ՀՀ ՊՆ հոբելյանական նիստ. «Զինված ուժերում չենք հանդուրժելու թերացումներ»
«Մենք պարտավոր ենք պահել, փայփայել և զարգացնել ձեռքբերումները, արդարացնել ժողովրդի վստահությունը, որոնք ունեցան մեր զինված ուժերը այս 20 տարվա ընթացքում», - այսօր ՀՀ պաշտպանության նախարարությունում հայկական բանակի 20-ամյակին նվիրված հանդիսավոր նիստի բացման խոսքում հայտարարեց ՀՀ նախարար Սեյրան Օհանյանը` շնորհավորելով ներկա գտնվողներին Հայկական բանակի 20-ամյա հոբելյանի առթիվ:
Նախարարը նշեց, որ լավատեսությամբ է մուտք գործում 2012 թվական` ակնկալելով ավելի լավ արդյունքներ: Մասնավերապես` նա կարևորեց զինվորական բոլոր օղակներում բարձր ոգու և ընկերական համերաշխության առկայությունը:
Առանձնակի ուշադրություն նախարարը դարձրեց կատարողական կարգապահության վրա` շեշտելով, որ դրա շնորհիվ բանակում հնարավոր կլինի կանխարգելել մի շարք բացասական երևույթներ:
«Յուրաքանչյուր զինվորական պետք է ըմբռնի ղեկավար պաշտոնին ենթակայության կարևրությունը` այլապես բանակում կրկին կլինեն զանցանքներ և տհաճ պատահարներ», - նշեց նա` ընդգծելով, որ խաղաղ պայմաններում զինվորականի մահն անընդունելի է:
Նախարար Օհանյանն ասաց, որ չի կարող ընդունել խոսքերը, թե թերությունները բնորոշ են բոլոր երկրների զինված ուժերին:
«Զինված ուժերում չենք հանդուրժելու թերացումներ, որոնց գինը շատ թանկ է լինում», - շեշտեց նա:
Տոնական նիստին ներկա էին նաև Ազգային անվտանգության խորհրդի քարտուղար Արթուր Բաղդասարյանը, ՀՀ գլխավոր դատախազ Աղվան Հովսեփյանը, Արտակարգ իրավիճակների նախարար Արմեն Երիցյանը, ՀՀ ոստիկանապետ Վլադիմիր Գասպարյանը, Հանրային խորհրդի նախագահ Վազգեն Մանուկյանը, Ազգային անվտանգության ծառայության պետ Գորիկ Հակոբյանը, զինված ուժերի ղեկավար կազմը: Նրանք շնորհավորեցին տոնի կապակցությամբ և պատվոգրեր հանձնեցին զինված ուժերի մի շարք աշխատակիցների:
Իր շնորհավորական ելույթում Ազգային անվտանգության խորհրդի քարտուղար Արթուր Բաղդասարյանը շեշտեց, որ Հայաստանի զինված ուժերը կարողանում են կատարել ոչ միայն իրենց առջև դրված անմիջական պարտականությունը` պաշտպանել Հայրենիքի սահմաները, այլ նաև` միջազգային կազմակերպությունների հետ համագործակցության շրջանակներում իրականացնում են խաղաղասիրական առաքելություն:
Գլխավոր դատախազ Աղվան Հովսեփյանը, մասնավորապես, շեշտեց, որ Հայկական բանակը, ձևավորված լինելով երկրի համար խիստ ծանր պայմաններում կարողացավ արժանի դառնալ համաժողովրդայկան սիրո և հարգանքի:
ԱԱԾ պետ Գորիկ Հակոբյանի խոսքով` 20 տարվա ընթացքում հայկական զինված ուժերը կարողացան պաշտպանել ոչ միայն Հայաստանի տարածքային ամբողջականությունը, այլ նաև դարձան խաղաղության և անդորրի երաշխավորողը:
«Ազգային անվտանգության ծառայության և Հայաստանի զինված ուժերի համագործակցության շնորհիվ հնարավոր դարձավ իրականացնել Հայաստանի հանրապետության անվտանգության ապահովման սրբազան պարտքը», - նշեց նա:
Ոստիկանապետ, պաշտպանության նախկին փոխնախարար Վլադիմիր Գասպարյանն իր շնորհավորանքներում նշեց, որ բանակաշինության գործում մեծ ներդրում ունեցան հասարակության սերուցքը կազմող անձիք:
«Ես խոնարհվում եմ մեր երկրի պաշտպանության համար զոհված անձանց հիշատակի առջև: Թող Աստված պահպանի մեր զինվորականությանը` շարքային զինվորից` գեներալ, մեր գերագույն հրամանատարին, պաշտպանության նախարարին», - մաղթեց Վ.Գասպարյանը:
ՀՀ ոստիկանապետ Վլադիմիր Գասպարյանը ՀՀ պաշտպանության նախարար Սեյրան Օհանյանին պարգևատրեց «Սխրագործության համար» մեդալով:
ԱԻ նախարար Արմեն Երիցյանն իր երախտագիտությունը հայտնեց հայրենիքի հանդեպ հայ զինվորականներին` անձնուրաց և բարեխիղճ ծառայության համար:
Տոնական նիստին մասնակից նախարարներին, գերատեսչության ղեկավարներին, բանակաշինության գործում մեծ դերակատարություն ունեցած անձանց պաշտպանության նախարարը պարգևատրեց «ՀՀ զինված ուժեր. 20 տարի» հոբելյանական մեդալով:
Պարգևատրելով Հանրային խորհրդի նախագահ Վազգեն Մանուկյանին` Սեյրան Օհանյանը հատուկ շեշտեց, որ վերջինս Հայաստանի Հանրապետության փաստացի առաջին պաշտպանության նախարարն է: Արցախյան ազատամարտի հերոս, թիկունքի գեներալ-մայոր Արկադի Տեր-Թադևոսյանին պարգրևատրելու ժամանակ նախարար Օհանյանը ասաց. «Կոմանդոսը «թիկունքային» չի լինում»:
«ՀՀ զինված ուժեր. 20 տարի» մեդալով պարգևատրվեց նաև ՀՀ պաշտպանության նախկին փոխնարարար Վահան Շիրխանյանը:
Լրահոս
Տեսանյութեր
ՈՒՂԻՂ. Ազատ արձակել Բաքվում պահվող հայ գերիներին
