Ձեր վստահելի աղբյուրը

Քառասուներեքամյա ազգությամբ թուրք Սերդեր Կայան դատի է տվել Թուրքիայի կրթության նախարարությանը, մասնավորապես կրթության նախարարին՝ երեխաների շրջանում հայատյացություն սերմանելու համար: Կայան շատ է բարկացել, որովհետև իր 11-ամյա աղջիկը ստիպված է եղել դպրոցում դիտել ինչպես ինքն է ասել «շատ արյունալի քարոզչական մի կինոնկար»: Բրիտանական BBC News-ը օրերս մի ռեպորտաժ է թողարկել, որտեղ պատմվում է, թե ինչպես է Թուրքիայի կրթության նախարարությունը վերջին ամիսներին երկրի բոլոր դպրոցներում տարածում Սարի Գելին կամ «Շիկահեր հարսնացու» տեսաֆիլմը: Ըստ BBC News-ի, տեսաֆիլմի միջոցով Թուրքիան փորձ է անում քարոզել, որ պնդումները, թե 1915-ին Օսմանյան Թուրքիան հայերի դեմ ցեղասպանություն է կատարել, «անհիմն են»:

DVD տարբերակով տեսաֆիլմը ուղարկվել է բոլոր միջնակարգ դպրոցներին և ուսուցիչներին հրահանգ իջեցվել, որպեսզի այն ցուցադրեն երեխաներին: Սերդեր Կայանի դստեր դպրոցում վեց տարեկան երեխաները նույնիսկ, ստիպված են եղել դիտել ֆիլմը:

«Այդ տեսաֆիլմը դեռահասների համար չէ, հանգիստ թողեք երեխաներին», - BBC-ի ռեպորտաժում ասել է երեխայի հայրը՝ Սերդեր Կայան ու հավելել. «Նրանք խտրականություն են սերմանում մարդկանց մեջ, երեխաների մեջ: Իմ երեխան այդ թշնամանքի մաս չպետք է դառնա», - հավելել է Կայան:

Պարոն Կայան դիմել է դատարան և դատի տվել Կրթության նախարար Հուսեյն Սելիկին՝ պնդելով, որ երեխաներին ցուցադրվող տեսաֆիլմը ատելություն է սերմանում հայերի նկատմամբ:

Անցյալ ամիս կրթության նախարարությունը հայտարարել էր, թե դադարեցրել է DVD-տեսասկավառակը տարածել դպրոցներին, բայց ինչպես BBC-ն է հաղորդում, ուսուցիչները շարունակում են այն ստանալ:

Ըստ BBC-ի տվյալների, ներկայումս Թուրքիայում, մասնավորապես, Ստամբուլում ապրում է 50 հազար հայ:

Ի՞ՆՉ Է ՔԱՐՈԶՈՒՄ ԹՈՒՐՔԱԿԱՆ ՖԻԼՄԸ

Թուրքական Սարի Գելինը ներկայացնում է թուրքական իշխանությունների դիրքորոշումը 1915-ի դեպքերի մասին, ըստ որի, Առաջին աշխարհամարտի տարիներին հայերը չեն ընդունել Օսմանյան Կայսրության բարեհաճությունը և օտար ուժերի հետ միասին ներխուժել ու հազարավոր թուրքեր ոչնչացրել: Կինոնկարը նաև ասում է, որ հայերը «իրենց գործողությունների հետևանքով են տեղափոխվել»:
«Ոչ մի խոսք չկա այն մասին, որ հազարավոր հայեր կորել կամ սպանվել են անապատում, աքսորի ժամանակ», - հաղորդել է BBC-ն:

««Հայ» բառը ֆիլմում օգտագործվում է շատ անգամ և միշտ՝ բացասական երանգով», - BBC-ին ասել է Հրանտ Դինք հիմնադրամի տնօրենների խորհրդի անդամ Այսե Գյուլ Ալթինան: Ի դեպ, հիմնադրամը նույնպես մտադիր է դիմել դատարան՝ Սարի Գելինը դպրոցներից դուրս մղելու համար:

«Այդ գրաֆիկական ֆիլմը մարդկանց ցուցադրելով և պարբերաբար կրկնելով, թե հայերը թուրքերին ծեծել ու բռնացել են նրանց նկատմամբ, և սպանել կանանց ու երեխաներին, շատ վտանգավոր է: Մենք մտահոգ ենք՝ դա նոր ատելություն կարող է ծնել», - ասել է տիկին Ալթինան:

Սերդեր Կայանի դստեր դպրոց հաճախող երեխաների ծնողների կարծիքը նույնն է ֆիլմի մասին՝ նրանք չեն ուզում, որ իրենց երեխաները դիտեն նման դաժանությամբ ֆիլմ: Սակայն նույն դպրոցի ուսուցիչներից մեկը BBC-ին նման տեսակետ է հայտնել. «Մենք ուսուցանում ենք երեխաներին, թե ովքեր են մեր թշնամիները և որ երկրներն են փորձել բաժանել մեր տարածքը, բայց մենք նրանց չենք ուսուցանում հայերի մասին: Այնպես որ ես կարծում եմ, որ այս ֆիլմը լավն է և օբյեկտիվ»:

Այնուհետև BBC-ին հիշատակել է ԱՄՆ նախագահական ընտրություններում նախագահ Բարաք Օբամայի արած հայտարարությունն այն մասին, թե ինքը խոստանում է ճանաչել Հայոց ցեղասպանության փաստը:

«Մինչ Թուրքիան փորձում է առևտրային և դիվանագիտական հարաբերություններ հաստատել հարևան Հայաստանի հետ, այս ֆիլմի տարածումը ցույց է տալիս, որ երկխոսություն չկա, և Թուրքիան այժմ առավել, քան երբևէ փակ է երկխոսություն սկսելու համար: Կրթության նախարարությունը Սարի Գելինը համարում է հավասարակշռված պատմություն, բայց պարզ է, որ դա «մեսիջ» է թուրքական դպրոցահասակ երեխաներին, որ հայերը դավաճաններ են և իրենց թշնամին»,- հաղորդել է BBC-ն:

Հ.Գ. Սարի Գելին մի լեգենդ է ըստ որի, թուրք-մուսուլման մի տղա տեսնում է քրիստոնյա հայ մի աղջկա և սիրահարվում նրան: Սակայն նրանց կրոնների տարբեր լինելու պատճառով երկուսի ծնողները չեն թողնում, որպեսզի երիտասարդներն ամուսնանան: Եվ երիտասարդները փախչում են տնից, սակայն աղջկա հայրը գտնում է նրանց ու իր օգնականների միջոցով սպանում տղային: