Իրանի ԱԳՆ-ն արձագանքել է Ահմեդ Դավութօղլուի՝ Թեհրանի հասցեին ուղղված մեղադրանքներին
Թուրքիայի ԱԳ նախարարի հայտարարությունը վկայում է, որ Սիրիայի հարցում Անկարայի քաղաքականությունը տապալվել է:
Այդ մասին իրանական «ՖԱՐՍ» լրատվական գործակալության հաղորդմամբ՝ հայտարարել է ԻԻՀ ԱԳՆ պաշտոնյաներից մեկը:
Իրանական աղբյուրի հաղորդմամբ՝ ԻԻՀ ԱԳՆ պաշտոնյան, արձագանքելով Թուրքիայի ԱԳ նախարար Ահմեդ Դավութօղլուի՝ Իրանին հասցեագրված այն մեղադրանքին, թե Իրանն ու «Հեզբոլլահը» շիական պաշտպանական գոտի ստեղծելով, ներքաշված են սիրիական հակամարտության մեջ, մասնավորապես նշել է. «Թուրքիայի ԱԳ նախարարի նման հայտարարությունը վկայում է, որ Թուրքիան Սիրիայի հարցում իր քաղաքականությունը չի փոխել: Ուրիշների հանդեպ մեղադրանք ներկայացնելը չի կարող հատուցել Սիրիայի հարցում Թուրքիայի վարած քաղաքականության տապալումը»:
ԻԻՀ ԱԳՆ պաշտոնյան, անդրադառնալով սիրիական հակամարտության մեջ ներքաշված ուժերի կողմից վարվող քաղաքականությանը, նշել է. «Այն պարագայում, երբ տարածաշրջանը սուննիների և շիաների միավորման կարիք ունի, որոշ ուժեր ահաբեկիչներին ուսուցանում և նրանց զենք են մատակարարում, ինչը, բնականաբար չի օգնում Սիրիայի ժողովրդին: Ավելին, այսօր Թուրքիան սալաֆիական խմբերի գլխավոր լոգիստիկ կենտրոնակայաններից մեկն է դարձել»:
«Իրանը գտնում է, որ սիրիական ճգնաժամի լուծման միակ ճանապարհը քաղաքական երկխոսությունն է: Հուսով ենք, որ թուրք պաշտոնյաները որքան հնարավոր է շուտ այդ իրողությունը կընկալեն»,-եզրափակել է իրանցի դիվանագետը:
Նախորդող հրապարակում՝
ՄԱԿ-ում ԻԻՀ դեսպան. Իրանը Սիրիայում ռազմական ներկայություն չունի