Ձեր վստահելի աղբյուրը

Եվրասիա համագործակցություն հիմնադրամի Հետազոտական ռեսուրսների կովկասյան կենտրոններ (ՀՌԿԿ) ծրագրի հայաստանյան կենտրոնն այսօր հրապարակեց 2009 թվականի աշնանը Հայաստանի, Վրաստանի և Ադրբեջանի շուրջ 6000 տնային տնտեսություններում իրականացրած ընտրանքային հետազոտության որոշ արդյունքներ:

Հետազոտական ռեսուրսների կովկասյան կենտրոններ (ՀՌԿԿ) ծրագրի հայաստանյան կենտրոնի տնօրեն Հեղինե Մանասյանը նշեց, որ այս հետազոտության ընթացքում պատահականորեն ընտրված չափահաս հարցվողները պատասխանել են ավելի քան 120 հարցերի:
Նրա խոսքով, ՀՌԿԿ-ի կողմից երեք երկրներում` Հայաստանում, Վրաստանում և Ադրբեջանում միասնական հարցումներն իրականցվում են 2004 թվականից սկսած: «Միասնական մեթոդաբանությամբ միաժամանակ իրականացվող հարցումների նպատակն է հարավկովկասյան երկրներում սոցիալական, քաղաքական և տնտեսական գործընթացների վերաբերյալ համադրելի և արժանահավատ տվյալների հավաքագրումը»,- հավելեց նա:

Նրա խոսքով, հարցումները բացառիկ հնարավորություն է տալիս համեմատելու Հայաստանում, Ադրբեջանում և Վրաստանում առկա կացությունը, հետևելու դրա տարեցտարի զարգացումներին:

ՀՀ Էկոնոմիկայի փոխնախարար Արա Պետրոսյանը կարևորելով հետազոտության արդյունքները, նշեց, որ տեղեկատվության հավաքագրումը և վերլուծությունը անհրաժեշտ նախապայման են որոշումներ կայացնելու, ռազամավարություններ, քաղաքականություններ մշակելու և նպատակային գործողություններ իրականացնելու համար:

Նրա խոսքով, կատարված հետազոտությունները կարող են օգտակար լինել տնտեսության տարբեր ոլորտներում և հասարակական կյանքում բարեփոխումները ճիշտ ուղղորդելու համար: «Ողջունելի է Հետազոտական ռեսուրսների կովկասյան կենտրոնների տարիներ շարունակ իրականացվող հետազոտական աշխատանքը, որի արդյունքում բավական հետաքրքիր տվյալներ են հրապարակում Հարավային Կովկասի երեք երկրների հանրային կյանքի և սոցիալ-տնտեսական իրավիճակի վերաբերյալ»,- ասաց նա:

Հեղինե Մանասյանը ներկայացնելով հետազոտության արդյունքները նշեց, որ 2009թ. հավաքագրված տվյալներից ակներև է, որ թեև հարավկովկասյան բոլոր երկրներում էլ համընդհանուր մտահոգության առարկա են շարունակում մնալ գործազրկությունը, աղքատությունը, կոռուպցիան, արտաքին աշխարհաքաղաքական իրավիճակը, այդ հիմնախնդիրների առաջնայնությունը նկատելիորեն տարբեր է: Այսպես, Հայաստանում հարցվածներին ամենից ավելի հուզում է գործազրկությունը և կոռուպցիան, Վրաստանում` գործազրկությունը և խաղաղությունը, իսկ Ադրբեջանում` տարածքային ամբողջականությունը և գործազրկությունը:

Բանախոսը ներկայացնելով արդյունքները, նշեց, որ շրջապատող տնային տնտեսությունների համեմատ իրենց տնտեսական կացությունը միջին են համարել Հայաստանում հարցվածների 61%-ը, Ադրբեջանում և Վրաստանում հարցվածների 51 և 52 տոկոսը: Մեկից տասը միավորանոց սանդուղքի վրա իրենց տնտեսությունը բարձր՝ 8-10 միջակայքում են համարել Հայաստանում հարցվածների միայն 1,5 տոկոսը, իսկ ամենաստորին 1-2 միջակայքում` 18 տոկոսը: