Ինչո՞ւ չեն ցանկանում պայմանագիր կնքել Դ. Սարգսյանի հետ. «Ես խմելու հետ կապված ոչ մի պատասխան չեմ տա ձեզ»
Այսօր լրացավ Ազգային գրադարանի տնօրեն Դավիթ Սարգսյանի պաշտոնավարման ժամկետը: Անցած օրերին գրադարանի աշխատակիցները բողոքի ակցիա են իրականացրել, դիմում-խնդրանք ուղղել երկրի ղեկավարներին` բողոքելով մշակույթի նախարարության այն ծանուցման դեմ, ըստ որի նախարարությունը չի պատրաստվում երկարաձգել նրա պայմանագրի ժամկետը:
Մշակույթի նախարարության հասարակայնության հետ կապերի պատասխանատու Գայանե Դուրգարյանը նախ չցանկացավ հարցի վերաբերյալ որևէ մեկնաբանություն տալ, նշելով, որ դրա առնչությամբ «մենք ձեզ կտեղակացնենք, դրա վերաբերյալ կլինի մեկնաբանություն»: Նա խորհուրդ տվեց սպասել նախարար Հասմիկ Պողոսյանի հրամանին: Ինչ վերաբերում է պայմանագրի չերկարացման հիմքին ու պատճառաբանությանը, ապա Դուրգարյանն ասաց, որ ոչինչ չգիտե, մեկնաբանություն ունենալու պարագայում էլ խոստացավ անպայման մեզ հայտնել:
Տարածված խոսակցությունների համաձայն, պայմանագիր չկնքելու պատճառներից մեկն էլ այն է, որ եղել են դեպքեր, երբ Դ. Սարգսյանը աշխատանքի է եկել ոչ սթափ վիճակում: Այս առնչությամբ Panorama.am-ը պարզաբանումներ խնդրեց Ազգային գրադարանի տնօրենի տեղակալ Ռաֆիկ Ղազարյանից, ում վրա այսօրվանից դրված է տնօրենի պարտականությունների կատարումը: Ռ. Ղազարյանն այդ խոսակցությունները չարամիտ ու չափազանցված համարեց:
«Չարամիտ բաներ են, խիստ չափազանցեցված: Եթե դուք ձեր շրջապատն էլ նայեք, ձեր ընտանիքում էլ նայեք, մարդիկ կարող է ֆուրշետ է լինում, ընդունելություն է լինում, խմում են, գուցե շատ են խմում, կամ քիչ են խմում, դա ուրիշ խնդիր է, բայց միշտ էլ եթե ուզենան մարդուն վարկաբեկել, ինչ ասես կասեն էլի: Չեմ կարող ասել, դա պատճառ է, թե՞ պատճառ չի»,-ասաց Ռ. Ղազարյանը:
Երբ հարցրեցինք, թե ինքը Դ. Սարգսյանի գործընկերը լինելով տեսե՞լ է, որ վերջինս աշխատանքի է ներկայացել խմած վիճակում, նա արձագանքեց. «Ես խմելու հետ կապված ոչ մի պատասխան չեմ տա ձեզ, որովհետև խմելն ինչ-որ բան չի, բոլորն էլ խմում են, ես չգիտեմ ով ինչքան է խմում, բայց դուք ինձանից պահանջում եք մի բան, որ ես չեմ կարող ձեզ պատասխանել: Ես ի՞նչ ասեմ, ես ասե՞մ խմել է, կամ չի՞ խմել: Ով որ ասել է, նրան էլ հարցրեք, եթե ասի` տեսել եմ էս ինչ օրը, ես կհաստատեմ կամ կժխտեմ: Եղա՞վ»:
Ռ. Ղազարյանն այսօր հանդիպել է նախարարի հետ: «Ինձ նախարարը ավելի շուտ ասեց, որ Դավիթ Սարգսյանն արդեն 12 տարի աշխատել է, բան չունեմ ասելու, բայց կան տեղեր, որտեղ 12 էլ են աշխատում, 30 էլ են աշխատում: Սա արդեն վերաբերմունքի խնդիր է: Հետո էլ կան հարցեր, որ նախարարի իրավասության ներքո են, ես չեմ կարող…»,-ասաց նա:
Ի դեպ, մշակույթի նախարար Հասմիկ Պողոսյանը Ռ. Ղազարյանին հավաստիացրել է, որ Դ. Սարգսյանը կշարունակի աշխատել Ազգային գրադարանում: Ըստ մեր զրուցակցի, նախատեսվում է, որ նա կդառնա գրադարանի գիտխորհրդի նախագահը, սակայն «ճշտելու խնդիրներ կան, «իրավասությունների շրջանակի ճշտելու խնդիրներ կան, աշխատավարձի, ասել են, որ իր աշխատավարձը նույնն է լինելու կամ չնչին տարբերությամբ»:
Ռ. Ղազարյանին այսօր տնօրեն դառնալու առաջարկ չի արվել, եթե արվեր էլ, ապա, նա հավաստում է, որ չէր ընդունելու, ինքը գրադարանագետ-մատենագետ է, ոչ թե վարչական աշխատող:
Նշենք, որ տարածված լուրերի համաձայն, գրադարանի տնօրենի աթոռին հավակնում է մշակույթի նախկին նախարար Հովիկ Հովեյանը:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ