«Կոնվենցիան կարելի է համարել ամենահաջող փաստաթղթերից մեկը». ՅՈՒՆԻՍԵՖ-ը նշեց Հայաստանում իր գործունեության 20-ամյակը
Այսօր ՄԱԿ-ի մանկական հիմնադրամը (ՅՈՒՆԻՍԵՖ) նշեց Հայաստանում իր գործունեության 20-ամյակը: Երեկոյի հանդիսավոր բացմանը ելույթ ունեցան ՀՀ փոխվարչապետ Վաչե Գաբրիելյանը, Հայաստանում ՅՈՒՆԻՍԵՖ-ի ներկայացուցիչ Հենրիետ Արենսը և Տեր Վարդան եպիսկոպոս Նավասարդյանը:
Միջոցառումը նաև նվիրված էր «Երեխայի իրավունքների մասին» կոնվենցիայի 25-ամյակին, որը մարդու իրավունքների պաշտպանության՝ պատմության մեջ ամենաշատ վավերացումներ անցած համաձայնագիրն է։
Միջոցառմանը ՀՀ վարչապետ Հովիկ Աբրահամյանի խոսքը փոխանցեց փոխվարչապետ Վաչե Գաբրիելյանը: Նրա խոսքերով՝ քարորդ դար առաջ ընդունված «Երեխաների իրավունքների մասին» կոնվենցիան, նոր փուլ նշանավորեց երեխաների հանդեպ համընդհանուր մոտեցումների ձևավորման հարցում, և մեծապես նպաստեց երեխաների իրավունքների արդյունավետ պաշտպանության առաջխաղացմանը:
«Կոնվենցիան կարելի է համարել ամենահաջող փաստաթղթերից մեկը, որին միացել են աշխարհի բազմաթիվ երկրներ: Հայաստանը կոնվենցիային միացել է 1992 թվականին: Այս ընթացքում զգալի աշխատանք է կատարվել: Երեխաների իրավունքների պաշտպանության հարցը մշտապես գտնվում է կառավարության ուշադրության կենտրոնում: Կան մի շարք ոլորտներ, որտեղ ունենք էական առաջընթաց, մասնավորապես, առողջապահության, կրթության, սոցիալական ոլորտներում»,-ասաց Վաչե Գաբրիելյանը՝ կարևորելով ՄԱԿ-ի մանկական հիմնադրամի հետ աշխատանքը:
Ըստ նրա, իհարկե, առաջընթացը չի նշանակում, որ դեռ խնդիրներ չկան: Վաչե Գաբիելյանը նշեց, որ բոլոր գերատեսչությունները պետք է ջանքեր գործադրեն երեխաների իրավունքների հետագա տարածման և պաշտպանության համար:
ՄԱԿ-ի մանկական հիմնադամի ներկայացուցիչ Հենրիետ Արենսն էլ նշեց, որ վերջին քսան տարիների ընթացքում ամուր կերպով աշխատել են ՀՀ կառավարության հետ՝ իրականացնելով բարեփոխումներ երեխայի իրավունքների պաշտպանության ոլորտում:
«Բարեփոխումները տարբեր ուղղություններով են կատարվել և բավական առաջընթաց է գրանցվել այդ ոլորտում: Եթե խոսենք օրինակներով, ապա կարող ենք, մասնավորապես, նշել իմունիզացիայի ոլորտում արձանագրված էական առաջխաղացումը: Երկրում չեն գրանցվել կարմրուկի և պոլիոմելիտի դեպքեր: Բացի այդ, զգալի կրճատվել են հինգ տարեկան երեխաների շրջանում մահացության դեպքերը»,-ասաց Հենրիետ Արենսը:
Ըստ նրա՝ վերջին 20 տարիների ընթացքում Հայաստանում կրճատվել են նաև մանկական հանցագործության դեպքերը, ՄԱԿ-ի մանկական հիմնադրամի աջակցությամբ զգալի աշխատանք է կատարվել կրթության ոլորտում: Հենրիետ Արենսը նկատեց, որ այսօր ավելի շատ երեխաներ են գնում դպրոց, քան նախկինում: Ուրախալի փաստ է նաև այն, որ նրանց թվում են հաշմանդամություն ունեցող երեխաները:
ՀՀ աշխատանքի և սոցիալական հարցերի նախարար Արտեմ Ասատրյանը նշեց, որ ՄԱԿ- ի մանկական հիմնադրամի առաքելությունը մեր երկրում համապատասխանում է այն հիմնական ուղղությունների հետ, որոնք նաև որդեգրել է ՀՀ կառավարությունը: Նրա խոսքերով՝ ՅՈՒՆԻՍԵՖ-ի առաքելությունը մեր երկրում ուղղված է սոցիալական ծառայությունների մատուցման, երեխաների իրավունքների պաշտպանության ոլորտներում բարեփոխումների և ծրագրերի իրականացմանը, երեխաների ընտանիքիում ապրելու իրավունքի իրացմանը:
Անդրադառնալով ՄԱԿ-ի մանկական հիմնադրամի (UNICEF) «Երեխան պետք է ապրի ընտանիքում» ծրագրին, նախարարը նշեց, որ ծրագրի նպատակն է աջակցել Հայաստանի կառավարությանը երեխաների պաշտպանության համակարգի բարեփոխումների` մասնավորապես, հաստատությունների բեռնաթափման ռազմավարության իրականացման գործում, հասարակության մեջ արմատավորել այն դիրքորոշումը, որ երեխայի համար ապրելու և դաստիարակության լավագույն վայրն ընտանիքն է և որ որևէ դեպքում և պատճառաբանությամբ չպետք է երեխային հանձնել մանկատուն:
«Հայաստանում մեծ բարեփոխումներ են իրականացվում երեխաների պաշտպանության ոլորտում, որի հիմնական գաղափարն է` «Երեխան պետք է ապրի ընտանիքում», -ասաց նա: Այս առումով նախարարը ներկայացրեց այլընտրանքային սոցիալական ծառայությունների համակարգը, որը թույլ կտա կանխարգելել երեխայի մուտքը տարբեր հաստատություններ՝ ցերեկային խնամքի կենտրոններ, սոցիալական վերականգնողական տարբեր հաստատություններ:
Նախարարը միաժամանակ տեղեկացրեց, որ այս համակարգի ներդրումը երկարատև գործընթաց է, սակայն այն կունենա գործողությունների հստակ ժամանակացույց, հստակ քայլեր, ակնկալվող արդյունքներ:
Միջոցառմանը ՅՈՒՆԻՍԵՖ-ը նաև ներկայացրեց իր նոր նախաձեռնության՝ «IMAGINE»-ի («Իմե՛ջին»՝ Պատկերացրո՛ւ») հայաստանյան տարբերակը, որը նույնպես նվիրված է «Երեխայի իրավունքների մասին» կոնվենցիայի 25-ամյակին և միտված է բարձրացնելու հանրության իրազեկումը երեխայի իրավունքների վերաբերյալ: Նախաձեռնության նպատակն է ստեղծել մարդկության կողմից ամենասիրված և ոգեշնչող երգերից մեկի՝ Ջոն Լենոնի «Իմեջին» («Պատկերացրու») երգի՝ աշխարհում ամենաշատ մասնակից ունեցող երաժշտական ձայնագրությունը։
Նախաձեռնությանը imagine.unicef.org կայքի միջոցով մինչ այժմ միացել են հազարավոր երեխաներ և իրենց ծնողները, երգիչներ և արվեստի գործիչներ (Քեյթի Փերին, Ուիլ-այ-էմը, Փրիանկա Չոպրան, Հյու Ջեքմենը, Նիկոլ Շերզինգերը, Քորտնի Կոքսը, Քրեյգ Դեյվիդը, Ադամ Լամբերտը և այլոք), ինչպես նաև լրագրողներ աշխարհի տարբեր ծայրերից:
Բոլորի անհատական ձայնագրություններն այնուհետև կօգտագործվեն «Իմեջին» երգի բազմալեզու «համաշխարհային» տարբերակի համար, որը կստեղծվի հայտնի դիջեյ Դավիդ Գետայի կողմից և կթողարկվի 2014 թվականի Նոր տարվա գիշերվա նախաշեմին։ Յուրաքանչյուր վերբեռնված ձայնագրություն նաև նպաստում է դրամական միջոցների հանգանակմանը, որի շնորհիվ 150 երկրներում կիրականացվեն երեխաների պաշտպանություն և օգնություն ապահովող ծրագրեր։
Կոմպոզիտոր Արմեն Մարտիրոսյանը նշեց, որ լինելով 3 երեխայի հայր և պապիկ, ինչպես ցանկացած ծնող, մտահոգված է երեխաների ապագայով:
Անդրադառնալով «Իմե՛ջին» երգի հայաստանյան տարբերակին, կոմպոզիտորը նշեց.
«Ես փորձում եմ երգի միջոցով դրական լիցքերը հաղորդել: Ինձ հանձնարարվեց վերատադրել, գործիքավորել և նոր ձևով ներկայացնել լեգենդար Ջոն Լենոնի հայտնի «Իմեջին» երգը: Ես պատիվ ունեցա այդ երգին մի քիչ հայկական համ ու հոտ հաղորդել՝ չփոխելով իր սկզբնական փայլը: Կարծում եմ դա ինձ հաջողվեց»: Նրա խոսքերով՝ շատ արդյունավետ համագործակցություն է ստացվել ՄԱԿ-ի մանկական հիմանդրամի հետ:
Նշենք, որ երգի ստեղծմանն աջակցել են պրոդյուսերներ Արմեն Մարտիրոսյանն ու Հրաչ Քեշիշյանը, մասնակից երգիչների թվում են՝ ՅՈՒՆԻՍԵՖ-ի բարի կամքի դեսպան Ալլա Լևոնյանը, կանադահայ օպերային երգչուհի Իսաբել Բայրակդարյանը, «Սիսթեմ օֆ ը դաուն» խմբի մեներգիչ Սերջ Թանկյանը, «Դորիանս» խմբի մեներգիչ Գոռ Սուջյանը, Արտո Թունբոյաջյանը, Տիգրան Պետրոսյանը, ինչպես նաև «Հայաստանի փոքրիկ երգիչներ» երգչախումբը:
«Երգի ուղերձն այն է, որ երեխաների պատկերացրած աշխարհը մենք մեծերս չաղավաղենք, այլ դա իրականություն դրաձնենք: Չէ որ մենք բոլորս մանուկ ենք եղել: Ի դեպ նշեմ, ես շատ հպարտ եմ, որ ՄԱԿ-ի գրասենյակն այդպիսի վիճակագրություն է ներկայացնում: Պետք է ասեմ, որ այդպիսի երջանիկ մանկություն, որ այստեղ է, ես ոչ մի տեղ չեմ տեսել: Ես համարում եմ, որ հայ երեխան Հայաստանում իրեն շատ երջանիկ է զգում՝ անկախ դժվարություններից, սոցիալական վիճակից»,-ասաց Արմեն Մարտիրոսյանը:
ՅՈՒՆԻՍԵՖ-ի բարի կամքի դեսպան Ալլա Լևոնյանը նշեց, որ հիմնադրամը տարբեր ուղղություններով աշխատանքներ է իրականացնում, ինքն էլ փորձում է հիմնադրամի և հասարակության միջև միջնորդ լինել:
«Լինելով 3 երեխայի մայր, ցանկանում եմ, որ բոլոր երեխաները առողջ լինեն, ապահովված լինեն ընտանիքում, ունենան ներդաշնակ, ապահով կյանք, ընտանիքում էլ տեսնեն ժպտացող, այլ ոչ թե վիճող ծնողներ: Ես ուզում եմ, որ մենք բոլորս մեր հասարակության մեջ լավ լինենք, ժպտանք, սիրենք իրար ու երջանիկ ապրենք»,-ասաց Ալլա Լևոնյանը:
Նշենք, որ միջոցառմանը ներկա էին ավելի քան 300 հյուրեր՝ տեղական և միջազգային կազմակերպությունների ներկայացուցիչներ, ինչպես նաև արվեստի գործիչներ և երեխաներ:
Լրահոս
Տեսանյութեր
Ի դեմս Ադրբեջանի՝ այսօր աշխատում է Թուրքիան, սա նոր երևույթ է, որը պետք է գիտակցենք. Դեմոյան