Ամենայն Հայոց Կաթողիկոսը հանդիպել է Ադրբեջանի նախագահին
Բաքվում Ամենայն Հայոց Կաթողիկոս Գարեգին Բ-ն նախօրեին հանդիպել է Ադրբեջանի նախագահ Իլհամ Ալիևի հետ: Ինչպես տեղեկացրին Մայր Աթոռ Ս. Էջմիածնի Տեղեկատվական համակարգից, հանդիպմանը ներկա են եղել Կովկասի մահմեդականների վարչության նախագահ Շեյխ Ուլ Իսլամ Ալլահշուքյուր Փաշա Զադեն, Մայր Աթոռ Սուրբ Էջմիածնի Միջեկեղեցական հարաբերությունների պատասխանատու Տ. Եզնիկ արքեպիսկոպոս Պետրոսյանը և Տեղեկատվական համակարգի տնօրեն Տ. Վահրամ քահանա Մելիքյանը:
Տեղեկատվությն համաձայն, մեկ ժամ տևած հանդիպմանը անկաշկանդ և անկեղծ մթնոլորտում խոսվել է Բաքվում գումարված Կրոնապետերի համաշխարհային գագաթնաժողովի մասին և կարևորվել կրոնների և մշակույթների երկխոսությունը` ի խնդիր ժողովուրդների համար ավելի խաղաղ, ապահով ու բարօր կյանքի կերտման: Այնուհետև կողմերն անդրադարձել են Լեռնային Ղարաբաղի հակամարտությանն առնչվող հարցերին: Այս առումով կողմերը ողջունել են հակամարտության խաղաղ կարգավորմանն ուղղված ջանքերը, դրանցում կարևոր նկատելով կրոնապետերի և հոգևոր սպասավորների դերը: Մեծ նշանակություն են տրվել երկու ժողովուրդների փոխայցելություններին և շփումներին, որոնք ավելի պիտի զորացնեն փոխվստահության և համագործակցության ոգին:
Նույն օրը Ամենայն Հայոց Կաթողիկոսը շքախմբի ուղեկցությամբ այցելել է Բաքվի Ս. Գրիգոր Լուսավորիչ հայկական եկեղեցի, որը ներկայիս գործածվում է իբրև գրապահոց: Նորին Սրբությունը ծանոթացել է 1990թ. հրդեհից վնասված եկեղեցու վիճակին և հույս հայտնել, որ Աստծո ողորմությամբ եկեղեցին վերստին դռները կբացի հավատացյալների առջև` շարունակելով իր առաքելությունը: Ապա եկեղեցում տասնամյակներ անց հնչել է հայոց աղոթքն ու շարականը:
Երեկոյան, Ադրբեջանի նախագահի կողմից կրոնապետերին ի պատիվ տրված ճաշկերույթից հետո Գարեգին Բ Ամենայն Հայոց Կաթողիկոսը վերադարձել է Մայր Աթոռ Սուրբ Էջմիածին: Օդանավակայանում Նորին Սրբությանը ճանապարհել են Կովկասի մահմեդականների վարչության նախագահ Շեյխ Ուլ Իսլամ Ալլահշուքյուր Փաշա Զադեն, Ադրբեջանի Կրոնից նախարարը և Ռուս Ուղղափառ Եկեղեցու ներկայացուցիչը:
Բաքվում գագաթնաժողովի աշխատանքներին կշարունակեն մասնակցել Տ. Եզնիկ արքեպիսկոպոս Պետրոսյանը և Տ. Հովակիմ եպիսկոպոս Մանուկյանը:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
