Ձեր վստահելի աղբյուրը

Այսօր ամփոփվեցին տարվա «Լավագույն համայնք 2007» մրցանակաբաշխության արդյունքները: Այն կազմակերպում է «Հայաստանի համայնքների հանրապետական ասոցիացիան»: «Մրցանակաբաշխությունն անցկացվում է տարածքային կառավարման նախարարության ու մեր ասոցիացիայի համատեղ ուժերով: Այն նպատակ ունի ավելի թափանցիկ ու հրապարակային դարձնել համայնքների գործունեությունը»,-այսօր միջոցառման ժամանակ ասաց ասոցիացիայի նախագահ Էմին Երիցյանը:

Ըստ նրա այս մրցանակաբաշխության հաղթողներին դժվար էր առանձնացնել, քանի որ բոլոր մասնակից համայնքները տարվա ընթացքում շատ լավ են աշխատել: Սակայն ասոցացիան հստակ չափանիշներ է մշակել, ըստ որի էլ, կարողացել են որոշում կայացնել:«Լավագույն համայնք-2007» մրցանակաբաշխությունում լավագույն թաղային համայնք անվանակարգում հաղթել է Երևանի Ավան համայնքը, լավագույն քաղաքային համայնք ճանաչվել է Արմավիր քաղաքը և լավագույն գյուղական համայնք է ճանաչվել Շիրակի մարզի Մեղրաշեն համայնքը:

Լավագույն համայնքները, որպես նվեր, ասոցացիայի կողմից ստացան ֆաքսի ապարատներ: Ըստ Է. Երիցյանի, մրցույթն անցկացվում է 2 փուլով: Առաջին փուլում հանձնաժողովի յուրաքանչյուր անդամ ըստ սահմանած չափանիշների 20 բալանոց համակարգով գնահատում է ներկայացված հայտերը: Այս փուլիս հետո առանձնացվում են ամենաշատ միավորներ ստացած 3-5 համայնքները:

Երկրորդ փուլում հանձնաժողովը հայտերը գնահատում է բովանդակային գնահատման արդյունքում` հաշվի առնելով նաև 1-ին փուլում հավաքած բալերը: Ըստ հանրապետության փոխվարչապետ և ՀՀ տարածքային կառավարման նախարար Հովիկ Աաբրահամյանի, այս առողջ մրցակցության մթնոլորտում բոլոր համայնքերը կցանկանան առաջ ընթանալ: «Համայնքերի բարելավումը կբերի երկրի բարելավման: Չի կարելի սահմանափակվել միայն մայրաքաղաքով, հարկավոր է զարգացնել ու բարելավվել բոլոր համայնքները: Դրա համար էլ, կառավարությունը համագործակցում է ասոցիացիայի հետ: Մենք համայնքերին ընդունում ենք որպես գործընկեր»,-նշեց նա:
Նշենք, որ 2006 թվականի լավագույն համայնքներ են ճանաչվել Երևանի Նոր Նորք թաղային համայնքը, Գյումրի քաղաքն ու Շիրակի մարզի Փանիկի գյուղական համայնքը: