Ձեր վստահելի աղբյուրը

Ամեն տարի այս օրերին Սեյսմիկ պաշտպանության ազգային ծառայության աշխատակիցները ստիպված են լինում հասարակության շրջանում առաջացած խուճապը ցրել` հայտարարելով, որ երկրում սեյսմիկ իրավիճակը կայուն է: Այսօր Սեյսմիկ պաշտպանության ազգային ծառայության ղեկավար Ալվարո Անտոնյանն ինքն անձամբ հայտարարեց, որ երկրաշարժի վտանգ Հայաստանում չկա: Նրա խոսքով, իրենց ծառայության 150 կայանների աշխատակիցները հետևում են հանրապետությունում սեյսմիկ իրավիճակը և դրանց տվյալները փոխանցում կենտրոն, որտեղ էլ ամփոփվում են և վերջնական պատկեր ստանում: Անտոնյանի խոսքով, իրենք կանխատեսում չեն կարող անել, բայց կարող են իրավիճակը գնահատել: «Աշխարհում դեռ ոչ մի նման ծառայություն չկա, որ կանխատեսում անի, թե որտեղ և երբ է երկրաշարժ լինելու: Մենք կարող ենք միայն գնահատել ընթացիկ սեյսմիկ իրավիճակը»,- վստահեցրեց Սեյսմիկ պաշտպանության ազգային ծառայության ղեկավարը:

Անտոնյանը նկատեց, որ բնակչության շրջանում արհեստականորեն առանց որևէ օբյեկտիվ հիմքերի առաջացրած խուճապը անբավարար իմացության հետևանք է: «Այն լուրերը, որով ասում են, թե կլինի երկրաշարժ, ստահոդ են»,- հավելեց բանախոսը:
Նա չի բացառում և փաստում է, որ ուժեղ երկրաշարժերը միևնույն օջախում կրկնվում են, դա ըստ նրա, օրինաչափություն է և երկրաշարժագիտության մեջ նման օրենք կա: 5, 5-6, 5 մագնիտուդով երկրաշարժերը կարող են կրկնվել 35-ից 60 տարի պարբերականությամբ: Իսկ ահա Սպիտակի նման երկրաշարժերը` 8-ից ավել մագնիտուդով, կարող են կրկնվել մի քանի հարյուր տարին մեկ անգամ: «Բայց դա չի նշանակում, որ 30 տարի հետո նույն օրը նույն ժամին կարող է երկրաշարժ լինել»,- նկատեց Ալվարո Անտոնյանը: Նրա խոսքով, Սպիտակի ավերիչ երկրաշարժից հետո մեր պետությունը որոշակի դաս արդեն քաղել է և ստեղծել է Սեյսմիկ պաշտպանության ազգային ծառայություն, որն էլ ուսումնասիրություններ է կատարում և գնահատում է սեյսմիկ իրավիճակը: Բայց, թերևս, միայն դա:

Ալվարո Անտոնյանի խոսքով, Երևանում երկրաշարժի ռիսկը շատ մեծ է, քանի որ իրենց տվյալներով, եթե մայրաքաղաքում ուժեղ երկրաշարժ (9 բալանոց) լինի 300 հազար մարդ կմահանա: «Բնակֆոնդը համարյա 90 տոկոսով կվերանա»,- ասաց նա ու անմիջապես էլ հավելեց, որ իրենք դրան մեծ ուշադրություն են դարձնում և որ դրա համար է հայրենի կառավարությունը ընդունել «Երևան քաղաքի համար սեյսմիկ ռիսկի նվազեցման ծրագիր»: Հարցին, թե Երևանի կենտրոնում, մասնավորապես Հյուսիսային Պողոտայում կառուցվող բարձրահարկերը սեյսմակայո՞ւն են և համապատասխանո՞ւմ են արդյոք համապատասխան նորմերին, Անտոնյանը Հյուսիսային Պողոտայի մասով չմասնավորեցրեց, բայց նկատեց, որ Երևանում ոչ բոլոր շենքերն ու շինություններն են համապատասխան նորմերով կառուցված: «Ոչ բոլոր կազմակերպություններն են շենքերի համար դիմել և սեյսմակայունության վերաբերյալ հաստատում ստացել: Որոշ կառուցապատողներ դիմել են, բայց մեծամասամբ չեն դիմել»,- հավելեց Անտոնյանը:

Նրա ասելով, իրենք կամավոր սկզբունքներով շենք-շինությունների սեյսմակայունության վերաբերյալ ուսումնասիրություն չեն կատարում: Կազմակերպությունը պետք է դիմի իրենց: Ինչ վերաբերում է խոսակցություններին, թե ձմռան ընթացքում տաք եղանակները կարող են նպաստել երկրաշարժ լինելուն, Ա. Անտոնյանը դա հերքեց և պնդեց, որ ջերմաստիճանային փոփոխությունը կամ եղանակի տաքացումը երկրաշարժ չի առաջացնի:

Երևանի կենտրոնում Արա Աբրահամյանի կողմից 21 հարկանի հյուրանոցի կառուցելու համար Սեյսմիկ պաշտպանության ազգային ծառայությանը դիմել են համապատասխան ուսումնասիրություն կատարել ու համար հնչած հարցին, Ալվարո Անտոնյանը պատասխանեց, որ իրենց չեն դիմել այդ հարցով ու հավելեց. «Երևանի կենտրոնում այսօր շենքերի հարկայնությունը սահմանափակված է 14 հարկով: Բայց դրանից ավել կարելի է կառուցել, եթե կատարվել է սեյսմակայունության հաշվարկ»:

Նրա խոսքով, մեծ խնդիր է նաև այն, որ հանրությունը համապատասխան գիտելիքներ չունի պաշտպանվելու երկրաշարժերի ժամանակ: Ալվարո Անտոնյանը փաստեց, որ համապատասխան գիտելիքներ ունենալու դեպքում երկրաշարժի ժամանակ զոհերի թիվը 30 տոկոսով քիչ է լինում: