Ս. Պետրոսյան. Ադրբեջանի բանակը պատրաստ չէ պատերազմական գործողությունների
«Ադրբեջանի շահերից է բխում շփման գծում լարվածության պահպանումը, ինչն իր անմիջական ազդեցությունն է գտնում այդ երկրի ներքին կյանքում ընթացող զարգացումների վրա: Ադրբեջանի իշխանություններն այդ ձևով են զսպում երկրի ներսում առկա դժգոհությունը»,- այս մասին Panorama.am-ի հետ զրույցում ասաց ռազմական փորձագետ Սամվել Պետրոսյանը:
Հիշեցնենք, որ Ադրբեջանի իշխանությունները միաժամանակ մերժում են դուրս բերել դիպուկահարներին առաջնային գծից, ինչպես նաև՝ ԵԱՀԿ Մինսկի խմբի համանախագահների հովանու ներքո և ԵԱՀԿ գործող նախագահի հատուկ ներկայացուցչի աջակցությամբ կրակի դադարեցման գծի երկայնքով կողմերի մասնակցությամբ անցկացնել հնարավոր միջադեպերի հետաքննություն անցկացնելը:
Ըստ բանախոսի՝ Ադրբեջանի իշխանությունների պահվածքը հակասական է. մի կողմից նրանք հայտարարում են, թե հայկական կողմի արձակված կրակից ադրբեջանցի զինվորներ են զոհվում, մյուս կողմից՝ նրանք դեմ են շփման գծից դիպուկահարների դուրս բերմանն ու հնարավոր միջադեպերի առնչությամբ հետաքննության անցկացմանը:
«Ադրբեջանը խեղաթյուրելով իրականությունը, շեղելով իրադարձությունների իրական ընթացքը՝ միաժամանակ «ապահովագրում» է նաև իր դիպուկահարների գործողությունները, ինչը լուրջ սպառնալիք է և պետք է հավուրպատշաճի գնահատական ստանա միջնորդ երկրների կողմից»,- ասաց Ս. Պետրոսյանը:
Ռազմական փորձագետի կարծիքով, Ադրբեջանի կողմից շփման գծում իրականացվող պռովոկացիոն գործողությունները նաև մեկ այլ նշանակություն ունեն այդ երկրի համար. նրանք անընդհատ փորձում են ցույց տալ, թե իրենք չեն համակերպվել Արցախի անկախության փաստի հետ, սակայն իրականությունն այլ բանի մասին է խոսում:
Պատասխանելով Panorama.am-ի այն հարցին, թե արդյո՞ք հնարավոր է, որ շփման գծում ժամանակ առ ժամանակ նկատվող միջադեպերը լայնամասշտաբ ռազմական գործողությունների վերածվեն, Ս. Պետրոսյանը նշեց. «Չեմ կարծում, քանի որ կողմերը լիովին գիտակցում են պատերազմի վերսկսման հետևանքով առաջ եկող հնարավոր վտանգների մասին: Ադրբեջանի ղեկավարությունը վստահ է, որ պատերազմով որևէ խնդիր չի կարող լուծվել, ավելին՝ այդ երկրի բանակը պատրաստ չէ պատերազմական գործողությունների»: