Ձեր վստահելի աղբյուրը

Ահնիձորի Հրանտ Մաթևոսյանի անվան 9-ամյա դպրոցում սովորում է   ընդամենը 23 աշակերտ: 9 դասարանի փոխարեն կա 4 դասարան. աշակերտների թվաքանակի պատճառով դասարանները կոմպլեկտավորել են` 1-4-րդ դասարանները երկու դասարան են, 8-րդ դասարան չունեն, 5-ն ու 6-ը միասին են, 7-ն ու 9-ը` միասին:

Դպրոցի տնօրեն Համլետ Մաթևոսյանը Panorama.am-ի թղթակցի հետ զրույցում հայտնեց, որ ամենաքիչ աշակերտ ունի 6-րդ դասարանը, այստեղ մի աշակերտ էր սովորում, ծնողը հանեց, տարավ հարևան դպրոց: Ասաց` ձեզանից դժգոհություն չունենք, բայց մենակ է երեխան, հանում ենք»,- պատմեց տնօրենը:

Օրերս «ֆեյսբուք» սոցիալական ցանցում շոշափվել էր այս դպրոցի անունը, մասնավորապես խոսքի մեջ դժգոհել էին հայոց լեզվից: Եվ, քանի որ Panorama.am –ը մարզային ու գյուղական դպրոցների մասին գրում է, որոշեցինք այս դպրոցին էլ անդրադառնալ:

Ահնիձորի գյուղապետ Վանիկ Քառյանը մեզ պատմեց, որ կոնկրետ կրթության ցածր որակի մասին դժգոհություններ չի լսել: «Մի ծնող, ճիշտ է, հանել է իր երեխային դպրոցից, հարևան գյուղի դպրոց է գնում: Աղջիկ երեխա է, իր եղբոր հետ գնում է այդ դպրոց: Խնդիրը սա է, ոչ թե կրթական ցածր մակարդակը»,- իր հերթին դժգոհեց գյուղապետը:

Ինչ վերաբերում է կոնկրետ հայոց լեզվին, ապա Համլետ Մաթևոսյանը այս առարկայի մասնագետ է, և, ըստ նոր կարգի` տնօրենը չի կարող դասավանդել: «Կա մասնագետ, որ գտնվում է ֆիզարձակուրդում: Իսկ դպրոցը գարնանը վերանորոգման մեջ էր, եղել են դասեր, որ խճողվել են: Դժգոհությունն ինձնի՞ց է, թե՞ ֆիզարձակուրդում գտնվող ուսուցչուհուց, ես այդ հարցն առաջին անգամ եմ լսում, չգիտեմ: Ֆիզարձակուրդում գտնվող ուսուցչուհու փոխարեն ստիպված ես եմ պարապում, վարձատրման ակնկալիք չունենալով: Կողքից լսել եմ, որ երեխաներն ու ծնողներն իրենց գոհությունն են հայտնում, առանց սնապարծության եմ ասում»,- ասաց նա և կրկնեց, որ իր համար առեղծված է, որ բողոքողները շեշտը հատկապես հայոց լեզվի վրա են դրել:

«Հայոց լեզվի մասնագետով հարուստ ենք, մաթեմատիկայով` հարուստ ենք, օտար լեզվինը` քաջահմուտ է, ինֆորմատիկայինը, ֆիզիկայինը մասնագետ է, պատմությանը` խորը մասնագետ է: Չեմ հասկանում դժգոհության առիթ ո՞վ է տվել, ի՞նչն է տվել: Եթե դպրոցի վերանորոգման պատճառով ինչ-որ խճողումներ են եղել, ես բնական եմ համարում: Օրինակ շախմատն էլ լիցենզիա ունեցող մեկը չկա, որ իրեն տամ այդ դասաժամերը, անցյալ տարի պարապել եմ և չեմ վարձատրվել, ակնկալիք էլ չեմ ունեցել վարձատրվելու, այս տարի ասել եմ էլի կպարապեմ առանց վարձատրության, վարչության պետն ասաց` թող մնա, մասնագետ կգա: Ֆիզկուլտուրայի մասնագետ չունենք, չնչին ժամեր են, ինձ ասացին ոչ մեկին մի տուր մինչև մրցույթ հայտարարենք, մասնագետներ գտնենք: Խնդրեմ, մասնագետները թող գան պարապեն: Դե երևի չար լեզուներն են ասում, ակունքը չեմ հասկանում` խորը ուսումնասիրե՞լ են, տեսել են ինչպե՞ս է, ինչպե՞ս չի, թե՞ հերյուրանքներ են»,- ասաց Համլետ Մաթևոսյանը:

Տնօրենը տեղեկացրեց, որ հիմնական դպրոցն ավարտելուց հետո աշակերտները կրթությունը հարևան Լորուտ գյուղի միջնակարգ դպրոցում են շարունակում: Գյուղում մեքենա կա, տանում-բերում է աշակերտներին, սակայն հաճախ տանում է, հետ բերել չի կարողանում:

«Կամ սեփական մեքենաներով են գնում, կամ ոտքով են հետ գալիս: Նույնը նաև ձմռանն է, մեքենան տանում է, բայց մեքենայի տերը իր գործով է զբաղված լինում, ոտքով կամ պատահական մեքենաներով են հետ գալիս: Կոնկրետ ավտոբուս չկա, որ տեղափոխի աշակերտներին»,- ասաց նա և հավելեց,- «Ես չեմ պատկերացնում ոնց կարելի է լուծել այդ խնդիրը: Ուղղակի ավելի շատ տխրում եմ այս վիճակից, շատ եմ մտածում, բայց ելքը չեմ գտնում: Մարդիկ լքում են իրենց տուն ու տեղը, հայրենիքը»:

Նախորդիվ՝ Սեպտեմբերի 1-ին ընդառաջ. Մարզային դպրոցներում ուրախանում են առաջին դասարանցու 1 դիմում էլ ստանալու դեպքում