Նախարար. Սիրիահայերը պետք է զինծառայության անցնեն ինչպես ՀՀ բոլոր քաղաքացիները

Հասարակություն 18:04 15/10/2012

Նախարար. Սիրիահայերը պետք է զինծառայության անցնեն ինչպես ՀՀ բոլոր քաղաքացիները

Հայաստանի Հանրապետության տարածքում գտնվող սիրիահայերին` հարկային և այլ պարտավորություններից ազատելու արդյունքում երկրի բյուջեի մուտքերը 1,5 միլիոն դոլարով պակաս են: Այսօրվա ասուլիսում ամփոփելով գերատեսչության չորս տարիները այս մասին հայտնեց Սփյուռքի նախարար Հրանուշ Հակոբյանը` շեշտելով, որ որոշ լրատվամիջողներ` սիրիական ճգնաժամի առաջին օրերին փորձում էին վարկաբեկել ոչ միայն Սփյուռքի նախարարությանը, այլ նաև` ՀՀ կառավարությանը:

«Եթե կարող եք բերել մի սփյուռքահայի, ով կասի, թե Սփյուռքի նախարարությունը չի ընդառաջել որևէ հարցում, եթե օդանավակայանից չեն դիմավորել, ես անհապաղ կհեռացնեմ աշխատանքից թերացած աշխատակցին», - ասաց Հ.Հակոբյանը:

Նրա խոսքով` առաջին իսկ օրերից` դեռ 2011 թվականին նախարարության նախաձեռնությամբ իրականացվել էր սիրիահայ համայնքի գիտական ուսումնասիրություն` հասկանալու, թե ինչպիսի զարգացումներ կարող են վտանգել այն և ինչ մարտահրավերների առաջ է կանգնած սիրիահայությունը:

«Այդ երկրում ներքաղաքական առճակատման առաջին օրերին մենք կոչ էինք անում համայնքին զերծ մնալ և պահպանել քաղաքական չեզոքությունը: Չէինք ուզում հանել ընդդիմությանը մերոնց դեմ», - ասաց նախարարը:

Նրա խոսքով` նախարարության նախաձեռնությամբ և համակարգմամբ ստեղծվել է «Սիրիահայերի հիմնախնդիրները համակարգող աշխատանքային խումբ», իսկ օրերս` «Սիրիահայերի հիմնախնդիրները համակարգող կենտրոն» հասարակական կազմակերպությունը, որի գործունեությունը միտված է աջակցել սիրիահայերին: Նա նաև գոհունակությամբ հիշատակեց Հ.Յ.Դաշնակցության «Օգնություն եղբորդ» նախաձեռնությունը:

Նախարարը նշեց, որ Դամասկոսում և Հալեպում արդյունավետ գործում են ՀՀ դիվանագիտական առաքելությունները, սփյուռքի նախարարության ներկայացուցիչները:

«Այն վայրերում, որտեղ ռազմական գործողություններ չկան, մեք փորձում ենք համալրել ուժերը, իսկ որտեղ պատերազմ է` աջակցել դեղորայքով և սնունդով», - ասաց նա:

Ըստ Հ.Հակոբյանի` այս պահին Հայաստանում է գտնվում շուրջ 5000 սիրիահայ, ավելի քան 1700 ընտանիք, որոնց խնդիրների լուծման համար կատարվել են մի շարք փոփոխություններ ՀՀ օրենքներում և որոշումներում:

«Սա Հանրապետության առաջին դեմքի քաղաքական կամքն էր», - ընդգծեց նախարարը` տեղեկացնելով, որ Հայաստանի բուհեր դիմել է 200 ուսանող, դպրոցներ և մանկապարտեղներ հաճախում է ավելի քան 500 երեխա, այդ թվում` նորաբաց ծրագրով սիրիական դպրոց ընդունվել է շուրջ 250 աշակերտ: Աշխատանքի կարիք ունեն 3000 հոգի, հիմնականում ապրում են վարձով:

Նախարարը շեշտեց, որ սիրիահայերը, եթե երկքաղաքացի են, ունեն նույն իրավունքներ և պարտականությունները, ինչ և ՀՀ մյուս քաղաքացիները: Այդ շրջանակում նա ընդգծեց, որ 18 տարեկան լրացած արական սեռի բոլոր ՀՀ քաղաքացի սիրիահայերը` ըստ Սահմանադրության հոդված 47-ի, պարտավոր են ծառայություն անցնել հայոց բանակում:

«Սիրիահայերի համար նախատեսված են պարտադիր ժամկետային ծառայությունից ազատվելու և տարեկետման նույն իրավունքները, ինչ և ՀՀ մյուս քաղաքացիների համար: Մենք առանց այդ էլ շատ ֆինանսական արտոնություններ ենք տվել», - նշեց Հ.Հակոբյանը:

Նշենք, որ ըստ նախարարության կողմից տրամադրված տեղեկատվության, 2012թ հունվարից հոկտեմբերի 9-ը ընկած ժամանակահատվածում ՀՀ սփյուռքի նախարարություն այցելել է շուր 490 սիրիահայ, ՏԿՆ Միգրացիոն պետական ծառայության միջոցով հանրակացարաններում տեղավորվել է 32 ընտանիք` 71 անդամով, հատկացվել է 28 սենյակ: Սփյուռքի նախարարություն դիմած սիրիահայերի մեծ մասը` շուրջ 350 ընտանքի բնակվում է վարձով, մոտ 50` բարեկամի տանը, մի մասն ունի սեփական բնակարաններ, մյուսները` տեղավորվել հանրակացարաններում:

2012 թվականի սկզբից մինչև հոկտեմբերի 15-ը Սիրիայում զոհվել է 36 հայ, որոնցից 28 տղամարդ, 7 կին և 1 երեխա, նրանցից 24-ը զոհվել է Հալեպում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: