Ձեր վստահելի աղբյուրը

Ավագանու ընտրություններին մասնակցող քաղաքական ուժերի նախընտրական ծրագրերում հատուկ դրույթներ կան նաև Երևանի արտաքին քաղաքական տեսքին, ճարտարապետական պատկերին վերաբերող հարցերի վերաբերյալ: «Մեդիա կենտրոնում» հրավիրված քննարկման ժամանակ ընտրություններին մասնակցող յոթ քաղաքական ուժերի ներկայացուցիչները փորձեցին ներկայացնել ըստ իրենց քաղաքի արտաքին տեսքի, ճարտարապետությանը վերաբերող կարևորագույն խնդիրները:

«Առաքելություն» կուսակցությունից Մեսրոպ Առաքելյանը որպես կարևոր խնդիր համարում է քաղաքի փոքր կենտրոնի անկանոն կառուցումը:

ՕԵԿ ցուցակից Հրայր Սարգսյանն էլ առաջարկում է վերանայել փոքր կենտրոնի հատակագիծը, բեռնաթափել այն, նախարարությունները տեղափոխել ծայրամասեր: Ըստ նրա, պետք է ուշադրություն դարձնել բազմաբնակարան շենքերի սեյսմակայանությանը, լուծել շենքերի տանիքների հարցերը, անպայման հետևել քաղաքի արտաքին տեսքին, կառուցել այնպիսի շենքեր, որոնք համահունչ կլինեն հայկական ոճին, պատմությանը:

«Բարև Երևան» դաշինքից Գուրգեն Հակոբյանն իր խոսում նշեց, որ Երևանն ունի քաղաքի գլխավոր հատակագիծ, որն օրենքի ուժ ունի ու պետք է հետևել դրան:

ԲՀԿ ցուցակից Գուրգեն Գասպարյանի կարծիքով, Երևանի գլխավոր հատակագիծը պետք է հասու լինի բոլորին, պետք է տեսնի ապագա զարգացման այն տեսլականը, ինչը մատնանշվում է Երևանի գլխավոր հատակագծով:

ՀՀԿ ցուցակում ընդգրկված Լևոն Իգիթյանը բացահայտեց, որ երբ կառավարությունն ընդունել է Երևանի գլխավոր հատակագիծը, կառավարությունում ասել են, թե Երևանի քաղաքապետարանի քաղաքաշինական խորհուրդն այն քննարկել ու համաձայնություն է տվել, մինչդեռ քաղաքաշինական խորհուրդը, որի կազմում այդ ժամանակ ընդգրկված է եղել նաև ինքը, տեղյակ չի եղել այդ հատակագծին, չի տեսել այն: «Դա է պատճառը, որ ոչ կատարյալ գլխավոր հատակագիծն անընդհատ փոփոխման է ենթարկվում, իսկ փոփոխման ենթարկվելուն բազմաթիվ ուժեր են մասնակից դառնում»,- ասաց նա: Լ. Իգիթյանը նաև նշեց, որ օպերայի թատերական հրապարակի այգում 18 օբյեկտ կա, առաջարկեց ուսումնասիրել ու պարզել, թե այդ օբյեկտների «հետևում քաղաքական որ կուսակցության ներկայացուցիչն է կանգնած», կոչ անել նրան հրաժարավել` օրինակ ծառայելով նաև մյուսներին:

ՀՅԴ ցուցակում ընդգրկված Բորիս Հայրապետյանը հակադարձեց Լ. Իգիթյանին` դիտարկելով, որ օպերայի տարածքում կառույցված օբյեկտների հարցը չպետք է քաղաքականացնել, այլ պետք է բարձրաձայնել, թե ով է թույլտվություն տվել այդտեղ սրճարան կառուցել: Նա նաև նշեց, որ ներկայիս Երևան քաղաքի կառուցապատումը չի համապատասխանում ոչ թամանյանական, ոչ քաղաքակիրթ աշխարհում ընդունված ռացիոնալ սկզբունքներին: Ըստ Բ. Հայրապետյանի, քաղաքի կենտրոնը նախատեսված է գործնական, առևտրային բնույթի շենք շինությունների, կանաչապատ տարածքների համար, մինչդեռ մեզ մոտ հակառակ երևույթն է:

ՀԱԿ ցուցակից Ավետ Պողոսյանն իր խոսքում ասաց, որ գոյություն ունի գլխավոր հատակագիծ, որն ունի օրենքի ուժ, որից շեղումը հանցագորոծություն է: Ըստ նրա, օրենքի խախտողներին պետք է պարզի հենց ավագանին, դատախազությունը, ոստիկանությունը, միչդեռ…: