«…ես հայ նկարիչ եմ, ես իմ տառապած ժողովրդի մի բեկորն եմ»… Գառզու (լուսանկարներ)

Համացանց 09:55 02/09/2013

«Իբրև նկարիչ՝ կպատկանիմ ֆրանսիական արվեստին, սակայն իմ բոլոր գործերուս մեջ անշուշտ հայ կմնամ: Չէ՞ որ մենք ամենքս մեր ժողովրդի բեկորներն ենք»,- խոսքերի հեղինակն է ֆրանսահայ հայտնի նկարիչ Գառզուն՝ Գառնիկ Զուլումյանը:

Ֆրանսահայ նկարիչ, Ֆրանսիայի գեղարվեստի ակադեմիայի անդամ, միջազգային մրցանակների դափնեկիր Գառզուն ֆրանսիական արդի գեղանկարչության խոշոր դեմքերից է: Նրա ստեղծագործություններում նորովի են արտացոլվել ֆրանսիական դասական արվեստի ավանդույթները: Ստացել է Ֆրանսիայի արվեստի և գրականության ասպետի տիտղոս, Պատվո լեգեոնի շքանշան:

Գառզուն մեծ համբավի է արժանացել հատկապես 1950-ական թվականներին ստեղծած հակապատերազմական տրամադրություններ խորհրդանշող պատկերներով` լքված ու ավերված պալատներ, նավահանգիստներ, երկաթուղային կայարաններ, որտեղ արտացոլված է ամայության և տագնապի զգացողությունը:

Գառզուի գործերում իրականությունն ասես կերպարանափոխվել, վերածվել է նրբագեղ գծերի հյուսվածքի, տեսիլ-աշխարհների: Գիծը դարձել է գառզուական գեղանկարչության գլխավոր արտահայտչամիջոց: «Գիծերս օրենքի չեն ենթարկվիր: Գործեգործ անոնց իրար նմանվելը կամ տարբերվելը ինձմե կախված չեն: Լեժեն սիստեմ ունի, Անդրե Լոտը սիստեմ ունի, ես իմ օրենքը չունիմ, ես չունիմ սիստեմ»,- ասել է նկարիչը:

Գույնի մասին ասեկ է. «Ես գույնի տարբեր շրջաններ ունեմ: Այդպես է: Ատիկա ամենքին ի տես է դրված: Բայց հավատա, երբեք չեմ նստած ու մտածած, թե այսօր այս գույնով աշխատիմ, վաղը` այն գույնով: Ատոնք բոլորն ինքնաբերաբար են եկած, արվեստագործելու ընթացքում: Պարզապես ամեն մի շրջանում այդ ժամանակվա տրամադրություններուս ու մտահղացումներուս թելադրած գույնով եմ աշխատել»:

Գառզուն հայտնի է նաև որպես բեմանկարիչ: Գառզուի սկզբունքը հետևյալն էր. «Դեկորացիան դեկորատիվ չպիտի ըլլա, այն շլացնելու չէ: Ապրեցնելու է: Դեկորացիան դրամատիկ պետք է ըլլա: Բեմը զարդարելը, հաճելի գույներ գտնելը, կարծեմ թե գործի պրիմիտիվ երևույթը ըլլալու է»:

Գառզուն Հայաստանի ազգային պատկերասրահին և Ժամանակակից արվեստի թանգարանին է նվիրել 400, իսկ ի նպաստ Սպիտակի երկրաշարժից տուժած արվեստագետների՝ 50 գրաֆիկական գործեր:

Գառզուն հայտարարել է. «Էությամբ, աշխարհազգացողությամբ, ես հայ նկարիչ եմ, ես իմ տառապած ժողովրդի մի բեկորն եմ: …Անանկ տպավորություն ունեմ, կարծես վաղուց եմ այցելած Հայաստան»:

Հայկական կերպարվեստ շարքը նպատակ ունի նորելու մեր հիշողությունն ու հարգանքը` հանդեպ հայ արվեստի վարպետների ու դասականների:

Շարքի նախորդ հրապարակումները՝

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: