Ձեր վստահելի աղբյուրը

«Լռության ձայն» սոցիալական խմբի ներկայացուցիչները` լսողության խանգարումներ ունեցող երիտասարդները, այսօր եկել էին պայքարելու իրենց իրավունքի` տեղեկացված լինելու, համար: Լրագրողների հետ հանդիպման ժամանակ «Լրագրողներ հանուն ապագայի» ՀԿ նախագահ Սուրեն Դեհերյանն ասաց, որ այս հանդիպման համար պատճառ է հանդիսացել ՀՌԱՀ նախագահ Գրիգոր Ամալյանի պատասխան նամակը սոցիալական խմբի ներկայացուցիչներին:

Ներկայացնելով խնդիրը` Ս. Դեհերյանն ասաց, որ մինչև հունվարի 20-ը ժեստերի լեզվի ուղեկցությամբ հաղորդումներ էին հեռարձակվում «Արարատ» և «ԱԼՄ» հեռուստաընկերություններով, որոնցից առաջինը սուրդոթարգմանություն էր տրամադրում մանկական հաղորդումներից մեկի, իսկ վերջինը` լրատվական հաղորդումների ընթացքում:

Հեռուստաընկերությունների` եթերից զրկելու արդյունքում, այս երիտասարդներն ու նրանց նման շատերը այլևս չեն կարողանում տեղեկատվություն ստանալ: «Այս մտահոգությամբ` հունվարի 18-ին մենք բաց նամակով դիմեցինք ՀՌԱՀ նախագահ Գրիգոր Ամալյանին, և այդ նամակի տակ ստորագրեցին «Լռության ձայն» խմբի 16 անդամներ»,-ասաց նա: Նամակի միջոցով երիտասարդները Ամալյանից ցանկացել են իմանալ, արդյո՞ք հունվարի 20-ից հետո նրանք որևէ հեռուստաընկերությամբ հնարավորություն կունենան սուրդոթարգմանությամբ լրատվական ու այլ հաղորդումներ դիտելու:

Ս. Դեհերյանը նշեց` Ամալյանը պատասխան նամակում գրել է, որ ինքը ցավում է «սուրդոթարգմանությամբ լրատվական թողարկման փակման կապակցությամբ», սակայն նշել էր, թե դրանով չի խախտվել խուլ ու համր բնակչության լրատվություն ստանալու իրավունքը, քանի որ հայերեն լուսագրերով ուղորդվող հաղորդումներ կան:

Դեհերյանը նշեց, որ երիտասարդները մեծ ոգոգևորությամբ էին պատրաստել նամակն ու հույս ունեին, որ իրենց կհասկանան: Սակայն, նրա խոսքով, առաջին անգամ խուլերը աղաղակեցին իրենց հոզող խնդրի մասին. արդյունքում` լսողները խուլ գտնվեցին:

Ըստ ասուլիսին ներկա Լսողության խանգարումներ ունեցող կրթահամալիրի սան, 18-ամյա Վահե Ալավերդյանի,  իր ծնողներն ու եղբայրները նույնպես խուլ են ու այժմ, կարծես թե հուսահատված են, քանի որ աշխարհից անտեղյակ են` իրենց տեղեկատվության աղբյուրները չեն գործում: Վահեի հավաստմամբ, լուսագրերով ուղորդվող հաղորդումները նույն տեղեկատվություն չեն կարողանում ապահովել:

Ժեստերի լեզվի ուսուցիչ, թարգմանիչ Զուբեյդա Մելիքյանը թարգմանելով տղայի խոսքը նշեց, որ Վահեի խոսքով, հաճախ, տեքստերը չեն համապատասխանում ներկայացվող պատկերին ու հնարավոր չի լինում այդ արագությամբ հասցնել ընթերցել գրվածը: «Մենք գրագետ ենք, ձեզանից տարբերվում ենք միայն նրանով, որ չենք կարողանում լսել: Բայց մեր իրավունք է տեղեկացված լինելը, ես ցանկանում են իմանալ, թե ինչ է կատարվում աշխարհում ու իմ երկրում: Սակայն, այդ իրավունքից զրկվել եմ: Եթե հնարավոր չէ այնպես անել, որ մենք կարողանանք մեզ հասու տեղեկատվություն տանալ, ապա այնպես արեք, որ լսենք, իսկ խոսքը մենք տեսնում ենք, ինչը հնարավոր է սուրդոթարգմանության ժամանակ»,-ասաց Վ. Ալավերդյանը:

18-ամյա Վահեի մոտ հարց էր առաջացել, եթե այսպես շարունակվի, ապա ո՞վ պետք է իրեն ու իր ընկերներին ասի, թե երկրում սպասվող ընտրությունների ժամանակ ում ընտրեն, քանի որ հնարավորություն չեն ունենալու տեղեկացված լինելու: Վահեի հետ համաձայնեցին նաև ասուլիսին ներկա նրա մյուս ընկերերը, ովքեր կիսեցին նրա արտահայտած մտահոգությունները:

«Լրագրողներ հանուն ապագայի» ՀԿ նախագահ Սուրեն Դեհերյանը նշեց, որ իրենք ամենևին էլ չեն պահանջում այդ հեռուստաընկերությունների աշխատանքը վերականգնել կամ նման բաներ: Պարզապես նրանք ցանկանում են, որ այս մարդիկ էլ կարողանան որևէ հեռուստաալիքով հնարավորություն ունենան տեղեկատվություն ստանալ:

Իսկ Վահեն բոլոր լսողներին խորհուրդ տվեց գոնե մեկ անգամ անջատել հեռուստացույցի ձայնը ու փորձել տեղեկատվություն ստանալ միայն լուսագրերի միջոցով: «Այդ դեպքում, դուք մեզ, երևի, կհասկանաք»,-ասաց նա: