: Այդ խաղը շատ կարևոր է, կայանալու է մեր մարզադաշտում, և անպայման ուզում ենք հաղթել: Այդ հանգամանքից ելնելով՝ եղան նաև փոփոխություններ այս հանդիպման ընթացքում, քանի որ հասկանում ենք, որ շատ կարևոր խաղ է սպասվում: Բոլորս լավ պատկերացնում էինք, որ ընկերական հանդիպում էր, ուստի հնարավորություն տվեցինք խաղալ երիտասարդներին:
- Գո՞հ եք, արդյոք, խաղից:
-Արդյունքից, բնականաբար, գոհ չեմ. պարտվել ենք 0:4 հաշվով: Եթե Ալբանիայի ընտրանեւ դեմ խաղանք այնպես, ինչպես որ խաղացինք առաջին խաղակեսում, կարծում եմ` արդյունք կունենանք. թեև Ալբանիայի հավաքականի կազմում լավ ֆուտբոլիստներ են հանդես գալիս, բայց Ֆրանսիայի հավաքականի խաղամակարդակն ավելի բարձր է: Երկրորդ խաղակեսում խաղադաշտ մտան ֆուտբոլիստներ, ովքեր չկարողացան դրսևորել իրենց այս խաղում: Հուսով եմ, որ այն տղաները, ովքեր այսօր մեկնարկային կազմում էին, ավելի լավ կխաղան Ալբանիայի ազգային թիմի դեմ:
- Ի՞նչ կարծիք ունեք Գաել Անդոնյանի խաղի մասին:
- Գաելը նորմալ խաղաց: Ինչպես տեսաք, եզրային պաշտպանը վնասվածք ստացավ և թողեց խաղադաշտը: Նրա դիրքն զբաղեցրեց կենտրոնական պաշտպանը, ով լիովին չկարողացավ կատարել իր պարտականությունները: Այդ պատճառով Գաելը կարող էր սխալվել, քանի որ համագործակցությունը կենտրոնական կիսապաշտպանի հետ խախտվեց: Ես Գաելի խաղից գոհ եմ և հուսով եմ, որ ալբանացիների դեմ ավելի լավ կխաղա:
- Ֆրանսիայի հավաքականի կազմում կա՞ր ֆուտբոլիստ, ով ավելի շատ խնդիրներ առաջացրեց, քան մյուսները:
- Բոլոր ֆուտբոլիստներն էլ շատ խնդիրներ առաջացրեցին մեր ազգային հավաքականի համար: Ֆրանսիայի հավաքականն անընդհատ գրոհում էր, և ցանկացած ֆուտբոլիստ կարող էր վտանգավոր պահ ստեղծել, ինչն էլ եղավ:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ