Ձեր վստահելի աղբյուրը

Ազգային ժողովում կոալիցիոն քաղաքական երեք ուժերը ներկայացնող Հանրապետական, «Բարգավաճ Հայաստան» և «Օրինաց երկիր» խմբակցությունները Մարդու իրավունքների պաշտպանի պաշտոնում սատարելու են Կարեն Անդրեասյանի թեկնածությունը: Նոր օմբուդսմենի ընտրությունը հավանաբար կկազմակերպվի հաջորդ շաբաթ մեկնարկելիք ԱԺ քառօրյայի ընթացքում: Մինչ այդ նա հարցազրույց է տվել Panorama.am-ին:

-Ինչպե՞ս ստացվեց, որ համաձայնեցիք ստանձնել Մարդու իրավունքների պաշտպանի պաշտոնը

-Մարդ, որը զբաղվել է միջազգային կազմակերպությունների հետ աշխատանքով, իրավունքի ոլորտում, մասնավոր իրավաբանական ընկերություններում պաշտպանել է մարդու իրավունքները, բնականաբար, նրա համար պատիվ չէր կարող չլինել նման աշխատանքով զբաղվելը:

-Մարդու իրավունքների պաշտպան Արմեն Հարությունյանը իր պաշտոնավարման հինգ տարիների «մեծ արդյունք» էր համարել այն, որ այդ ժամանակահատվածում իր ղեկավարած գրասենյակը չի ձուլվել ոչ ընդդիմությանը և ոչ էլ իշխանությանը: Դուք ինչպե՞ս եք պատրաստվում աշխատել

Նույն սկզբունքով, ավելի հեռանալով քաղաքական շահարկումներից: Հեռանալով ոչ թե քաղաքական գործընթացներից, քաղաքացիական և քաղաքական իրավունքներ պաշտպանելուց, այլ` քաղաքական շահարկումներից:

-Խորհրդարանական ընդդիմությունը, ի դեմս «Ժառանգություն» խմբակցության, հայտարարել է, որ ծանոթ չէ ՄԻՊ նոր թեկնածուի իրավաբանական գործունեությանը

Կարծում եմ շատերը ծանոթ չեն իմ այս կամ այն գործունեությանը և, ես չեմ հավակնում, որ բոլորը ծանոթ լինեին արած գործերին: Բայց շատ կուզենայի հանդիպել «Ժառանգություն» խմբակցության հետ և ներկայացնել իմ կենսագրությունը և գործերը, որոնք ես արեմ եմ, և այդ դեպքում հույս ունեմ, որ իրենք կգտնեն մի արժանիք, որպեսզի ես լինեմ Մարդու իրավունքների պաշտպան:

-Դաշնակցություն խմբակցության հետ հանդիպե՞լ եք, տպավորությո՞ւնը

-Կարծում եմ` ես այնպիսի հարգարժան մարդկանց հետ եմ հանդիպել, որ տպավորությունը չէր կարող բացասական լինել: Քննարկումները, որոնք ունեցել ենք, եղել են կառուցողական մթնոլորտում, բավական անկեղծ ու անմիջական զրույց է եղել, և արդեն տպավորությունը իրենք պետք է ստանան, քանի որ ես եմ ենթակա գնահատականի:

-Ստանձնելով Մարդու իրավունքների պաշտպանի պաշտոնը` Դուք արմատական ընդդիմության քննադատության թիրախում եք հայտնվելու. չե՞ք վախենում այդ քննադատությունից:

-Գիտեք, քննադատությունից ես ընդհանրապես չեմ վախենում` եթե այդ քննադատությունը քաղաքակիրթ է և չի անցնում վիրավորանքի, հայհոյանքի, զրպարտանքի սահմանները: Բայց ես չէի ուզենա, որ կանխորոշվի, թե ընդդիմությունն ամեն դեպքում քննադատելու է: Ես հասկանում եմ, որ կարող է լինել նման հնարավորություն, բայց կանեմ առավելագույնը, որ քիչ տեղ թողնեմ հատկապես ընդդիմության քննադատության համար:

Մարդու իրավունքների առաջին պաշտպան Լարիսա Ալավերդյանը մի առիթով հայտարարել էր, թե Հայաստանում մարդու իրավունքների պաշտպանության առումով իրավիճակը տխուր է: Դուք այդ մասին ի՞նչ կասեք

-Ես, որպես քաղաքացի, կարող եմ ասել, որ մարդու իրավունքների հետ կապված բազում և բազմաթիվ խնդիրներ կան աշխարհի տարբեր երկրներում, նույնիսկ ամենաքաղաքակիրթ երկրներում: Մեր երկրում ունենք սպեցիֆիկ խնդիրներ, որոնց մասին իհարկե բոլորս գիտենք, բարձրաձայնում ենք` սկսած մեր աշխատասենյակներից մինչև սրճարաններ: Այսօր ես չեմ կարող մասնագիտական կամ վերլուծական միտք հայտնել, ինչպես արել է մարդու իրավունքների նախկին պաշտպանը, քանի որ չեմ ունեցել ռեսուրս` անելու լուրջ հետազոտություն: Ես, որպես քաղաքացի, ավելին չեմ կարող ասել, քան  ասել է նախկին պաշտպանը: Դրա համար ես այսօր կարող եմ հիմք ընդունել մարդու իրավունքների նախկին պաշտպանի խոսքը: