Ձեր վստահելի աղբյուրը

Ճանապարհային ոստիկանության նախկին պետ, այժմ անազատության մեջ գտնվող Մարգար Օհանյանը թեպետ շաքարային դիաբետ ունի, բայց իրեն լավ է զգում: Այդ մասին Panorama.am-ին փոխանցեց Մարգար Օհանյանի փաստաբան Մկրտիչ Վասակյանը` ասելով, որ վերջերս է հանդիպել Օհանյանի հետ:

Հիշեցնենք` Մարգար Օհանյանը մայիսի 30-ին դատապարտվել էր 6 տարի ազատազրկման. Նրան մեղադրանք էր առաջադրվել այն բանի համար, նա` աշխատելով որպես ՀՀ ոստիկանության ճանապարհային ոստիկանության պետ, մշտապես իրականացնելով իշխանության ներկայացուցչի լիազորությունները, հանդիսանալով պաշտոնատար անձ, շահադիտական շահագրգռվածությունից ելնելով՝ իր պաշտոնեական դիրքն օգտագործել է ծառայության շահերին հակառակ, որն էական վնաս է պատճառել պետության օրինական շահերին և անզգուշությամբ առաջացրել է ծանր հետևանքներ, ինչպես նաև կատարել է իրեն վստահված, ճանապարհային ոստիկանությանը պատկանող առանձնապես խոշոր չափերով գույքի յուրացում:

Օհանյանը չցանկացավ բողոքարկել վճիռը Վերաքննիչ դատարանում, և դատավճիռն այժմ ուժի մեջ է մտել: Հետաքրքրվեցինք, թե դա նշանակո՞ւմ է, որ Օհանյանը հարմարվել է կայացված վճռի հետ, այն պարագայում, երբ դատարանում չէր ընդունում իր մեղքը, Վասակյանը պատասխանեց, որ եթե չեն բողոքարկել, նշանակում է ընդունել են դատավճիռը:

Վասակյանն ասաց, որ ինքը, որպես փաստաբան, Մարգար Օհանյանին մատնանշել է ազատության մեջ լինելու ճանապարհները` կամ բողոքարկել վճիռը, կամ Հանրապետության նախագահին ուղղված ներման խնդրագիր գրել: Առաջին տարբերակը չստացվեց, իսկ ինչ վերաբերում է ներման խնդրագիր գրելուն, Վասակյանն ասաց, որ Օհանյանն այդ ուղղությամբ իր մտադրության մասին իրեն դեռևս ոչինչ չի ասել:

«Մենք իրեն հետ պայմանավորվել ենք` եթե որևէ նման խնդիր առաջանա, այսինքն, մտքով անցնի գրել խնդրագիր, ես կայցելեմ իրեն` տեսնենք, թե ինչ ենք անում: Բայց մինչև հիմա այդ մասին ինքը լուր չի տվել ինձ»,-նկատեց պարոն Վասակյանը:

Մեր հարցին, թե ի՞նչ է կարծում փաստաբանը, ի՞նչ դիրքորոշում կունենա Մարգար Օհանյանը խնդրագիր գրելու հարցում, Վասակյանը պատասխանեց. «Չեմ կարող ասել, որովհետև Օհանյան Մարգարը մի քիչ ինքնամփոփ մարդ է և չի արտահայտում իր ցանկություններն ու զգացմունքները, դրա համար չեմ կարող ասել»:

Ազատության մեջ լինելու մեկ այլ հնարավորություն էլ կա` պայմանական վաղաժամկետ ազատ արձակելը: «Ըստ դատավճռի` ինքը դատապարտվել է վեց տարի ազատազրկման, որից երեք տարին բանտում անցկացնելուց հետո, ինքը կարող դիմել հանձնաժողովին` իրեն պայմանական վաղակետ ազատ արձակելու համար: Բայց դրա համար դեռ երկու տարի էլ պետք է անցկացնի անազատության մեջ», -փոխանցեց փաստաբանը:

Մարգար Օհանյանը դատապարտվեց 6 տարվա ազատազրկման