Ձեր վստահելի աղբյուրը

Ատոմային էներգիայի միջազգային գործակալության (ԱԷՄԳ) հինգ հոգանոց պատվիրակության և Իրանի իշխանությունների միջև միջուկային ծրագրի շուրջ ընթացող բանակցությունների երկրորդ փուլն ավարտվեց: Այցի ավարտից հետո ԱԷՄԳ գլխավոր քարտուղար Յուկիա Ամանոն հանդես եկավ հայտարարությամբ, նշելով, որ թեև իրենք հակված էին կառուցողական բանակցությունների, այնուամենայնիվ իրանական կողմը թույլ չի տվել, որպեսզի իրենց տեսուչներն այցելեն Փարչինի ռազմական հաստատություն: (Փարչինը փոքրիկ քաղաք է, որը գտնվում է Թեհրանի հարավ-արևելյան հատվածում: Այստեղ են տեղակայված միջուկային որոշ հաստատություններ, ինչպես նաև գործող ռազմական արդյունաբերության գործարաններ):

ԻԻՀ ԱԳՆ մամլո խոսնակ Ռամին Մեհմանփարաստը, մամլո ասուլիսի ընթացքում, ի պատասխան Ամանոյի մտահոգություններին, հայտարարել է, որ ԱԷՄԳ-ի տեսուչների այցի նպատակը ոչ թե հետաքննություն անցկացնելը, այլ Իրանի և ԱԷՄԳ-ի համագործակցության շուրջ բանակցություններ վարելն էր:

Ատոմային էներգիայի միջազգային գործակալությունում Իրանի ներկայացուցիչ Ալի Ասղար Սոլթանիեն էլ, Իրանի պաշտոնական «ԻՌՆԱ» լրատվական գործակալությանը տված հարցազրույցում, անդրադառնալով Ամանոյի` այցի ադյունքների վերաբերյալ արտահայտած մտահոգություններին, հայտարարել է. «Ցանկացած ստուգման համար նախ պետք է կողմերը օրենքի շրջանակում համաձայնության գան: Իրանը հարգում է միջազգային օրենքները և միշտ պատրաստ է համագործակցել է ԱԷՄԳ-ի հետ»:
Իրանի միջուկային հարցի շուրջ Իրանի և ԱԷՄԳ-ի միջև տեղի ունեցած բանակցություններին զուգահեռ իրանական հարցն ակտիվորեն քննարկվում էր նաև «հակամարտության» մեջ ներքաշված երկրների կողմից:

Օրերս ամերիկացի բարձրաստիճան պաշտոնյաներն Իրանի միջուկային խնդրի շուրջ իրենց հայտնած տեսակետներում ընդգծել են, որ խնդիրը պետք է լուծվի դիվանագիտական ճանապարհով: ԱՄՆ ազգային հետախուզության ծառայության տնօրեն Ջեյմս Քլեփերը Սենատի զինված ուժերի հանձնաժողովում տեղի ունեցած քննարկումներում տեղեկացրել է, որ Իրանը թեև տեխնիկապես ի զորու է միջուկային զենք ստեղծել, սակայն մոտ ժամանակներում դրա հավանականությունը շատ քիչ է:

Ի լրումն Քլեփերի դիտարկումներին, ԱՄՆ պաշտպանության նախարար Լեոն Պանետտան նշել է, որ համապատասխան տեղեկություններ չկան այն մասին, որ Թեհրանը որոշել է ատոմային ռումբ ստեղծել, հավելելով, որ Իսրայելն Իրանի միջուկային հաստատությունների վրա ռազմական հարձակում գործելու վերաբերյալ առայժմ որոշում չի կայացրել: Լեոն Պանետայի հայտարարությունից օրեր անց`փետրվարի 18-ին, ԱՄՆ նախագահի` անվտանգության հարցերով խորհրդական Թոմ Դոնիլոնն Իրանի հարցում բանակցություններ վարելու նպատակով գործուղվեց Իսրայել:

Այս ենթատեքստում ուշագրավ հայտարարությամբ է հանդես եկել նաև Մեծ Բրիտանիայի ԱԳ նախարար Ուիլյամ Հագը, նշելով, որ Իրանի վրա Իսրայելի ռազմական հարձակումն անմիտ քայլ կլինի: Իսրայելին Իրանի վրա ռազմական հարձակման մտադրությունից հրաժարվելու կոչով դիմեց նաև Ռուսաստանի ԱԳ փոխնախարար Գենադի Գատիլովը, նշելով որ դա կկասեցնի միջուկային ծրագրի շուրջ ընթացող բանակցությունների գործընթացը:

Թեև Իսրայելի կողմից, քարոզչական նկատառումներից ելելով, Իրանի միջուկային հարցը ռազմական ճանապարհով լուծելու մասին հաճախակի են հնչում սպառնալից հայտարարություններ, սակայն Իսրայելի ուժային կառույցների ղեկավարները` բանակի ընդհանուր շտաբի պետը, ռազմական հետախուզության, արտաքին հետախուզության (Մոսսադ) և ներքին անվտանգության գերատեսչությունների ղեկավարներն իրենց հայտարարություններում վերջին շրջանում հիմնականում դեմ են արտահայտվել Իրանի վրա ռազմական հարձակում իրագործելու վարչապետ Բենիամին Նեթանյահուի և պաշտպանության նախարար Էհուդ Բարաքի ծրագրերին:

Միևնույն ժամանակ, հաշվի առնելով այն փաստը, որ Իրանի և 5+1 խմբի (ՄԱԿ ԱԽ հինգ մշտական անդամներ և Գերմանիա) միջև համաձայնություն է ձեռք բերվել միջուկային ծրագրի շուրջ շարունակել բանակցությունները (շաբաթվա վերջում բանակցությունների անցկաման վայրը հավանաբար կորոշվի ), ինչպես նաև վերոնշյալ խմբի անդամ որոշ երկրներում, այդ թվում նաև Իրանում տեղի են ունենում նախընտրական գործընթացներ, Իրանի միջուկային խնդիրը ռազմական ճանապարհով լուծելու Իսրայելի մտադրություններն համենայն դեպս մոտ ապագայում իրատեսական չեն: