Ձեր վստահելի աղբյուրը

Այսօր Վայրի բնության համաշխարհային հիմնադրամի /WWF/ հայաստանյան գրասենյակի տնօրեն Կարեն Մանվելյանը լրագրողների հետ հանդիպման ժամանակ հայտարարեց, որ Խոսրովի արգելոցի վերաբերյալ sos հնչեցնելու հեղինակն իրենց գրասենյակը չէ, այլ Մարիամ Սուխուդյանը, ով իր հայտարարության ներքո հիմնադրամի մամուլի խոսնակի կոնտակտային տվյալներն է թողել: Մանվելյանը դա պրովոկացիա համարեց:

«Այս հաղորդագրությունը կազմել է Մարիամ Սուխուդյանը, փոխարեն իր կոնտակտային տվյալները դնելու, դրել է Արթուր Խոյեցյանի համարները, ես կարծում եմ, որ դա հատուկ կատարած պրովոկացիա է, փորձելով մեր հարաբերությունները փչացնել բնապահպանության նախարարության ու պարտնյոր կազմակերպությունների հետ: Մենք տեղյակ ենք խնդրին, ամպագոռգոռ հայտարարություններով չէ, այլ ամենօրյա քրտնաջան աշխատանքներով»,-այսօր հայտարարեց Մանվելյանը: Նրա խոսքով, իրենք պահանջելու են, որ Սուխուդյանը հրապարակայնորեն ներողություն խնդրի իր ասածների ու իրենց հասցեին արված «վարկաբեկող տվյալների համար», եթե դա չլինի, ապա ասաց, որ կդիմեն դատարան:

Հիշեցնենք, որ մի քանի օր առաջ` հունիսի 10-ին տարածած հայտարարության մեջ ասվում էր. ««Խոսրովի Անտառ» պետական արգելոցում նորից սկսվել է ռեՍՏՈՐանաշինարարությունը: Անտառապահի կողմից կենդանիների բնաջնջումը հերիք չէր, այժմ էլ կանաչ տարածքների, դարավոր ընկուզենիների, մշտադալար բարդիների հաշվին սկսել են կառուցապատումը մի անհայտ ապօրինի շինության, որը հավանաբար որսատեղի է լինելու շատ ու շատ հղփացածների համար: Հետաքննություն անցկացրեք, գտնենք մեղավորներին, կանխենք մեր չքնաղ բնության ոչնչացումը: Տարածքում առկա են հին կոթողներ, վանքեր, որոնց հենց կողքին արյունոտ մատաղատեղի են նախատեսում սարքել: Խախտվում են մի շարք ՀՀ օրենքներ: Լռելն անթույլատրելի է»,-ասված է հայտարարության մեջ:

Հեղինակը կոչ է անում ահազանգել բնապահպանության նախարարություն ու խնդրին ավելի մանրամասն ծանոթանալու համար մի քանի հղում է տեղադրել, այդ թվում և հիմնադրամի երևանյան գրասենյակի մամուլի քարտուղարի կոնտակտները:

Panorama.am-ի թղթակցի հետ զրույցում ակտիվիստ Մարիամ Սուխուդյանն ասաց, որ Մանվելյանի իրավունքն է նման հայտարարություններ անելը: «Բայց այն հայտարարությունում, որ ես տարածել եմ, հստակ ասվում է ահազանգել այս-այս ուղղություններով` մեկը բնապահպանության նախարարություն է, մյուսը հիմնադրամինը, որովհետև մենք բոլորս գիտենք, որ իրենք պատասխանատու են Հայաստանի կենսաբազմազանության համար, պրոեկտներ են անում նույն Խոսրովի արգելոցում»,-ասաց նա, ավելացնելով, որ հիմնադրամի երևանյան գրասենյակում սխալ են հասկացել, մտածելով իրենց կոնտակտները նշված են, որպես հեղինակի:

«Ես իմ անունից եմ ուղարկել, իմ մեյլից, ուղղակի իրենց կոնտակտներն է այնտեղ նշված: Եթե իրենք սխալ են հասկացել կամ այլ կերպ են մեկնաբանում, դա նրանց խնդիրն է»,-ասաց Մարիամը, նշելով, որ գրասենյակը բազմաթիվ ահազանգեր է ստանում Խոսրովի արգելոցում իրականացվող շինարարության վերաբերյալ, իսկ սոցիալական «Ֆեյսբուք» ցանցում Մարիամի նախաձեռնած պայքարը, իր իսկ խոսքով, նոր թափ է ստանում, դրան միացել են նաև արտասահմանում ապրող հայ երիտասարդները:

«Այդ ահազանգերից, իրենք նման ռեակցիա պետք է ցույց տային»,-ասաց նա:

Ինչ վերաբերում է հրապարակայնորեն ներողություն խնդրելուն, ապա Սուխուդյանն ասաց, որ նման բան ինքը չի անի, դրա համար հիմքեր էլ չկան, քանի որ ինքն ուղղակի մատնացույց է արել այն կառույցները, որտեղ կարելի է ահազանգել, իսկ վարակբեկիչ տվյալների մասով Մարիամն ասաց, որ ինքն ուղղակի լրատվամիջոցներից լինքեր է տարածել:

«Ակտիվիստի հետևից ընկնելու փոխարեն թող իրենք աշխատեն»,-ասաց Մ. Սուխուդյանը: