Ձեր վստահելի աղբյուրը

Համաշխարհային Հայկական Կոնգրեսը, կրթության և գիտության նախարարության աջակցությամբ, փետրվարի 15-ից մինչև հունիսի 1-ը անցկացնում է «Մենք եղել ենք, մենք կանք, մենք կլինենք» խորագրով մրցույթ: Մրցույթի շրջանակներում ուսանողների և աշակերտների համար կանցկացվի «Իմ հեռու, իմ մոտ, իմ սուրբ Հայաստան» վերնագրով լավագույն գրական ստեղծագործության ամենամյա միջազգային մրցույթ: Այս մասին տեղեկացանք Կրթության և գիտության նախարարության տեղեկատվության և հասարակայնության հետ կապերի վարչությունից:

Ըստ աղբյուրի, մրցույթի հիմնական նպատակն է Հայաստանի, Արցախի և հայկական սփյուռքի ուսանողներին ու աշակերտներին հաղորդակից դարձնել հայ ժողովրդի պատմական անցյալին, հավատ սերմանել նրա ապագայի հանդեպ։ «Մրցույթը կնպաստի Հայաստան-Սփյուռք հարաբերությունների զարգացմանը, ազգային միասնության ապահովմանը, խթան կհանդիսանա հայապահպանման գործին, կօժանդակի հայ մշակույթի, հայոց լեզվի և հայ գրականության ճանաչմանն ու տարածմանը»,- ասաց նախարարության տեղեկատվության և հասարակայնության հետ կապերի վարչության պետ Արթուր Բաղդասարյանը:

Նա նշեց, որ մրցույթին կարող են մասնակցել Հայաստանի Հանրապետության, Արցախի և հայկական սփյուռքի ուսանողներն ու 9-11-րդ դասարանների աշակերտները։ Յուրաքանչյուր մասնակից իրավունք ունի մրցույթին մասնակցել մեկ ստեղծագործությամբ՝ շարադրությամբ, բանաստեղծությամբ, պատմվածքով, ակնարկով, հրապարակախոսությամբ և այլն։ Մրցույթին մասնակցելու իրավունք են ստանում միայն նշված ժամկետում ուղարկված, թեմային ներկայացվող պահանջներին համապատասխանող, համակարգչով հավաքված աշխատանքները:

Ա. Բաղդասարյանը տեղեկացրեց, որ մրցույթին ներկայացված աշխատանքները պետք է բացահայտեն առաջարկվող թեմայի կարևորությունը հայերիս համար, այն, որ այս գաղափարի շուրջն էլ պետք է միավորվեն աշխարհով մեկ սփռված հայերը: Նա հայտնեց, որ ցանկալի է, որ մրցույթի մասնակիցներն իրենց աշխատանքներում կարողանան ներկայացնել` ինչպե՞ս են պատկերացնում իրենց ներդրումը մեր հայրենիքի բարգավաճման, միասնական պետականության պահպանման գործընթացում: Վարչության պետի խոսքերով, մրցույթն անցկացնելու նպատակով ձևավորվում է կազմկոմիտե։ Մրցույթի արդյունքները ուսանողների և աշակերտների համար կամփոփվեն առանձին-առանձին:

Ներկայացվող աշխատանքները պետք է լինեն գրագետ, հստակ, տրված թեմային համապատասխան: Մրցութային աշխատանքները կարելի է ներկայացնել հայերեն, ռուսերեն և անգլերեն, մինչև հունիսի 1-ը: Հայաստանից, Արցախից և ԱՊՀ երկրներից ներկայացված աշխատանքներն ընդունվում են միայն հայերեն և ռուսերեն, անգլերեն աշխատանքներ ընդունվում են միայն հեռավոր արտերկրից։

Ներկայացված աշխատանքների ծավալը չպետք է գերազանցի 2 համակարգչային էջը։ Աշխատանքները կարող են ներկայացվել նաև էլեկտրոնային տարբերակով։ Աշխատանքները կարող են ներկայացվել նաև անձամբ կամ ուղարկվել փոստով։

Վարչության պետը նշեց, որ մրցույթում առաջին երեք տեղերը շահած ուսանողները և աշակերտները կպարգևատրվեն համակարգիչներով, իսկ առանձին անվանակարգերում հաղթողները՝ արժեքավոր նվերներով, պատվոգրերով։

Մրցույթի արդյունքների ամփոփման և հաղթողների պարգևատրման արարողությունը տեղի կունենա Երևանում, հոկտեմբերին` «Համաշխարհային հայկական կոնգրեսի և Ռուսաստանի հայերի միության օրերը Հայաստանում և Արցախում» ծրագրի շրջանակներում։