ԵԽ նախարարների կոմիտեի նախագահը ապրիլին կայցելի Հայաստան
Ստրասբուրգում Եվրոպայի խորհրդի խորհրդարանական վեհաժողովում Նախարարների կոմիտեի կատարած աշխատանքը ներկայացրեց Բելգիայի արտաքին գործերի նախարար Դիդիեր Ռեյնդերսը՝ որպես ԵԽ նախարարների կոմիտեի նախագահող։
Ռեյնդերսն իր ելույթում կարևորեց ռադիկալիզմի դեմ պայքարը, որը տանում է դեպի ահաբեկչություն։ ԱԳ նախարարը նշեց, որ Ուկրաինայում իրավիճակը շարունակում է մնալ մտահոգիչ․«Կարևոր է, որ բոլոր կողմերը լիովին և հավատարմորեն իրականացնեն Մինսկի հուշագիրը»։
Դիդիեր Ռեյնդերսը նշեց, որ որպես ԵԽ նախարարների կոմիտեի նախագահ մտադիր է ապրիլի վերջին այցելել Հայաստան և Ադրբեջան, ինչպես նաև Արևմտյան Բալկաններ, որոնց ընթացքում հատուկ ուշադրություն է դարձվելու տարբեր կազմակերպությունների միջև ներդաշնակությանը։
Ելույթից հետո պատգամավորները հնարավորություն ունեին հարցեր ուղղել ԵԽ նախարարների կոմիտեի նախագահողին։ ՌԴ պատվիրակության անդամը հարց ուղղեց, թե ԵԽ-ում նշվում է Աուշվիցի համակենտրոնացման ճամբարի ազատագրման 70-ամյակը, սակայն որևէ մեկ բառ չասվեց, թե ով է ազատագրել այն․ «Աուշվիցն ազատագրվել է ուկրաինացիների, հայերի, հրեաների և այլ զորքերի կողմից»։
Հարցին ի պատասխան Ռեյնդերսն ասաց, որ սովետական զորքերի դերը Աուշվիցի ազատագրման գործում ոչ միայն նշվել է, այլ նաև ողջունվել։
Ադրբեջանի պատվիրակության անդամը Դիդիեր Ռեյնդերսին խնդրեց աջակցել Լեռնային Ղարաբաղում զինված ուժերի կողմից ձերբակալված դիվերսանտներ Դիլգամ Ասքերովի և Շահբազ Գուլիևին ազատ արձակել, ովքեր դատապարտվել են համապատասխանաբար ցմահ և 22 տարվա ազատազրկման։
Դիդիեր Ռեյնդերսն ակնհայտորեն շփոթվեց հարցից և պատասխանեց, որ այն ԵԽ նախարարների կոմիտեի գործուներության մեջ չի ընդգրկվել և տեղեկություն չունի այդ անձանց մասին, սակայն խոստացավ ճշտումներ կատարել և Հայաստանի իշխանությունների հետ խոսել այս մասին՝ ապրիլին Հայաստան կատարելիք այցի ընթացքում։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին